រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាអះអាងថា ក្នុងរយៈពេល២ទសវត្សរ៍ចុងក្រោយនេះ ការប្រើប្រាស់ប្រាក់រៀលបានកើនឡើងក្នុងអត្រាជាមធ្យម១៧%សម្រាប់វិស័យទេសចរណ៍ និង២៦%ក្នុងប្រព័ន្ធធនាគារនៅកម្ពុជា ។
ទេសាភិបាលរងធនាគារជាតិនៃកម្ពុជា លោកជំទាវ នាវ ច័ន្ទថាណា បានបញ្ជាក់ឲ្យដឹងក្នុងពិធីអបអរសាទរនៃការដាក់ឲ្យចរាចរប្រាក់រៀលឡើងវិញលើកទី៣៧ នាព្រឹកថ្ងៃទី២០ មីនា ថា ការកើនឡើងនូវការប្រើប្រាស់ប្រាក់រៀលនា២ទសវត្សរ៍ចុងក្រោយនេះ ដោយសារការជឿទុកចិត្តរបស់សាធារណជនមកលើប្រាក់រៀល ។ ជាក់ស្ដែង ការប្រើប្រាស់ប្រាក់រៀលនា២ទសវត្សរ៍ចុងក្រោយនេះបានកើនឡើង ។
យោងតាមលទ្ធផលអង្កេតរបស់ធនាគារជាតិនៃកម្ពុជា និងទីភ្នាក់ងារសហប្រតិបត្តិការអន្តរជាតិជប៉ុន (JICA) ទៅលើស្ថានភាពដុល្លារូបនីយកម្មនៅកម្ពុជា បង្ហាញថា ប្រាក់រៀលមានវិសាលភាពចរាចរណ៍នៅគ្រប់ទីកន្លែងនៃប្រទេសកម្ពុជា ដែលភាគច្រើនលើសលប់នៅតំបន់ជនបទ ខណៈប្រាក់ដុល្លារអាមេរិកមានវត្តមានច្រើននៅតំបន់ទីប្រជុំជន ពិសេសនៅរាជធានីភ្នំពេញ ។
លោកជំទាវបន្តថា ៖ « ការប្រើប្រាស់ប្រាក់រៀលមានសារសំខាន់ណាស់ចំពោះសង្គម និងសេដ្ឋកិច្ចជាតិទាំងមូល ។ ចំពោះសេដ្ឋកិច្ចជាតិវិញ ប្រាក់រៀលក៏បានពង្រឹងប្រសិទ្ធភាពនៃការអនុវត្តគោលនយោបាយរូបិយវត្ថុ និងគោលនយោបាយអត្រាប្ដូរប្រាក់ក្នុងគោលដៅរក្សាស្ថិរភាពថ្លៃ និងស្ថិរភាពម៉ាក្រូសេដ្ឋកិច្ចទាំងមូលផងដែរ » ។
លោកជំទាវបន្ថែមថា ៖ « តាមរយៈការប្រើប្រាស់ប្រាក់រៀលនៅបានរួមចំណែកជំរុញការវិនិយោគ និងបង្កើតការងារតាមរយៈឥទ្ធិពលនៃគោលនយោបាយរូបិយវត្ថុលើការបន្ទាបអត្រាការប្រាក់ទីផ្សារ ដែលជាកត្ដាកំណត់និន្នាការនៃប្រាក់សម្រាប់ការវិនិយោគ និងផលិតផល និងឈានទៅជំរុញឲ្យមានការបង្កើតការងារ » ។
លើសពីនេះទៀត ការប្រើប្រាស់ប្រាក់រៀល នឹងធ្វើឲ្យប្រទេសជាតិទទួលបានប្រាក់ចំណូលពីការបោះពុម្ព និងស្រូបយកនូវរូបនិយប័ណ្ណ ក៏ដូចការគរពូនជាទុនបម្រុងសម្រាប់ពង្រឹងជំនឿទុកចិត្តរបស់វិនិយោគិនលើវិស័យសេដ្ឋកិច្ចកម្ពុជាផងដែរ ។ សំខាន់ជាងនេះទៀត រាជរដ្ឋាភិបាលអាចអភិវឌ្ឍន៍ទីផ្សារសញ្ញាប័ណ្ណចារឹកជាប្រាក់រៀលដ៏រឹងមាំមួយ ដើម្បីគាំទ្រការផ្ដល់ហិរញ្ញប្បទានក្នុងការអភិវឌ្ឍហេដ្ឋារចនាសម្ព័ន្ធ និងការកាត់បន្ថយពីបរទេសតាមរយៈការកៀរគរមូលនិធិពីសាធារណជន ។
លោកជំទាវបន្តថា កំណើនជំនឿទុកចិត្តលើប្រាក់រៀលបានផ្ដល់សុទិដ្ឋិនិយមលើការលើកកម្ពស់ការប្រើប្រាស់ប្រាក់រៀលឲ្យកាន់តែទូលំទូលាយបន្ថែមទៀត ជាពិសេស គាំទ្រដោយវត្តមាននៃបុរេលក្ខខណ្ឌចម្បងៗ រួមមាន ទស្សនវិស័យវិជ្ជមានចំពោះកំណើនសេដ្ឋកិច្ច ក្នុងរយៈពេលមធ្យមជាមួយស្ថិរភាពម៉ាក្រូហិរញ្ញវត្ថុយ៉ាងរឹងមាំ ។ ដូចនេះហើយបានជារាជរដ្ឋាភិបាល និងធនាគារជាតិនៃកម្ពុជាបន្តគាំទ្រ និងលើកទឹកចិត្តដល់សាធារណជនទាំងអស់ប្រើប្រាស់ប្រាក់រៀលនៅក្នុងប្រតិបត្តិការសេដ្ឋកិច្ច និងហិរញ្ញវត្ថុ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា ការប្រើប្រាស់ប្រាក់រៀលពិតជាកើនឡើងក្នុងសេដ្ឋកិច្ចជាតិ ប៉ុន្តែមានកម្រិតនៅឡើយ ដែលបញ្ហានេះអាចជះឥទិ្ធពលមិនល្អដល់សេដ្ឋកិច្ចជាតិ ដោយសារសេដ្ឋកិច្ចកម្ពុជាប្រើប្រាស់ប្រាក់ដុល្លារ ពេលដុល្លារឡើងថ្លៃ នឹងធ្វើឲ្យទំនិញកម្ពុជាឡើងថ្លៃ និងប៉ះពាល់ដល់ការប្រកួតប្រជែងរបស់កម្ពុជា ។
លោកបន្តថា ៖ « មានការលើកឡើងពីផលប្រយោជន៍នៃការប្រើប្រាស់ប្រាក់ដុល្លារ ប៉ុន្តែក្នុងរយៈពេលវែង សេដ្ឋកិច្ចកម្ពុជាត្រូវពឹងផ្អែកលើប្រាក់រៀលដែលជាមូលដ្ឋាននៃសេដ្ឋកិច្ច និងជាមូលដ្ឋាននៃកំណើនសេដ្ឋកិច្ច និងមោទនភាពជាតិ » ។ លោកបន្តថា ៖ « បើគិតពីនិរន្តរភាពសេដ្ឋកិច្ច ផលប្រយោជន៍សេដ្ឋកិច្ច ទាមទារឲ្យប្រើប្រាស់ប្រាក់រៀលក្នុងសេដ្ឋកិច្ច ប៉ុន្តែទាមទារឲ្យមានការថ្លឹងថ្លែងផងដែរ ជាពិសេស បើជំរុញឲ្យប្រជាពលរដ្ឋប្រើប្រាស់ប្រាក់រៀល តើប្រាក់រៀលមានចំណុចពិសេសអ្វីទាក់ទាញគេ » ៕
ចែករំលែកព័តមាននេះ