រាជធានីភ្នំពេញ ៖ សេចក្តីរាយការណ៍បានឱ្យដឹងថា ចៅក្រមតុលាការកំពូល នាព្រឹកថ្ងៃទី២២ មីនា នេះ បានលើកពេលសវនាការម្តងទៀតលើសំណុំរឿងឧក្រិដ្ឋជន ហេង ពៅ ដែលជាអតីតស្នងការនគរបាលក្រុងភ្នំពេញ ។ ការលើកសវនាការនេះ គឺដោយសារលោកហេង ពៅ មិនព្រមទទួលយកមេធាវីដែលខាងតុលាការចាត់តាំងឱ្យនោះទេ គឺសុំរកដោយខ្លួនឯងវិញ ។
ប្រភពឱ្យដឹងថា ក្នុងនោះលោកហេង ពៅ ក៏បានទាមទារឱ្យខាងតុលាការអនុញ្ញាតឱ្យលោកដកប្រាក់ចេញពីគណនី ប៉ុន្តែខាងតុលាការឆ្លើយថា គឺមិនអាចសម្រេចបានទេ ។
គួររំលឹកថា សវនាការនេះ គឺលើបណ្តឹង២របស់លោកហេង ពៅ ទី១-ករណីរក្សាទុកដុល្លារក្លែងក្លាយ និងទី២-បង្ខាំងមនុស្សខុសច្បាប់ កាលពីឆ្នាំ២០០៦ ។ កាលពីថ្ងៃទី១៥ មីនា កន្លងមក អ្នកទោស១០៣ឆ្នាំ ឈ្មោះហេង ពៅ អាយុ៥៤ឆ្នាំ រូបនេះ ត្រូវបានបញ្ជូនមកតុលាការកំពូលម្តងរួចហើយ ដើម្បីជំនុំជម្រះលើបណ្តឹងសាទុក្ខរបស់ជននេះ ក្នុងករណីបង្ខាំងមនុស្សខុសច្បាប់ តែសវនាការនោះ ត្រូវបានលើកពេលវិញ ដោយសារលោកហេង ពៅ មិនមានមេធាវីការពារសិទ្ធិឱ្យ ។
ទោះបីយ៉ាងណាឧក្រិដ្ឋជនទណ្ឌិតរូបនេះនៅតែបដិសេធថាខ្លួនគាត់មិនបានប្រព្រឹត្តដូចការចោទប្រកាន់របស់តុលាការទេ។តែបែរជាថាខ្លួនគាត់ស្អាតស្អំនិងមានគេចង់ធ្វើបាបគាត់ទៅវិញ ។ នេះជាការដោះសាររបស់អតីតស្នងការក្លាយជាអ្នកទោសព្រោះទង្វើនិងសកម្មភាពរបស់ខ្លួនរួមជាមមួយបក្ខពួកជាក្រុមសង្គមងងឹត ដៃម្ខាងចាប់ ដៃម្ខាងជួយ កំពុងស្ថិតនៅក្នុងគុកយ៉ាងបានសុវត្ថិភាព ។ អ្នកតាមដានរឿងក្តីនេះ បាននិយាយថាអ្នកទោសរូបនេះ ត្រូវបានចាប់ខ្លួនពីប្រទេសសិង្ហបូរីនាំមកកាត់ទោសនៅភ្នំពេញកំឡុងឆ្នាំ២០០៥ ។
ចែករំលែកព័តមាននេះ