ឃាត់ខ្លួនជនបរទេសដែលស្នាក់នៅ និងធ្វើការងារខុសច្បាប់១៩នាក់
រាជធានីភ្នំពេញ ៖ ជនបរទេសចំនួន១៩នាក់ ក្នុងនោះមានជនជាតិវៀតណាមចំនួន១៥នាក់ និងជនជាតិថៃចំនួន៤នាក់ ដែលបានលួចឆ្លងដែនចូលមកស្នាក់នៅ
រាជធានីភ្នំពេញ ៖ ជនបរទេសចំនួន១៩នាក់ ក្នុងនោះមានជនជាតិវៀតណាមចំនួន១៥នាក់ និងជនជាតិថៃចំនួន៤នាក់ ដែលបានលួចឆ្លងដែនចូលមកស្នាក់នៅ និងធ្វើការងារដោយខុសច្បាប់នៅក្នុងព្រះរាជាណាចក្រកម្ពុជា គ្មានលិខិតឆ្លងដែន និងប្រើប្រាស់ឯកសារមិនត្រឹមត្រូវ នៅក្នុងភូមិសាស្ត្រខណ្ឌពោធិ៍សែនជ័យ ត្រូវបានកម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយដ្ឋានអន្តោប្រវេសន៍ ធ្វើការស្រាវជ្រាវ និងចុះទៅធ្វើការឃាត់ខ្លួនបាន។
បន្ទាប់មកបានបញ្ជូនបន្តទៅធ្វើការសួរនាំនៅអគ្គនាយកដ្ឋានអន្តោប្រវេសន៍ ដែលមានទីតាំងស្ថិតនៅតាមបណ្ដោយមហាវិថីសហព័ន្ធរុស្ស៊ី មុខអាកាសយានដ្ឋាន អន្តរជាតិភ្នំពេញ ភូមិក្បាលដំរី សង្កាត់កាកាប ដើម្បីចាត់ការតាមច្បាប់។ ប្រតិបត្តិការនោះ បានធ្វើឡើងកាលពីវេលាម៉ោង៩និង៤០ព្រឹក ថ្ងៃទី២១ ខែមីនា ឆ្នាំ២០១៧ នៅក្នុងផ្ទះជួល ស្ថិតនៅក្នុងសិប្បកម្មកែច្នៃឈើមួយកន្លែង នៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ក្រោមការដឹកនាំដោយលោកឧត្តមសេនីយ៍ទោ អ៊ុក ហៃសីឡា ប្រធានាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ សហការណ៍ជាមួយកម្លាំងនគរបាលការិយាល័យ អន្តោប្រវេសន៍ នៃស្នងការនគរបាលរាជធានីភ្នំពេញ។
រួមជាមួយនគរបាលប៉ុស្ដិ៍ចោមចៅ ក្រោមការសម្របសម្រួលដោយលោក សៀង សុខ ព្រះរាជអាជ្ញារង អមសាលាដំបូងរាជធានីភ្នំពេញ។ នគរបាលខាងលើបានឲ្យដឹងថា ជនអន្តោប្រវេសន៍ដែលត្រូវបានកម្លាំងធ្វើការឃាត់ខ្លួននាពេលនេះមានជនជាតិវៀតណាមចំនួន១៥នាក់ គ្មានឯកសារត្រឹមត្រូវបានលួចឆ្លងដែន ស្នាក់នៅ និងប្រកបរបរដោយខុសច្បាប់ គ្មានលិខិតឆ្លងដែន និងប្រើប្រាស់ឯកសារមិនត្រឹមត្រូវ និងជនជាតិថៃចំនួន០៤នាក់ មានលិខិតឆ្លងដែន៤ក្បាល ប្រើប្រាស់ទិដ្ឋាការ (E) មានសុពលភាពត ប៉ុន្តែគ្មានសៀវភៅការងារទាំង០៤នាក់។
កម្លាំងនគរបាលនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយដ្ឋានអន្តោប្រវេសន៍ បានចុះធ្វើការស្រាវជ្រាវ ហើយចុះធ្វើការឃាត់ខ្លួនតែម្ដង។ ក្រោយពេលឃាត់បាន ធ្វើការត្រួតពិនិត្យឃើញថាខុសច្បាប់ទាំងអស់ ពួកគេត្រូវបានចាប់ខ្លួនពីបទលួចស្នាក់នៅ និងធ្វើការងារខុសច្បាប់ទើបបញ្ជូនទៅសាកសួរ និងរង់ចាំចាត់ការតាមច្បាប់៕
ចែករំលែកព័តមាននេះ