រដ្ឋមន្ត្រីការពារប្រទេសអាល្លឺម៉ង់ លោកស្រី URSULA VON DER LEYEN កាលពីថ្ងៃទី១៩ មីនា បានបដិសេធការអះអាងរបស់ប្រធានាធិបតីអាមេរិក លោកដូណាល់ ត្រាំ ដែលថា អាល្លឺម៉ង់ត្រូវចំណាយប្រាក់យ៉ាងច្រើនដល់អូតង់ និងសហរដ្ឋអាមេរិក ដែលផ្តល់កិច្ចការពារយ៉ាងខ្លាំង ហើយចំណាយប្រាក់យ៉ាងច្រើន ។ ការទាមទារនេះធ្វើឡើងតាមរយៈសារ TWITTER របស់ប្រធានាធិបតីសហរដ្ឋអាមេរិកប៉ុន្មានម៉ោង ក្រោយជួបពិភាក្សាជាមួយអធិការបតី អាល្លឺម៉ង់ លោកស្រីអេនហ្សឺឡា ម័រកែល កាលពីថ្ងៃទី១៧ មីនា នៅក្រុងវ៉ាស៊ីនតោន ។
លោកស្រី URSULA VON DER LEYEN ក្នុងសេចក្តីប្រកាសមួយដកស្រង់ដោយរ៉យទ័រថ្លែងថា គ្មានគណនីណាមានដាក់ប្រាក់បំណុលក្នុងផ្ទៃអូតង់ឡើយ ។
លោកស្រីបញ្ជាក់ថា ទិសដៅប្រកាសដោយលោកស្រីម័រកែល បង្កើនថវិកាយោធាអាល្លឺម៉ង់២%នៃផលទុនជាតិ សរុបនឹងពុំមែនសម្រាប់តែបង់ឱ្យអូតង់ឡើយ ។ ការចំណាយខាងកិច្ចការពារក៏នឹងត្រូវផ្តោតផងដែរដល់បេសកកម្មរបស់យើងនៅអឺរ៉ុប ព្រមទាំងការរួមចំណែករបស់យើងប្រយុទ្ធប្រឆាំងភេរវកម្មរបស់ក្រុមរដ្ឋអ៊ិស្លាម ។ គ្រប់គ្នាចង់ចែករំលែកអម្រែកដោយស្មើភាព ។ ក៏ប៉ុន្តែដើម្បីឱ្យវាទៅរួចទស្សនាទានទំនើបមួយនៃសន្តិសុខគឺចាំបាច់ ។ វារួមបញ្ចូលទាំងអូតង់ផង ក៏ប៉ុន្តែសម្រាប់កិច្ចការពារអឺរ៉ុប ព្រមទាំង អ.ស.ប ផងដែរ ។
ថវិកាយោធាអាល្លឺម៉ង់ត្រូវមានរហូតដល់៣៨,៥ពាន់លានអឺរ៉ូក្នុងឆ្នាំ២០១៨ ពោល១,៤ពាន់លានអឺរ៉ូ លើសថវិកាបច្ចុប្បន្ន ។ ក្នុងឆ្នាំ២០១៦ ការចំណាយខាងយោធារបស់អាល្លឺម៉ង់តំណាងឱ្យ១,១៨%នៃផលទុនជាតិសរុប ។
ក្នុងសន្និសីទសារព័ត៌មានរួមមួយជាមួយលោកត្រាំ លោកស្រីម័រកែល ថ្លែងថា បច្ចុប្បន្នយើងសន្យាទិសដៅបង្កើនថវិកាយោធា២% នៃផលទុនជាតិសរុបរហូតដល់ឆ្នាំ២០២៤៕
ចែករំលែកព័តមាននេះ