រាជធានីភ្នំពេញ ៖ សាជីវកម្មខ្នាតតូច និងមធ្យមកូរ៉េមានបំណងចាប់ដៃគូជាមួយសហគ្រាសនៅកម្ពុជា ។ នេះបើយោងតាមកិច្ចព្រមព្រៀងមួយដែលធ្វើឡើងកាលពីល្ងាចថ្ងៃទី១៥ មីនា នៅសម្ព័ន្ធសមាគមសហគ្រាសធុនតូច
រាជធានីភ្នំពេញ ៖ សាជីវកម្មខ្នាតតូច និងមធ្យមកូរ៉េមានបំណងចាប់ដៃគូជាមួយសហគ្រាសនៅកម្ពុជា ។ នេះបើយោងតាមកិច្ចព្រមព្រៀងមួយដែលធ្វើឡើងកាលពីល្ងាចថ្ងៃទី១៥ មីនា នៅសម្ព័ន្ធសមាគមសហគ្រាសធុនតូច និងមធ្យមកម្ពុជា ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាបានថ្លែងបន្ទាប់ពីចុះហត្ថលេខានៅថ្ងៃទី១៥ មីនា ថា សាជីវកម្មខ្នាតតូច និងមធ្យមកូរ៉េ មានបំណងជួយសម្របសម្រួលវិនិយោគិនដែលមានបំណងចង់វិនិយោគរវាងប្រទេសទាំងពីរ និងជំរុញការធ្វើពាណិជ្ជកម្មទ្វេភាគីឲ្យកាន់តែធំ ជាពិសេស គឺការជំរុញគាំទ្រនាំផលិតផលខ្មែរនៅទីផ្សារកូរ៉េ ។ លោកបន្តថា សម្រាប់កម្ពុជាជួយគាំទ្រដល់វិនិយោគិនពីកូរ៉េ ដែលមានបំណងចង់វិនិយោគនៅកម្ពុជា ឬចង់ចាប់ដៃគូសហការជាមួយសហ គ្រាសក្នុងស្រុក និងការផ្លាស់ប្តូរព័ត៌មានគ្នាទៅវិញទៅមក ធ្វើយ៉ាងណា ឲ្យការធ្វើអាជីវកម្មប្រទេសទាំងពីរគ្រប់ជ្រុងជ្រោយ ។
លោក លីម ជេអ៊ុន (Lim Chae-Un) ប្រធានសាជីវកម្មខ្នាតតូច និងមធ្យមកូរ៉េ បានថ្លែងបញ្ជាក់ដែរថា សហគ្រាសកូរ៉េនឹងជួយបណ្តុះបណ្តាលបច្ចេកវិទ្យាដល់សមាជិកសម្ព័ន្ធសមាគមសហគ្រាសធុនតូច និងមធ្យមកម្ពុជា ហើយពេលនោះ អាចផលិតផលិតផលពាក់កណ្តាលសម្រេចពីកម្ពុជានាំចេញទៅកូរ៉េ ។ លោកបន្តថា ភាគីកូរ៉េបានរឹតចំណងមិត្តភាពរវាងវិស័យឯកជនរបស់ប្រទេសកម្ពុជា និងបង្កើនកិច្ចសហការសេដ្ឋកិច្ចឲ្យបានខ្លាំងក្លាជាងមុនលើផ្នែកអាជីវកម្មប្រទេសទាំងពីរ ។
ភាគីទាំងពីរនឹងផ្តោតលើការធ្វើយ៉ាងណា ឲ្យសហគ្រាសធុនតូច និងមធ្យមនៅកម្ពុជា អាចផលិតនូវផលិតផលដែលមានគុណភាពខ្ពស់ និងអស់ថ្លៃដើមផលិតទាប ។ ជំរុញសហគ្រាសធុនតូច និងមធ្យមនៅកម្ពុជា ធ្វើជាអ្នកផ្គត់ផ្គង់ផលិតផលពាក់កណ្តាលសម្រេចសម្រាប់ផ្គត់ផ្គង់ដល់សហគ្រាសកូរ៉េបាន ។
នៅកម្ពុជាមានសហគ្រាសតូចបំផុត ខ្នាតតូច និងខ្នាតមធ្យមចំនួនជាង៥៣ម៉ឺនសហគ្រាស ក្នុងនោះ៩០%ជាសហគ្រាសខ្នាតតូចបំផុត ខ្នាតតូច និងប្រមាណ១០%ជាសហគ្រាសខ្នាតមធ្យម និងខ្នាតធំ ៕
ចែករំលែកព័តមាននេះ