ទីភ្នាក់ងារព័ត៌មានផ្លូវការកូរ៉េខាងជើង KCNA រាយការណ៍កាលពីថ្ងៃទី១៩ មីនា ថា ប្រទេសកូរ៉េខាងជើងបានធ្វើការសាកល្បងម៉ូទ័រកាំជ្រួចថ្មីមានសុក្រិតភាពខ្ពស់ដោយមានវត្តមានរបស់លោកគីម ជុងអ៊ុន ។
KCNA ដកស្រង់សម្តីលោកគីម ជុងអ៊ុន ដែលគូសបញ្ជាក់នាឱកាសនោះថា ពិភពលោកនាពេលឆាប់ៗខាងមុខនឹងយល់ពីអត្ថន័យនៃជ័យជម្នះជាប្រវត្តិសាស្ត្រដែលយើងសម្រេចបានពេលនេះ ។ មានន័យថា ក្រុងព្យុងយ៉ាងបន្តិចទៀតអាចមានកាំជ្រួចថ្មីមួយ ដែលអាចបញ្ជូនបណ្តាផ្កាយរណបទៅកាន់តារាវិថី ។
KCNA បន្តថា ការអភិវឌ្ឍន៍ និងការបង្កើតម៉ូទ័រមានកម្លាំងរុញច្រានខ្លាំងជំនាន់ថ្មីនឹងជួយពង្រឹងបណ្តាមូលដ្ឋានវិទ្យាសាស្ត្រ និងបច្ចេកវិទ្យាដែលនឹងអាចឱ្យយើងឈានទៅទទួលបានកម្រិតពិភពលោកថ្មីនៃកាំជ្រួចបាញ់បង្ហោះផ្កាយរណប ព្រមទាំងអន្តរាគមន៍ក្នុងទីអវកាស ។
ទោះបីយ៉ាងណាម៉ូទ័រសម្រាប់កាំជ្រួចទាំងនេះអាចប្រើយ៉ាងងាយស្រួលសម្រាប់បំពាក់ឱ្យបណ្តាមីស៊ីល ហើយអ្នកសង្កេតការណ៍ជាច្រើនយល់ឃើញម្យ៉ាងទៀតថា កម្មវិធីរបស់កូរ៉េខាងជើងខាងផ្នែកបាញ់បង្ហោះផ្កាយរណបគ្រាន់តែជាស្លឹកទំពាំងបាយជូរមួយ ដែលយកមកបិទបាំងការពិត ពោលគឺការសាកល្បងក្នុងវិស័យយោធាប៉ុណ្ណោះ ។
ការសាកល្បងនេះធ្វើឡើង ខណៈដែលរដ្ឋមន្ត្រីការបរទេសថ្មីអាមេរិក លោក REX TILLERSON មកកាន់ទីក្រុងប៉េកាំង កាលពីថ្ងៃទី១៨ មីនា បន្ទាប់ពីលោកទៅកាន់ប្រទេសជប៉ុន និងកូរ៉េខាងត្បូងក្នុងក្របខណ្ឌនៃដំណើរទស្សនកិច្ចមួយរបស់លោកនៅអាស៊ី ។ ប្រមុខការទូតអាេមរិកបានទទូចលើប្រការដែលថា សហរដ្ឋអាមេរិកនឹងមិនប្រកាន់យកនយោបាយអត់ធ្មត់យុទ្ធសាស្ត្រ ដែលក្រុងវ៉ាស៊ីនតោន ធ្លាប់អនុវត្តពី មុនរៀងមកចំពោះ របបក្រុងព្យុងយ៉ាងដែលលោកយល់ថា នយោបាយនេះត្រូវបរាជ័យឡើយ ។ ចំពោះ បញ្ហានេះលោកគូសបញ្ជាក់ថា ប្រតិបត្តិការយោធាអាមេរិកមួយនឹងជាជម្រើសមួយនៅលើតុ ។
សេចក្តីថ្លែងការណ៍នេះរបស់លោក TILLERSON មានគោលបំណងបញ្ចេញប្រតិកម្មតបចំពោះការសាកល្បងនុយក្លេអ៊ែរ២លើករបស់ក្រុងព្យុងយ៉ាងនាឆ្នាំ២០១៦ និងការបាញ់សាកល្បងនាពេលថ្មីៗនេះនៃបណ្តាមីស៊ីលបាលីស្ទិករបស់កូរ៉េខាងជើង ដែលការបាញ់សាកល្បងទាំងនេះត្រូវបានកូរ៉េខាងជើងចាត់ទុកថា ធ្វើមុនការវាយប្រហារជាយថាហេតុលើបណ្តាមូលដ្ឋានយោធាអាមេរិកនៅជប៉ុន ៕
ចែករំលែកព័តមាននេះ