ផ្អើលនាំគ្នាមកទាំងយប់ដោយសារតែ…
រាជធានីភ្នំពេញ ៖ ស្ត្រីជាគ្រូបង្រៀនម្នាក់កើតទុក្ខមិនសុខចិត្តបន្ទាប់ពីព្រះសង្ឃបានស្រែកតាមឃោសនស័ព្ទប្រាប់ឲ្យរុះរើតូបលក់ដូរ
រាជធានីភ្នំពេញ ៖ ស្ត្រីជាគ្រូបង្រៀនម្នាក់កើតទុក្ខមិនសុខចិត្តបន្ទាប់ពីព្រះសង្ឃបានស្រែកតាមឃោសនស័ព្ទប្រាប់ឲ្យរុះរើតូបលក់ដូរនៅក្នុងសាលាបឋមសិក្សាច្បារអំពៅទី២ ស្ថិតនៅក្នុងវត្តច្បារអំពៅចេញដោយអះអាងថា ជាកន្លែងផ្តល់ទីតាំងប្រើប្រាស់ និងចែកចាយគ្រឿងញៀន ដែលបង្កឲ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី២១ ខែមិនា ឆ្នាំ២០១៧ ក្នុងវត្តច្បារអំពៅ សង្កាត់ច្បារអំពៅ២ ខណ្ឌច្បារអំពៅ ។
ស្ត្រីដែលព្រះសង្ឃលើកដេញឱ្យរុះរើតូបចេញពីក្នុងសាលារៀនមានឈ្មោះ លឹម សុខហេង អាយុ៥៥ឆ្នាំ មុខរបរគ្រូបង្រៀនសាលាបឋមសិក្សាច្បារអំពៅទី២ ស្នាក់នៅភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ។ តាមសម្ដីស្ត្រីជាគ្រូបង្រៀនបាននិយាយថា រូបគាត់បានមកធ្វើគ្រូបង្រៀននៅសាលាបឋមសិក្សាច្បារអំពៅទី២អស់រយៈពេល៣២ឆ្នាំមកហើយ តាំងពីឆ្នាំ១៩៨៤មកម្ល៉េះ ហើយរូបគាត់បានធ្វើតូបលក់ដូរក្នុងសាលាបឋមសិក្សាច្បារអំពៅ២ តាំងពីគាត់ចាប់ផ្ដើមបង្រៀនមក រហូតដល់ពេលនេះនៅពេលដែលបង្រៀនហើយឆ្លៀតលក់ដូរឥវ៉ាន់បន្តិចបន្តួចក្នុងសាលារៀន ដើម្បីបានកម្រៃមកគួបផ្សំគ្នាដោយលក់ដូរតាំងពីមិនទាន់មានវត្តច្បារអំពៅនៅជាប់នឹង សាលានេះ ។
ប្រភពដដែលបានបន្តទៀតថា នៅពេលរូបគាត់លក់ដូររួច គាត់មិនបានដេកយាមតូបនោះទេគឺគាត់បានជួលឱ្យស្ត្រីអនាថា និងបុរសម្នាក់ដែលផ្ទុកជំងឺអេដស៍ជាអ្នកដេកយាមតូប ដើម្បីដូរបាយហូប រហូតមកដល់យប់កើតហេតុខាងលើក៏ស្រាប់តែគេមកប្រាប់គាត់ថា មានព្រះសង្ឃ និងកូនសិស្សព្រះសង្ឃបានលើកគ្នាមួយវត្តមកដេញបុរស និងស្ត្រីដែលជួលឱ្យដេកយាមតូបនោះចេញ ។
ដោយឡែកព្រះសង្ឃគង់នៅវត្តច្បារអំពៅវិញបានមានសង្ឃដីកាថា ដោយសារតែការនិយាយតៗគ្នាថា ក្នុងវត្តច្បារអំពៅនេះតែងតែមានអ្នកប្រើប្រាស់ និងជួញគ្រឿងញៀន ព្រោះតូបលក់ដូរខាងលើនេះតែងតែផ្ដល់ជំរកដល់ពួកអ្នកប្រើប្រាស់ និងជួញដូរគ្រឿង ។
ហេតុការណ៍ឃើញមានសមត្ថកិច្ចមូលដ្ឋានព្រមទាំងគណៈកម្មាធិការគ្រប់គ្រងវត្តបានចុះទៅជួយធ្វើការសម្របសម្រួលផងដែរ នៅតែមិនត្រូវគ្នាដោយខាងព្រះសង្ឃបានដេញខាងស្ត្រីដែលជាគ្រូបង្រៀនចេញពីរបងវត្តក្នុងយប់នេះ តែខាងស្ត្រីជាគ្រូបង្រៀនវិញមិនព្រមចេញទេ ព្រោះខ្លាចក្រុម ព្រះសង្ឃ និងរុះរើតូបលក់របស់គាត់ចេញបាត់ឥវ៉ាន់គាត់អស់ ពីព្រោះអីគ្រូបង្រៀន និងអ្នកលក់ដូរមុនៗធ្លាប់ត្រូវព្រះសង្ឃធ្លាប់ធ្វើអញ្ចឹងម្តងហើយ ៕
ចែករំលែកព័តមាននេះ