ប្រភពព័ត៌មានផ្លូវការ និងព្រលានយន្តហោះរាយការណ៍ថា យន្តហោះមួយគ្រឿងដឹកមនុស្ស៤៥នាក់បានធ្លាក់ពេលចុះកាលពីថ្ងៃទី២០ មីនា នៅព្រលានយន្តហោះទីក្រុង WAU ភាគពាយ័ព្យស៊ូដង់ខាងត្បូង បណ្តាលឱ្យមនុស្សយ៉ាងតិច៣៧នាក់រងរបួស ។
រដ្ឋមន្ត្រីព័ត៌មានរបស់រដ្ឋ WAU លោក BONA GAUDENSIO ថ្លែងប្រាប់ AFP ថា រថយន្តសង្គ្រោះបានដឹកអ្នកដំណើរភាគច្រើនពីព្រលានយន្តហោះទៅកាន់មន្ទីរពេទ្យ ។ អ្នកដំណើរ៣៧នាក់ត្រូវបញ្ជូនទៅកាន់មន្ទីរពេទ្យទទួលការព្យាបាលដំបូង ។ ទោះបីយ៉ាងណា រដ្ឋមន្ត្រីរូបនេះពុំបាននិយាយពីមនុស្ស៨នាក់ទៀតថានឹងក្លាយទៅជាយ៉ាងណាឡើយ ប៉ុន្តែអះអាងថា គ្រោះថ្នាក់នេះពុំបណ្តាលឱ្យមនុស្សណាម្នាក់ស្លាប់ឡើយ ។
យោងតាមលោក PAUL CHARLES វិស្វករប្រចាំព្រលានយន្តហោះម្នាក់ ព្រមទាំងលោក LAWRENCE YUNISEN អ្នកកាសែតម្នាក់នៃវិទ្យុក្នុងស្រុក VOICE OF HOPE ដែលទាក់ទងតាមទូរស័ព្ទជាមួយ AFP ថា មនុស្សមួយចំនួនអាចរត់ចេញដោយខ្លួនឯងពីយន្តហោះ ។ លោក CHALES និយាយថា ការធ្លាក់យន្តហោះរបស់ក្រុមហ៊ុនអាកាសចរណ៍ស៊ូដង់ខាងត្បូង SOUTH SUPREME AIRLINES អាចបណ្តាលមកពីលក្ខខណ្ឌឧតុនិយមលំបាក ។ ពេលចុះគេពុំអាចមើលអ្វីឃើញច្បាស់ ហើយយន្តហោះចុះពីខាងកើតមកខាងលិច ហើយធ្លាក់នៅចុងផ្លូវ ។
ធាតុអាកាសនាពេលនោះពុំអាចមើលឃើញច្បាស់ ទើបយន្តហោះធ្លាក់ ។ ខ្ញុំគិតថា អ្នកបើកមើលផ្លូវចុះពុំច្បាស់ ។ លោកបន្តថា មនុស្សមួយចំនួនបានរត់ចុះពីយន្តហោះដោយខ្លួនឯង រួចអ្នកខ្លះទៀតត្រូវបានទាញយកចេញ ។ មានតែផ្នែកខាងក្រោយទេ ដែលនៅសល់ ហើយក្រៅពីនេះត្រូវភ្លើងឆេះអស់ ។
លោក GABRIEL NGANG នាយកក្រុមហ៊ុន SOUTH SUPREME AIRLINES គូសបញ្ជាក់ប្រាប់ AFP ថា ក្នុងយន្តហោះនេះមានអ្នកដំណើរ៤០នាក់ និងសមាជិកក្រុមយានិក៥នាក់ ។ លោកបញ្ជាក់ថា យន្តហោះនេះធ្វើការហោះហើររវាងរដ្ឋធានី JUBA និងទីក្រុង WAU ក៏ប៉ុន្តែពុំនិយាយពីស្ថានភាពនៃគ្រោះថ្នាក់នេះឡើយ ៕
ចែករំលែកព័តមាននេះ