រាជធានីភ្នំពេញ ៖ ក្រសួងទេសចរណ៍ បានធ្វើការប្រកាសឱ្យភ្ញៀវទេសចរ និងអ្នកដែលបានឃើញទិដ្ឋភាពនោះ មកថតរូបសែលហ្វីប្រកួតប្រជែងឱ្យបានច្រើនដោយអះអាងថា រូបថតដែលស្អាត និងទាក់ទាញនឹងទទួលបានរង្វាន់ពិសេសពីក្រសួងទេសចរណ៍ ។
រាជធានីភ្នំពេញ ៖ ក្រសួងទេសចរណ៍ បានធ្វើការប្រកាសឱ្យភ្ញៀវទេសចរ និងអ្នកដែលបានឃើញទិដ្ឋភាពនោះ មកថតរូបសែលហ្វីប្រកួតប្រជែងឱ្យបានច្រើនដោយអះអាងថា រូបថតដែលស្អាត និងទាក់ទាញនឹងទទួលបានរង្វាន់ពិសេសពីក្រសួងទេសចរណ៍ ។
តាមសេចក្ដីប្រកាសរបស់ក្រសួងទេសចរណ៍បានស្នើឱ្យភ្ញៀវទេសចរទាំងជាតិ និងអន្តរជាតិ ចូលរួមទស្សនាទិដ្ឋភាពថ្ងៃរះនៅលើកំពូលកណ្ដាលរបស់ប្រាសាទអង្គរឱ្យបានច្រើនកុះករ ។ ដោយអព្ភូតហេតុថ្ងៃរះ នៅចំកំពូលប្រាសាទអង្គរជាថ្មីទៀតហើយ នៅចន្លោះព្រឹកថ្ងៃទី២០ និង២១ មីនា ចាប់ពីម៉ោង០៥ ដល់ម៉ោង៧ព្រឹក ។
ដូច្នេះ សម្រាប់អ្នកចូលចិត្តថតរូប និងថតសែលហ្វីអាចចូលរួមក្នុងព្រឹត្តិការណ៍ឈ្មោះថា «សែលហ្វី(Selfie)អង្គរអច្ឆរិយៈ»។ សេចក្ដីប្រកាសបានស្នើឱ្យអ្នកទៅឃើញទិដ្ឋភាពនោះ បញ្ជូនរូបសែលហ្វីដែលមានភ្ជាប់ជាមួយនឹងរូបថ្ងៃរះចំកំពូលប្រាសាទ មកកាន់ហ្វេសប៊ុកផេករបស់ក្រសួង ឬផ្ញើមកកាន់ www.facebook.com/cambodiamot ដោយគ្រាន់តែបញ្ជាក់ឈ្មោះ និងលេខទូរស័ព្ទ គឺជាការស្រេច ។
ជាមួយគ្នានោះ មន្ត្រីទទួលបន្ទុកលើការប្រកួតប្រជែងនេះ បានថ្លែងប្រាប់ថា នេះជាឱកាសជួយឱ្យអ្នកចូលចិត្តថតរូបសែលហ្វីសប្បាយចិត្ត ហើយក៏ដើម្បីឱ្យទិដ្ឋភាពថ្ងៃរះ នៅលើកំពូលប្រាសាទអង្គរ មានការផ្សព្វផ្សាយទូលំទូលាយផង ។ លោកថាព្រឹត្តិការណ៍ត្រូវបានបង្កើតឡើងយ៉ាងជោគជ័យកាលពីលើកទី១ ដោយការប្រកួតសម្រាប់លើកទី២នេះ ត្រូវបានគាំទ្រយ៉ាងពិសេស ដោយអាជ្ញាធរអប្សរា គ្រឹះស្ថានអង្គរ និងសហភាពសហព័ន្ធយុវជនកម្ពុជា ។
រូបសែលហ្វីណា ទទួលបានចំនួន Like និង Share ច្រើនជាងគេ នឹងត្រូវកំណត់ថា ជារូបដែលឈ្នះរង្វាន់ប្រចាំឆ្នាំ ។ ក្រសួងប្រកាសថា រូបថតសែលហ្វី មានអ្នកចូលចិត្តច្រើនជាងគេ នឹងទទួលបានប័ណ្ណសរសើរ អមដោយទឹកប្រាក់១លានរៀល ឬ២៥០ដុល្លារ ចំណាត់ថ្នាក់លេខ២ ទទួលបាន៨០ម៉ឺនរៀល ស្មើនឹង២០០ដុល្លារ និងចំណាត់ថ្នាក់លេខ៣ ទទួលបាន៥០ម៉ឺនរៀល ស្មើនឹងជាង១២៥ដុល្លារ៕
ចែករំលែកព័តមាននេះ