រាជធានីភ្នំពេញ ៖ ការមកដល់របស់ភ្ញៀវទេសចរនៅឆ្នាំនេះ មានសញ្ញាល្អប្រសើរឡើងវិញ ដោយក្នុងរយៈពេល២ខែដើមឆ្នាំ កម្ពុជាទទួលបានភ្ញៀវទេសចរអន្តរជាតិជាង១លាននាក់ កើនឡើង១២,១% ធៀប
រាជធានីភ្នំពេញ ៖ ការមកដល់របស់ភ្ញៀវទេសចរនៅឆ្នាំនេះ មានសញ្ញាល្អប្រសើរឡើងវិញ ដោយក្នុងរយៈពេល២ខែដើមឆ្នាំ កម្ពុជាទទួលបានភ្ញៀវទេសចរអន្តរជាតិជាង១លាននាក់ កើនឡើង១២,១% ធៀបនឹងរយៈពេលដូចគ្នាកាលពីឆ្នាំមុន ។
យោងតាមរបាយការណ៍របស់ក្រសួងទេសចរណ៍បញ្ជាក់ថា ក្នុងរយៈពេលពីរខែដើមឆ្នាំនេះ កម្ពុជាទទួលបានភ្ញៀវទេសចរជាង១លាន៨ម៉ឺននាក់ ក្នុងនោះភ្ញៀវទេសចរចិនមានចំនួន១៧២.៤៣៨នាក់ កើនឡើង១៦% ។
ប្រធាននាយកដ្ឋានស្ថិតិទេសចរណ៍នៃក្រសួងទេសចរណ៍ លោក គង់ សុភារក្ស បានថ្លែងឲ្យដឹងតាមទូរស័ព្ទនាព្រឹកថ្ងៃទី១៧ មីនាថា ស្ថានភាពមកដល់របស់ភ្ញៀវទេសចរឆ្នាំនេះ ទំនងជាភ្ញៀវចិននាំមុខភ្ញៀវមកពីប្រទេសវៀតណាម ។ ជាទូទៅ ស្ថានភាពនៃការមកដល់របស់ភ្ញៀវឆ្នាំនេះមានភាពប្រសើរជាងឆ្នាំមុន ដោយសារកំណើនសេដ្ឋកិច្ចចិន និងបណ្តាប្រទេសក្នុងតំបន់ ដែលប្រទេសចិនបានជួយច្រើនលើការអភិវឌ្ឍហេដ្ឋារចនាសម្ព័ន្ធនានា ការភ្ជាប់ជើងហោះហើរកាន់តែច្រើន ការហោះហើរត្រង់ពីជប៉ុនមកកម្ពុជា និងការសម្រួលទិដ្ឋាការឲ្យភ្ញៀវចិន និងកូរ៉េអាចចេញចូលបានច្រើនដង ។
លោកបន្តថា ៖ « លោករំពឹងថា នៅដំណាច់ឆ្នាំនេះ កម្ពុជាអាចទទួលបានភ្ញៀវទេសចរចិនចំនួន១លាននាក់ ហើយតួលេខព្យាករណ៍ដោយក្រសួងរំពឹងថា កម្ពុជានឹងទទួលបានភ្ញៀវទេសចរសរុបចំនួន៥,៤លាននាក់នៅដំណាច់ឆ្នាំនេះ » ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា ថ្លែងថា វាជាសញ្ញាល្អមែនទែនសម្រាប់កម្ពុជា និងអ្នករកស៊ីក្នុងវិស័យនេះទាំងមូល ហើយវាឆ្លុះបញ្ចាំងថា ការខិតខំរបស់រាជរដ្ឋាភិបាល ជាពិសេស ក្រសួងទេសចរណ៍ ដែលបានស្វែងរកទីផ្សាររវាងស្ថាប័នរដ្ឋ និងឯកជនបានធ្វើឡើងដោយជោគជ័យ និងត្រឹមត្រូវ ។
លោកបន្តថា ៖ « ការមកដល់របស់ភ្ញៀវទេសចរច្រើននឹងជួយជំរុញកំណើនសេដ្ឋកិច្ច និងកាត់បន្ថយភាពក្រីក្ររបស់ប្រជាពលរដ្ឋបន្ថែមទៀត » ។ លោកបន្តថា ៖ « ការមកដល់របស់ភ្ញៀវចិនបាន១លាននាក់ឬអត់ យើងចាំមើលតួលេខរយៈពេល៦ខែសិន ប៉ុន្តែកម្ពុជាបានភ្ជាប់ជើងហោះហើរជាមួយអាកាសចរណ៍ចិនចំនួន៥ ហើយក្រុមហ៊ុនអាកាសចរណ៍ទាំងនោះបានបង្កើនជើងហោះហើរជាប្រចាំ ដែលធ្វើឲ្យយើងមានសុទិដ្ឋិនិយមថា នឹងទទួលបានភ្ញៀវ១លាននាក់ ព្រោះកាលពីឆ្នាំមុន កម្ពុជាទទួលបានភ្ញៀវចិនជិត៨០ម៉ឺននាក់រួចហើយ » ។
ទោះជាយ៉ាងណា លោក ហាក់ ហេង ប្រធានសមាគមមគ្គទេសក៍ទេសចរណ៍រាជធានីភ្នំពេញ ថ្លែងថា នៅឆ្នាំនេះ មគ្គទេសក៍ទេសចរណ៍នានាបានរអ៊ូរទាំពីការគ្មានភ្ញៀវ និងរយាលការងារច្រើន ប៉ុន្តែក្រសួងថា ភ្ញៀវកើនឡើង ។ លោកងឿងឆ្ងល់ផងដែរ មិនដឹងក្រសួងធ្វើស្ថិតិបែបណាទេ ។ លោកបន្តថា នៅរាជធានីភ្នំពេញ មិនសូវមានកន្លែងកម្សាន្តទេ គឺមានតែនៅរាជវាំង សារមន្ទីរជាតិ សារមន្ទីរប្រល័យពូជសាសន៍ទួលស្លែង និងជើងឯក ។ ដូច្នេះ ក្រសួង និងវិស័យឯកជន គួរវិនិយោគលើរមណីយដ្ឋានកែច្នៃឲ្យបានច្រើនដើម្បីទាក់ទាញភ្ញៀវមកកម្សាន្ត និងស្នាក់នៅយូរ ។
តាមរបាយការណ៍របស់ក្រសួងទេសចរណ៍បង្ហាញថា ភ្ញៀវទេសចរអន្តរជាតិ ដែលមកកម្ពុជាតាមអាកាសមានចំនួន៦២៩.៩២៧នាក់ ស្មើនឹង៦១,៤%នៃចំនួនសរុបកើនឡើង១៦,៥% ក្នុងនោះ ច្រកភ្នំពេញមានចំនួន២២៩.១៨៥នាក់ ស្មើនឹង២២,៣%នៃចំនួនសរុប កើនឡើង១៥,៥%។ ច្រកសៀមរាបមានចំនួន ៣៨៥.៤៥៩នាក់ ស្មើនឹង៣៧,៦%នៃចំនួនសរុប កើនឡើង១៣,៥% និងច្រកកងកេងមានចំនួន១៥.២៨៣នាក់ ស្មើនឹង១,៥% នៃចំនួនសរុប កើនឡើង៥៤៧,៣% ។
ចំណែកទីផ្សារទេសចរណ៍សំខាន់ៗទាំង១០ដែលមកកម្ពុជាក្នុងរយៈពេល២ខែដើមឆ្នាំនេះធៀបនឹង២ខែដើមឆ្នាំ២០១៦ រួមមាន ៖ ចិនជាប់ចំណាត់ថ្នាក់លេខ១ មានចំនួន១៧២.៤៣៨នាក់កើនឡើង១៦,៧%។ វៀតណាមជាប់លេខ២ មានចំនួន១៤១.៣៩៤នាក់ថយចុះ០,៩%។ កូរ៉េជាប់ចំណាត់ថ្នាក់លេខ៣ មានចំនួន១០១.៤៩៩នាក់ថយចុះ២,១% តាមពីក្រោយដោយថៃជាប់លេខ៤ មានចំនួន៦៨.៧៦៥នាក់កើនឡើង១៨,៨%។ ឡាវជាប់ចំណាត់ថ្នាក់លេខ៥ មានចំនួន៦៥.៦៧៥នាក់កើនឡើង៦៤,៥% ខណៈអាមេរិកឈរនៅលេខរៀងទី៦ មាន៥៦.១០២នាក់កើនឡើង១០,៥% ។ ចំណែកជប៉ុនជាប់ចំណាត់ថ្នាក់ទី៧ មានចំនួន៤០.៧២០នាក់កើនឡើង១៤,១% តាមពីក្រោយដោយបារាំងជាប់ចំណាត់ថ្នាក់លេខ៨ មានចំនួន៣៨.៥៧៣នាក់កើនឡើង១២,៧% និងអង់គ្លេសស្ថិតនៅលេខរៀងទី៩ មានចំនួន៣៧.៦២៣នាក់កើនឡើង១០,៦% ខណៈអាល្លឺម៉ង់ មានចំនួន៣៤.៥៧៨នាក់ កើនឡើង៨,២% ស្ថិតនៅលេខរៀងទី១០ ៕
ចែករំលែកព័តមាននេះ