រាជធានីភ្នំពេញ ៖ នៅរសៀលថ្ងៃសៅរ៍ ទី១៨ មីនា ប្រដាល់អន្តរជាតិរបស់ខារ៉ាបាវនៅលើសង្វៀនទូរទស្សន៍អាស៊ីអាគ្នេយ៍ ដល់ថ្ងៃប្រកួតផ្ដាច់ព្រ័ត្រជាផ្លូវការហើយ ដោយកីឡាករកម្ពុជាឡុង សុវណ្ណឌឿន និងកីឡាករឡាវនឹងត្រូវប៉ះគ្នានៅវគ្គនេះ ។ សមាសភាពដែលឡើងប្រកួតនៅក្នុងថ្ងៃពិសេសនេះ សុទ្ធតែបានអះអាងថា ត្រៀមខ្លួនម៉ត់ចត់ដោយសារតែការប្រកួតដណ្ដើមខ្សែក្រវាត់អន្តរជាតិចុងក្រោយ ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ក្រុមហ៊ុនភេសជ្ជៈខារ៉ាបាវវគ្គ២នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដងបើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករទាំងខាងកម្ពុជា និងខាងបរទេសសុទ្ធតែមានកម្រិតល្អ ហើយមើលទៅម្នាក់ៗបញ្ចេញថ្វីដៃគួរឱ្យទាក់ទាញរៀងខ្លួន ។ កីឡាករកម្ពុជា និងឡាវ ២រូបរួមមាន ជើងខ្លាំង ឡុង សុវណ្ណឌឿន និងកីឡាករឡាវ Thav Uolan នឹងក្លាយជាគូប្រកួតស៊ីសាច់ហុតឈាមនៅវគ្គចុងក្រោយ ដើម្បីប្រជែងគ្នាធ្វើជាម្ចាស់ខ្សែក្រវាត់អន្តរជាតិរបស់ភេសជ្ជៈខារ៉ាបាវ ក្រោយពីព្រឹត្តិការណ៍នេះបើកប្រកួតអស់ជាច្រើនខែ ។ ម្នាក់ៗសុទ្ធតែជឿជាក់លើសមត្ថភាពរៀងខ្លួន ដើម្បីឱ្យការបើកប្រកួតឈានដល់គោលដៅរៀងខ្លួន ។ កីឡាករកម្ពុជាត្រូវបានអះអាងថាសម្ងំហ្វឹកហាត់មិនខុសគ្នានោះទេ ដោយសារតែចង់គ្រងតំណែងជាម្ចាស់ខ្សែក្រវាត់អន្តរជាតិខារ៉ាបាវ និងទទួលបានប្រាក់លានអមដោយកិត្តិយសមុខមាត់។
ទោះបីយ៉ាងណា គេមិនទាន់ដឹងថា កីឡាករណាមួយនឹងមានលទ្ធភាពនៅវគ្គចុងក្រោយនេះទេ ដោយសារតែគូភាគីទាំងសងខាងសុទ្ធតែបានត្រៀមទុកពីចម្ងាយដូចគ្នា បើទោះជាឡុង សុវណ្ណឌឿន ក៏ត្រូវខាងខ្មែរជឿថាបានកាន់ខ្សែក្រវាត់ ហើយកីឡាករឡាវក៏ត្រូវអ្នកដឹកនាំជាជនជាតិថៃអះអាងថានឹងបានខ្សែក្រវាត់នោះដូចគ្នា ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា និងឡាវ ជើងខ្លាំង២រូបខាងលើនឹងបើកឆាកប្រយុទ្ធនៅថ្ងៃសៅរ៍នេះ ក្នុងព្រឹត្តិការណ៍ដណ្ដើមខ្សែក្រវាត់ជើងឯកខារ៉ាបាវ ។ កីឡាករ ឡុង សុវណ្ណឌឿន មកពីក្លិបសាលវ័ន្តកីឡា ប៉ះប្រកួតជាមួយកីឡាករឡាវThav Uolanក្នុងនាមជាគូដណ្ដើមខ្សែក្រវាត់អន្តរជាតិ ។ កីឡាករ Thav Uolan ធ្លាប់ប្រកួត៦៤លើក ឈ្នះ៦២លើក និងចាញ់២លើក ក្នុងពេលកីឡាករកម្ពុជាឆ្លងកាត់ការប្រកួត៩៩លើក ឈ្នះ៨៤លើក ចាញ់១០លើក និងស្មើ៥លើក ។ ក្រុមអ្នកគាំទ្របានយល់ឃើញថា កីឡាករកម្ពុជានឹងឈ្នះការប្រកួត ដោយសារតែផ្អែកលើប្រវត្តិប្រកួត គឺកីឡាករកម្ពុជាល្អជាង តែកីឡាករឡាវក៏បានប្រកាសថាមិនខ្លាចចំពោះប្រវត្តិនោះដែរ បើទោះជាធ្លាប់ចាញ់ពិន្ទុកីឡាករឡុង សុវណ្ណឌឿន ម្ដងនៅវគ្គសន្សំពិន្ទុក្ដី ។
នៅថ្ងៃនោះក៏មានការប្រកួតមិត្តភាពរវាងកីឡាករកម្ពុជា និងថៃ២នាក់ជាលក្ខណៈមិត្តភាពផងដែរ ។ កីឡាករ ឃីម ឌីម៉ា លោក ញាណ សុធី ថា គេត្រូវឡើងប្រកួតជាមួយកីឡាករថៃឈ្មោះ Khon Krongthep ។
ឆ្លងកាត់ការប្រកួតកន្លងមក កីឡាកររូបនេះនៅមិនទាន់ច្បាស់ថានឹងបានឈ្នះ ឬយ៉ាងណានោះទេ ដោយសារតែគូប្រកួតដែលបានឡើងក្នុងវគ្គនេះក៏សុទ្ធតែខ្លាំងមិនធម្មតា ។ លោកថា កីឡាករថៃ ធ្លាប់ប្រកួត៦៩លើក ឈ្នះ៦២លើក និងចាញ់៧លើក ក្នុងពេលកីឡាករកម្ពុជាធ្លាប់ប្រកួតបានដល់៩១លើក ឈ្នះ៧១លើក ចាញ់១២លើក និងស្មើ២លើក ទើបលោករំពឹងថាបទពិសោធន៍ល្អជាងរបស់កីឡាករកម្ពុជានៅតែឈ្នះសម្រាប់វគ្គនេះ ដោយសារតែការប្រកួតនាពេលកន្លងមកធ្លាប់បានឈ្នះផងចាញ់ផងជាមួយថៃ ។ ទោះបីយ៉ាងណា គេនៅមិនទាន់ប្រាកដថា សមត្ថភាពរបស់កីឡាករកម្ពុជានឹងអាចយកឈ្នះលើគូប្រកួតនៅថ្ងៃស្អែកទេ ក្នុងពេលកីឡាករថៃក៏មិនមែនធម្មតាបែបនេះ បើផ្អែកទាំងកម្លាំង បច្ចេកទេស និងសមត្ថភាពក្នុងពេលប៉ះគ្នាលើកមុន ។ ម្នាក់ៗបានត្រឹមចាំមើលការប្រកួតមួយនេះប៉ុណ្ណោះ ក្នុងពេលដែលកីឡាករកម្ពុជា ក៏ចង់ឈ្នះមិនអាចចាញ់ ហើយកីឡាករថៃក៏ចង់ឈ្នះមិនអាចចាញ់ដូចគ្នា ៕
ចែករំលែកព័តមាននេះ