ទីក្រុងឡុងដ៍ ៖ ទិន្នន័យបានបង្ហាញកាលពីថ្ងៃពុធថា អត្រាគ្មានការងាររបស់អង់គ្លេសបានធ្លាក់មកកម្រិតទាបបំផុតក្នុងរយៈពេលជាង៤១ឆ្នាំមកនេះ ប៉ុន្តែការធ្លាក់ចុះនៃអត្រានេះបានធ្វើឲ្យការលូតលាស់ប្រាក់បៀវត្សអន់ថយផងដែរ ។
ការិយាល័យស្ថិតិជាតិរបស់ប្រទេសនេះបាននិយាយក្នុងសេចក្តីថ្លែងការណ៍មួយថា អត្រាគ្មានការងារក្នុងត្រីមាសដែលបានបញ្ចប់នៅថ្ងៃទី ៣១ មករា បានធ្លាក់ពី៤,៨%ក្នុងរយៈពេល៣ខែចុងក្រោយនៃឆ្នាំ២០១៦ មកត្រឹម៤,៧% ។
ការិយាល័យខាងលើនិយាយថា ៖ « អត្រាគ្មានការងារបានធ្លាក់មកត្រឹម៤,៧% ក្នុងរយៈពេល៣ខែចុងក្រោយមកដល់ខែមករា ឆ្នាំ ២០១៧ ។ អត្រានេះគឺទាប បើគិតតាំងពីខែមិថុនា ឆ្នាំ១៩៧៥ មកម្ល៉េះ » ។
លោក Howard Archer សេដ្ឋវិទូរបស់អង់គ្លេសបានថ្លែងនិយាយថា ៖ « ទីផ្សារការងារកំពុងតែប្រសើរឡើង ដែលបង្ហាញពីភាពរឹងមាំរបស់សេដ្ឋកិច្ចក្នុងអំឡុងឆមាសទី២ ឆ្នាំ២០១៦ » ។ លោកបន្ដថា ៖ « ប៉ុន្តែការអន់ថយនៃការលូតលាស់ប្រាក់ចំណូលបានជំរុញឲ្យមានការកាត់បន្ថយការចំណាយ ព្រោះតែការកើនឡើងនៃអតិផរណា ហើយវាអាចនឹងប៉ះពាល់ដល់សកម្មភាពសេដ្ឋកិច្ចផងដែរ » ។
វាកើតឡើងបន្ទាប់ពីលោកស្រីនាយករដ្ឋមន្ត្រី Theresa May មានគោលបំណងដកខ្លួនចេញពី EU នៅចុងខែមីនា ។ លោក Archer និយាយថា ៖ « ទីផ្សារការងារត្រូវបានជួយដោយភាពរឹងមាំរបស់សេដ្ឋកិច្ចដែលបន្តមានឡើងតាំងពីការបោះឆ្នោត Brexit មក ប៉ុន្តែបង្ហាញសញ្ញាថា អតិថិជនកំពុងតែដាក់កំហិតលើការចំណាយរបស់ពួកគេ ដែលធ្វើឲ្យមានជំនឿថា ឆ្នាំ២០១៧ នឹងជាឆ្នាំមិនល្អសម្រាប់សេដ្ឋកិច្ច និងទីផ្សារការងារ » ។
លោកបន្ថែមថា ៖ « ការលើកឡើងពីមាត្រា៥០ ដោយភ្លាមៗនឹងធ្វើឲ្យពិបាកចរចាជាមួយ EU ។ ដូច្នេះ ពួកយើងនឹងមើលឃើញអត្រាគ្មានការងារចាប់ផ្តើមកើនឡើង ហើយគិតថា អត្រានេះអាចនឹងឡើងដល់៥,១% នៅចុងឆ្នាំ២០១៧ » ។
អ្នកវិភាគសង្ឃឹមថា ធនាគារជាតិរបស់ប្រទេសនេះនឹងរក្សាអត្រាការប្រាក់ទាបស្មើ ០,២៥% ហើយនឹងមិនផ្លាស់ប្តូរកម្មវិធីរបស់ពួកគេ សម្រាប់ជួយដល់សេដ្ឋកិច្ចចក្រភពអង់គ្លេសក្នុងអំឡុងដំណើរការចាកចេញ ៕
ចែករំលែកព័តមាននេះ