ការសង្ស័យពុលស្រាសផឹកកំដរបុណ្យសព ស្លា.ប់បន្តបន្ទាប់3នាក់ ដឹកចូលពេទ្យ11នាក់
ខេត្តកំពង់ចាម ៖ នៅតំបន់ដាច់ស្រយាលមួយ ក្នុងភូមិពូទុង ឃុំចុងផ្លាស ស្រុកកែវសីមា ខេត្តមណ្ឌលគិរី កំពុងបង្កការភ្ញាក់ផ្អើល
ខេត្តកំពង់ចាម ៖ នៅតំបន់ដាច់ស្រយាលមួយ ក្នុងភូមិពូទុង ឃុំចុងផ្លាស ស្រុកកែវសីមា ខេត្តមណ្ឌលគិរី កំពុងបង្កការភ្ញាក់ផ្អើល
ខេត្តកំពង់ចាម ៖ នៅតំបន់ដាច់ស្រយាលមួយ ក្នុងភូមិពូទុង ឃុំចុងផ្លាស ស្រុកកែវសីមា ខេត្តមណ្ឌលគិរី កំពុងបង្កការភ្ញាក់ផ្អើល ខណៈប្រជាពលរដ្ឋចំនួន៣នាក់បានស្លាប់បន្តបន្ទាប់សង្ស័យពុលស្រា បន្ទាប់ពីអ្នកភូមិទាំងនោះផឹកស្រាកំដរបុណ្យសព ហើយក៏មានអ្នកភូមិចំនួន១១នាក់ផ្សេងទៀត ត្រូវបានដឹកតាមរថយន្តមកសង្គ្រោះនៅមន្ទីរពេទ្យខេត្តកំពង់ចាមទាំងវេលាអធ្រាត្រថ្ងៃទី១៨ មីនា ។ ដោយមានការអន្តរាគមន៍ពីគ្រូពេទ្យ បានធ្វើឱ្យអ្នកពុលស្រាដែលនាំមកសង្គ្រោះនោះបានធូរស្រាលនិងវិលទៅរកសុខភាពជាប្រក្រតីឡើងវិញ ។
លោក ភួង គីមសាន អាយុ៣៧ឆ្នាំ បានប្រាប់ឱ្យដឹងថាកាលពីព្រឹកថ្ងៃទី១៥ មីនាឪពុករបស់គាត់ឈ្មោះ ភួង តាក់ អាយុ៥៨ឆ្នាំ បានពិសាស្រាសលក់តាមផ្ទះតៀមដែលគេបានលក់នៅក្នុងភូមិក៏ស្រវឹងធ្លាក់ភ្នែក ។ លុះពេលដើរត្រឡប់មកផ្ទះវិញ ក៏មានអាការៈមិនស្រួលខ្លួនហៅកូនៗឱ្យកោសខ្យល់ឱ្យ នៅតែមិនបានស្រួលខ្លួនទេ ហើយ១ម៉ោងក្រោយមកក៏បានហៅគ្រូពេទ្យឯកជនឱ្យមកជួយដាក់សេរ៉ូមឱ្យ ក៏មិនមានការប្រែប្រួលសោះ ហើយកម្លាំងក៏ចេះតែថមថយជាលំដាប់ ។
លោក ភួង គីមសាន ជាកូនបានប្រាប់បន្តថា គាត់ចេះតែព្រួយបារម្ភ ក៏បានហៅគ្រូពេទ្យម្នាក់ទៀតមកពិនិត្យមើល និងបានស្ទាបជីពចរស្ទើរលែងមានចលនាហើយភ្នែកទាំងពីរឡើងល្អក់ ។ លុះនៅវេលាម៉ោង១០និង៣០នាទីព្រឹកឪពុកលោកក៏ស្លាប់ ទើបសង្ស័យពុលស្រា ។ បន្ទាប់មកបានរៀបចំធ្វើបុណ្យតាមប្រពៃណី ។ នៅយប់នោះមានសាច់ញាតិជិតខាង ជាច្រើននាក់បានមកចូលរួមបុណ្យសព ហើយជាទម្លាប់ក៏បានទិញស្រាសយកមកផឹកកំដរបុណ្យ និងទិញបន្ថែមទុក៤លីត្រ ហើយនៅព្រឹកថ្ងៃទី១៦ មីនា បានដង្ហែសពយកទៅបូជា ។
អ្នកភូមិម្នាក់ឈ្មោះ ម៉ិច ដែលបានហូបស្រានៅផ្ទះបុណ្យក៏បានធ្លាក់ខ្លួនឈឺធ្ងន់ ក្អួតចង្អោរមិនបានយកទៅសង្គ្រោះទាន់ទេ ក៏បានស្លាប់នៅម៉ោង១២និង៣០នាទីថ្ងៃត្រង់ និងមានការសង្ស័យពុលស្រាដែរ ។ នៅកន្លែងបូជាសព ក៏មានការទិញស្រាមកចែកគ្នាផឹកម្នាក់បន្តិចៗ ក្រោយមកឈ្មោះ ណាល់ ក៏មានអាការៈមិនស្រួលខ្លួនសង្ស័យពុលស្រា ដឹកតាមរថយន្តមកសង្គ្រោះនៅមន្ទីរពេទ្យខេត្តមណ្ឌលគិរីតែម្តង ។
ចំណែកអ្នកផ្សេងទៀត ដែលបានឃើញសភាពបែបនេះ ក៏មានអារម្មណ៍រន្ធត់មិនស្រួលតាមគ្នីគ្នា នឹងបានប៉ាវរថយន្តដឹកមកសង្គ្រោះនៅមន្ទីរពេទ្យខេត្តកំពង់ចាមទាំងយប់ថ្ងៃទី១៧ មីនា រហូតមកដល់វេលាម៉ោង៣ទៀបភ្លឺឈានចូលព្រឹកថ្ងៃទី១៨ មីនា ឈ្មោះ ណាល់ ភេទប្រុស អាយុប្រហែល៣៥ឆ្នាំ ក៏បានស្លាប់ទៀត ។
ស្ត្រីឈ្មោះ ប៉ែន រក្សា ជាអ្នកសង្ស័យពុលស្រាម្នាក់បានប្រាប់ឱ្យដឹងថា គាត់បានផឹកស្រាសចំនួន២កូនកែវនៅថ្ងៃទី១៦ មីនា នៅផ្ទះរបស់ខ្លួនដែលគាត់បានទិញពីគេលក់នៅក្បែរផ្ទះ ។
មួយថ្ងៃក្រោយពីផឹក គាត់បានក្អួតនិងស្រវាំងភ្នែកក៏បានឱ្យម៉ូតូឌុបជិះគ្នា២នាក់នាំមកកាន់ពេទ្យខេត្តមណ្ឌលគិរី នឹងបានដឹកមកសង្គ្រោះបន្ទាន់នៅមន្ទីរពេទ្យខេត្តកំពង់ចាម ដោយគ្រូពេទ្យបានដាក់សេរ៉ូមដើម្បីបន្សាបជាតិពុល គាត់បានមើលឃើញជាធម្មតាវិញលែងស្រវាំងភ្នែក ។ ស្ត្រីរូបនេះមានប្តីឈ្មោះ ញឹប ម៉ិច ដែលពុលស្រាស្លាប់ត្រូវបញ្ចុះនៅព្រឹកថ្ងៃទី១៨ មីនា ដោយគាត់មិនបាននៅធ្វើបុណ្យសពប្តីផងដែរ ។
លោកវេជ្ជបណ្ឌិត យិន ស៊ីណាត ប្រធានមន្ទីរពេទ្យខេត្តកំពង់ចាមមានប្រសាសន៍ឱ្យដឹងដែរថា ចំពោះប្រជាពលរដ្ឋប្រុសស្រីចំនួន១១នាក់ដែលបានសង្ស័យពុលស្រា កំពុងតែទទួលការសង្គ្រោះនៅមន្ទីរពេទ្យខេត្ត គឺត្រូវបានលើកលែង មិនតំរូវឱ្យបង់ប្រាក់នោះទេ គឺមន្ទីរពេទ្យជាអ្នកចំណាយទាំងអស់ ធ្វើយ៉ាងណាឱ្យពលរដ្ឋរួចផុតពីគ្រោះថ្នាក់ដល់អាយុជីវិត ។
តាមប្រភពព័ត៌មានពីខេត្តមណ្ឌលគិរីនៅថ្ងៃ១៩ មីនា បានឱ្យដឹងថា ទាក់ទិននឹងព័ត៌មានសង្ស័យពុលស្រានេះ មិនទាន់មានការបញ្ជាក់ពីមន្ត្រីជំនាញនៃមន្ទីរសុខាភិបាលខេត្តនៅឡើយទេ ដោយក្រុមមន្ត្រីជំនាញកំពុងដុតដៃដុតជើងចុះស្រាវជ្រាវជុំវិញការស្លាប់នេះ ៕
ចែករំលែកព័តមាននេះ