រាជធានីភ្នំពេញ៖ សេចក្តីរាយការណ៍ឱ្យដឹងថា មានការភ្ញាក់ផ្អើលមួយ កាលពីវេលាម៉ោង១១ និង២០នាទីព្រឹកថ្ងៃទី២១ មីនា នេះ បន្ទាប់ពីបានប្រទះឃើញរថយន្តមួយគ្រឿងដែលគេស្គាល់ថា ជារថយន្តរបស់ក្រុមជនសង្ស័យដែលទើបគាស់ផ្ទះ មកជិះប្លុងចោលនៅខាងក្រោយផ្សារទឹកថ្លា ស្ថិតក្នុងភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ ក្រោយពីជនសង្ស័យធ្វើសកម្មភាពគាស់ផ្ទះវីឡាមួយមួយកន្លែងក្នុងបុរីពិភពថ្មី ដោយយកទ្រព្យសម្បត្តិ គិតជាទឹកប្រាក់អស់ជាង៤ម៉ឺនដុល្លារ ។
ប្រភពឱ្យដឹងថា រថយន្តប្លុងចោលខាងលើ ម៉ាកកាមរី ពាក់ស្លាកលេខភ្នំពេញ 2P-1129 ពណ៌ខ្មៅ ដែលជនសង្ស័យមានគ្នា៤នាក់ ជិះក្នុងរថយន្តនេះ ហើយសុទ្ធតែជាជនជាតិស្បែកខ្មៅ ហើយក៏កំពុងគេចខ្លួនដែរ ។ រីឯផ្ទះកើតហេតុ ជាវីឡាភ្លោះ មានលេខ៤៧ មានម្ចាស់រងគ្រោះឈ្មោះម៉េង វ៉ាន់លី អាយុ៣៥ឆ្នាំ ជាអាជីករផ្សាររតនាប្លាហ្សា អះអាងថា បានបាត់គ្រឿងអលង្ការ មានដូចជាមាស១ដំឡឹង, ខ្សែ.ក២, ក្រវិល និងចិញ្ចៀនពេជ្រ ដែលគិតជាប្រាក់សរុបអស់ជាង៤ម៉ឺនដុល្លារឯណោះ ។
ប្រភពពីជនរងគ្រោះឱ្យដឹងទៀតថា មុនពេលកើតហេតុ ខ្លួនបានចេញពីផ្ទះ ដោយចាក់សោត្រឹមត្រូវ ។ លុះត្រឡប់មកផ្ទះវិញ ក៏ឃើញបុរស២នាក់មានស្ពាយសាក់កាដូផង បានដើរចេញពីចំហៀងផ្ទះគាត់ ។ ពេលនោះ គាត់សង្ស័យក៏មើលទៅផ្ទះ ក៏ដឹងថាមានចោរចូល ក៏ភ្ញាក់ផ្អើលតែម្តង ។ ពេលនោះ ជនសង្ស័យដឹងខ្លួន ក៏បានរត់ឡើងលើរថយន្តនោះ ដោយមានបក្សពួក២នាក់ទៀតចាំ ពេលនោះ ត្រូវសន្តិសុខក្នុងបុរី ក៏បានគប់ត្រូវកញ្ចក់រថយន្តបែក មុនពេលបើកគេចនោះ ។ លុះក្រោយមក រថយន្តនោះក៏ត្រូវឃើញយកទៅប្លុងចោលទៅវិញ ។
បច្ចុប្បន្ន សមត្ថកិច្ចកំពុងធ្វើការស្រាវជ្រាវរកចាប់ជនសង្ស័យយ៉ាងក្តៅបំផុត ។
ចែករំលែកព័តមាននេះ