រដ្ឋមន្ត្រីការពារប្រទេសអីុស្រាអែល លោក AVIGDOR LIEBERMAN បានព្រមានកាលពីថ្ងៃទី១៩ មីនា ថា កងយន្តហោះអីុស្រាអែលនឹងកម្ទេចបណ្តាប្រព័ន្ធការពារអាកាសស៊ីរី ប្រសិនបើកងទ័ពរបស់លោកបាចា អាល់អាសាដ បាញ់មីស៊ីលជាថ្មី ប្រឆាំងបណ្តាយន្តហោះអីុស្រាអែល ដែលធ្វើប្រតិបត្តិការនៅស៊ីរី ។
ក្នុងសេចក្តីថ្លែងការណ៍មួយតាមវិទ្យុជាតិ លោក LIEBERMAN ព្រមានថា នាពេលខាងមុខ ប្រសិនបើពួកស៊ីរី ប្រើប្រាស់ប្រព័ន្ធការពារអាកាសប្រឆាំងយន្តហោះយើងនោះ យើងនឹងកម្ទេចប្រព័ន្ធទាំងនេះ ដោយពុំមានការរារែកឡើយ ។
រដ្ឋមន្ត្រីរូបនេះ បានធ្វើការព្រមានបែបនេះបន្ទាប់ពីការវាយឆ្មក់តាមអាកាសមួយរបស់អុីស្រាអែលកាលពីថ្ងៃទី១៧ មីនា នៅស៊ីរី ប្រឆាំងការផ្ទេរអាវុធមួយដែលអុីស្រាអែលថា ឱ្យដល់ពួកហេសប៊ុលឡាហ៍ លីបង់ ។ ការវាយប្រហារនេះញ៉ាំងឱ្យមានការតបតវិញតាមរយៈការបាញ់មីស៊ីលរបស់ស៊ីរីប្រឆាំងយន្តហោះអុីស្រាអែលមួយគ្រឿង តែមីស៊ីលនេះ ត្រូវស្ទាក់កម្ទេច ។
កងទ័ពស៊ីរីអះអាងថា បានបាញ់ធ្លាក់យន្តហោះអុីស្រាអែលមួយគ្រឿងហើយបាញ់ត្រូវមួយគ្រឿងទៀត តែអុីស្រាអែលបានបដិសេធ ។
នេះជាការប៉ះទង្គិចគ្នាធ្ងន់ធ្ងរមួយរវាងប្រទេសទាំង២ តាំងពីចាប់ផ្តើមជម្លោះនៅស៊ីរីពីខែមីនា ឆ្នាំ២០១១មក ។
រដ្ឋមន្ត្រីការពារប្រទេសអីុស្រាអែលបន្តថា រាល់លើកពេលយើងកំណត់ដឹងពីការផ្ទេរអាវុធរបស់ស៊ីរី ទៅកាន់លីបង់នោះយើងនឹងធ្វើសកម្មភាពដើម្បីរារាំង ។ រឿងនេះនឹងគ្មានការសម្របសម្រួលណាមួយឡើយ ។ ពួកស៊ីរីត្រូវតែយល់ថា ពួកគេជាអ្នកទទួលខុសត្រូវលើការផ្ទេរអាវុធឱ្យដល់ពួកហេសប៊ុលឡាហ៍ ហើយបើដរាបណាបន្តធ្វើនោះយើងនឹងត្រូវបញ្ចេញប្រតិកម្មដែលយើងត្រូវធ្វើ ៕
ចែករំលែកព័តមាននេះ