រាជធានីភ្នំពេញ ៖ ស្នូរផ្ទុះអាវុធចំនួន៥គ្រាប់បានបន្លឺឡើងយ៉ាងរន្ទឺពេញមេឃ បន្ទាប់ពីបុរសម្នាក់ខឹងប្រពន្ធរបស់ខ្លួនទៅផឹកស៊ីនៅផ្ទះអ្នកជិតខាង ស្រាប់តែយកកាំភ្លើង AK ចេញពីក្នុងរថយន្តបាញ់រះឡើងលើតែម្តង ដែលហេតុការណ៍នេះ បង្កការភ្ញាក់ផ្អើលនៅវេលាម៉ោង០៥ និង៤០នាទីល្ងាចថ្ងៃទី១៩ មីនា ស្ថិតនៅចំណុចផ្ទះលេខ២៦៤ ក្នុងបុរីសម្បត្តិមានហេង ក្រុមទី១ ភូមិតាង៉ៅ សង្កាត់និរោធ ខណ្ឌច្បារអំពៅ ។
ប្រភពឱ្យដឹងថា បុរសជាជនបង្កឈ្មោះស្វាយ ពិសិដ្ឋ អាយុ៣៤ឆ្នាំ ជាមន្ត្រីនគរបាលនៃនាយកដ្ឋានមួយ ចំណុះឱ្យអគ្គនាយកដ្ឋានអត្តសញ្ញាណកម្ម បច្ចុប្បន្នមានទីលំនៅកន្លែងកើតហេតុ ។
ប្រភពបន្តថា មុនពេលកើតហេតុ ស្ត្រីជាប្រពន្ធ (ពុំទាន់ស្គាល់ឈ្មោះ) ត្រូវអ្នកជិតខាងហៅទៅហូបចុកបន្តិចបន្តួច ។ ស្របពេលនោះ បុរសជាប្តីបានជិះរថយន្តមួយគ្រឿងម៉ាក High Lander ពណ៌.ស មិនចាំស្លាកលេខមកដល់ផ្ទះ (ប្រពន្ធពេលឃើញប្តីមកដល់ ទើបរត់មកផ្ទះវិញ) ។
ភ្លាមៗនោះ ប្តីបានសួរទៅប្រពន្ធថា «មានបានផឹកស្រាឬអត់?» ។ ប្រពន្ធតបទៅប្តីថា «ផឹកតែបន្តិចបន្តួចប៉ុណ្ណោះ» ។ ក្រោយមក ប្តីបានរត់ទៅបើកទ្វាររថយន្តទាញកាំភ្លើង AK មួយដើមមកបាញ់រះ នៅមុខផ្ទះរបស់ខ្លួន៥គ្រាប់ ទៅលើវេហា ដើម្បីបញ្ចេញកំហឹង។ ក្រោយការបាញ់រះ ជនបង្កបានបើករថយន្តចេញទៅបាត់ស្រមោលតែម្តង ។
ស្ត្រីជាប្រពន្ធរៀបរាប់ថា ខ្លួនពិតជាត្រូវបានអ្នកជិតខាងបបួលទៅញ៉ាំនៅផ្ទះពួកគេពិតប្រាកដមែន ប៉ុន្តែខ្លួនមិនបានផឹកច្រើននោះទេ គឺផឹកស្រាតែបន្តិចបន្តួចប៉ុណ្ណោះ ។ នាងបន្តថា នាងមិនសូវចេះផឹកឡើយ ពេលអ្នកជិតខាងហៅ នាងក៏មិនចង់ចូលរួមដែរ ប៉ុន្តែដោយនឹកឃើញថា ជាអ្នកជិតខាងគ្នាទើបទៅចូលរួមញ៉ាំបន្តិចទៅ ប៉ុន្តែចង្រៃអ្វីស្របពេលនោះ បុរសជាប្តីបានមកដល់ ស្របពេលដែលនាងកំពុងផឹកជជែកលេងនៅផ្ទះរបស់គេ ក៏កើតចិត្តខឹងសម្បារ ហើយស្ទុះទាញ AK បាញ់រះ បង្កឱ្យមានការភ្ញាក់ផ្អើលឡើង
តែម្តង ។
បច្ចុប្បន្ន កម្លាំងនគរបាលកំពុងស្រាវជ្រាវរកជនសង្ស័យ ដើម្បីផ្តន្ទាទោសតាមច្បាប់ ខណៈជននោះ កំពុងគេចខ្លួន ។
ចែករំលែកព័តមាននេះ