ប្រទេសម៉ាឡេស៊ី ៖ កាលពីថ្ងៃពុធ លោក Mah Siew Keong រដ្ឋមន្ត្រីឧស្សាហកម្មដាំដុះនិងផលិតផលបានថ្លែងថា ម៉ាឡេស៊ី ដែលជាប្រទេសផលិតប្រេងដូងដ៏ធំមួយបានប្រឆាំងដាច់ខាតលើសេចក្តីសម្រេចរបស់
ប្រទេសម៉ាឡេស៊ី ៖ កាលពីថ្ងៃពុធ លោក Mah Siew Keong រដ្ឋមន្ត្រីឧស្សាហកម្មដាំដុះនិងផលិតផលបានថ្លែងថា ម៉ាឡេស៊ី ដែលជាប្រទេសផលិតប្រេងដូងដ៏ធំមួយបានប្រឆាំងដាច់ខាតលើសេចក្តីសម្រេចរបស់សហភាពអឺរ៉ុប (EU) ចំពោះផលិតផលនេះ ។
លោកបន្ដថា សេចក្តីសម្រេចនេះលើកឡើងពីតម្រូវការសម្រាប់សញ្ញាបត្ររួមមួយដែលនឹងធានាថា មានតែអ្នកផលិតប្រេងដូងប្រកបដោយភាពស្វ័យទ្រទ្រង់ប៉ុណ្ណោះ ដែលត្រូវបានអនុញ្ញាតឲ្យចូលក្នុងទីផ្សារ EU ។
សេចក្តីសម្រេចនឹងត្រូវដាក់ឲ្យសម្រេចនាខែមេសាខាងមុខ រួមមានការតម្រូវឲ្យបិទស្លាកផលិតផល មានន័យថា ប្រេងដូងដែលត្រូវបានផលិតដោយស្វ័យទ្រទ្រង់ទាំងនោះ ត្រូវឆ្លងកាត់ការវេចខ្ចប់ដោយមានបច្ចេកវិទ្យាខ្ពស់ ។
លោក Mah និយាយថា ម៉ាឡេស៊ីប្រឆាំងយ៉ាងខ្លាំងនឹងសេចក្តីសម្រេចនេះ ព្រោះវានឹងបង្កឲ្យប៉ះពាល់ដល់ការនាំចូលប្រេងដូងទៅកាន់ EU ក៏ដូចជាប៉ះពាល់សេដ្ឋកិច្ចម៉ាឡេស៊ីទាំងមូល ។
លោកបន្តថា បច្ចុប្បន្ននេះ EU គឺជាទីផ្សារធំជាងគេសម្រាប់ប្រេងដូង និងផលិតផលប្រើប្រាស់ប្រេងដូងរបស់ម៉ាឡេស៊ី ដែលការនាំចេញក្នុងឆ្នាំ២០១៦ មានតម្លៃដល់ទៅ២,២៥ប៊ីលានដុល្លារឯណោះ ។
លោកនិយាយថា តម្រូវការសម្រាប់ការវេចខ្ចប់បានដាក់គោលដៅតែលើផលិតផលប្រេងដូង ហើយវាអាចត្រូវបានចាត់ទុកថា ខុសនឹងវិធានការរបស់អង្គការពាណិជ្ជកម្មពិភពលោកផងដែរ។ ទោះជាយ៉ាងណា លោកអះអាងថា ក្រសួងលោកនឹងបន្តសហការជាមួយដៃគូក្នុង EU ។
នេះគឺផ្សេងពីការផ្តួចផ្តើមគំនិតធ្វើឲ្យសមាជិកក្នុងសហភាពអឺរ៉ុបមកធ្វើទស្សនកិច្ចក្នុងចម្ការដូងប្រេង ដើម្បីអប់រំពួកគេពីការដាំដុះដ៏មានស្វ័យទ្រទ្រង់ក្នុងវិស័យដូងប្រេងរបស់ម៉ាឡេស៊ី ។
យោងតាមលោករដ្ឋមន្ត្រីរូបនេះ ម៉ាឡេស៊ីនឹងសហការជាមួយប្រទេសឥណ្ឌូណេស៊ី ក្រោមក្រុមប្រឹក្សាប្រទេសផលិតដូងប្រេង (CPOPC) ដើម្បីលើកតម្កើងការអភិវឌ្ឍបរិស្ថាន និងការអភិវឌ្ឍស្វ័យទ្រទ្រង់វិស័យដូងប្រេងពីការចូលរួមដល់សេដ្ឋកិច្ច ការកាត់បន្ថយភាពក្រីក្រ និងកង្វះជីវជាតិផងដែរ ៕
ចែករំលែកព័តមាននេះ