អតីតប្រធានាធិបតីកូរ៉េខាងត្បូង លោកស្រី PARK GEUN HYE កាលពីថ្ងៃទី២១ មីនា បានសុំទោសចំពោះប្រទេសលោកស្រី ពេលលោកស្រីមកកាន់ទីតាំងអយ្យការដែលនៅទីនោះ លោកស្រីត្រូវសួរចម្លើយក្នុងក្របខណ្ឌនៃរឿងពុករលួយយ៉ាងធំមួយដែលឈានទៅដល់ការដកហូតតំណែងលោកស្រី ។
នៅមុខបណ្តាអ្នកកាសែតនាកាំជណ្តើរអគារអយ្យការលោកស្រី PARK GEUN HYE ថ្លែងថា ខ្ញុំមានការខកចិត្តខ្លួនឯងចំពោះមនុស្សគ្រប់គ្នា ។ ខ្ញុំនឹងរួមសហការយ៉ាងជិតស្និទ្ធជាមួយបណ្តាអ្នកស៊ើបអង្កេត ។
នេះជាអត្ថាធិប្បាយដំបូងដោយផ្ទាល់របស់លោកស្រី PARK ចំពោះសាធារណជនចាប់តាំងពីការដកហូតតំណែងលោកស្រីពីថ្ងៃទី១០ មីនា មក ។
លោកស្រីអតីតប្រធានាធិបតីអាយុ៦៥ឆ្នាំរូបនេះ ជាប់ចោទជាមួយមិត្តភក្តិចាស់ម្នាក់លោកស្រី CHOI SOON SIL ថា ធ្វើការគាបសង្កត់លើសហគ្រាសធំៗ ដើម្បីឱ្យសហគ្រាសទាំងនេះផ្តល់អំណាចដល់មូលនិធិ២ ដែលគាំទ្របណ្តាគម្រោងនយោបាយលោកស្រី ។
ក្រសួងវប្បធម៌កូរ៉េខាងត្បូងប្រកាសនាថ្ងៃទី២០ កុម្ភៈ ពីការលុបចោលអាជ្ញាប័ណ្ណដែលផ្តល់ឱ្យមូលនិធិទាំង២នេះ ។
លោកស្រី PARK ដែលបដិសេធរាល់សកម្មភាពខុសច្បាប់បានបាត់បង់អភ័យឯកសិទ្ធិប្រធានាធិបតីជាមួយការដកហូតតំណែងលោកស្រីដែលបែបនេះអាចឱ្យលោកស្រីអាចទទួលការកាត់ទោស ។ លោកស្រីអាចមានទោសជាប់គុកជាង១០ឆ្នាំ ប្រសិនបើរកឃើញថា លោកស្រីពិតជាទទួលសំណូកពីបណ្តាថៅកែនៃសហគ្រាសធំៗ ។ អ្នកគាំទ្រលោកស្រីជាច្រើនរយនាក់បានប្រមូលផ្តុំគ្នានាថ្ងៃទី២០ មីនា នៅមុខគេហដ្ឋានលោកស្រីស្ថិតនៅសង្កាត់ GANGHAM ក្រុងសេអ៊ូលដើម្បីចង់ឃើញលោកស្រីចាកចេញទៅកាន់អយ្យការ ៕
ចែករំលែកព័តមាននេះ