ខេត្តប៉ៃលិន ៖ បន្ទាប់ពីអាកាសធាតុក្តៅខ្លាំងស្ទើររលាកស្បែកមនុស្សអស់រយៈពេលជាយូរថ្ងៃកន្លងមករហូតដល់រសៀលថ្ងៃទី១៣ មីនា ផ្ទៃមេឃចាប់ផ្តើមខ្មៅអួរអាប់បង្កជាភ្លៀងលាយខ្យល់កន្ត្រាក់ប៉ើងដំបូលផ្ទះប្រជាពលរដ្ឋនៅភូមិសំបូរ ហៅភូមិអាចម៍ ឃុំសាលាក្រៅ ស្រុកសាលាក្រៅ អស់ចំនួន១២ខ្នងរងការខូចខាតធ្ងន់ធ្ងរចំនួន៣ខ្នង និងនៅរសៀលថ្ងៃទី១៤ មីនា ភ្លៀងលាយខ្យល់កន្ត្រាក់បន្តប៉ើងដំបូលផ្ទះប្រជាពលរដ្ឋនៅភូមិថ្មី សង្កាត់ទួលល្វា ក្រុងប៉ៃលិន ចំនួន៥ខ្នង រងការខូចខាតធ្ងន់ធ្ងរ១ខ្នង ។
ប្រភពព័ត៌មានពីលោក សូ កង នាយកប្រតិបត្តិសាខាកាកបាទក្រហមខេត្តបានឱ្យដឹងថា គ្រោះធម្មជាតិដោយសារភ្លៀងលាយឡំនឹងខ្យល់កន្ត្រាក់បានធ្វើឱ្យប៉ើងដំបូលផ្ទះប្រជាពលរដ្ឋ នៅភូមិសំបូរ ឃុំសាលាក្រៅ ស្រុកសាលាក្រៅ អស់ចំនួន១២ខ្នង លុះរំលងរយៈពេល១ថ្ងៃ ស្រាប់តែភ្លៀងលាយខ្យល់កន្ត្រាក់ដដែលបានបក់បោកមកពីទិសខាងកើត ចំផ្ទះប្រជាពលរដ្ឋនៅភូមិថ្មី សង្កាត់ទួលល្វា ក្រុងប៉ៃលិន បណ្តាលឱ្យប៉ើងដំបូលផ្ទះអស់ចំនួន៥ខ្នងក្នុងនោះធ្ងន់ធ្ងរ១ខ្នង ។
លោកបន្តទៀតថា ករណីគ្រោះធម្មជាតិនេះមិនបណ្តាលឱ្យមានអ្នកណាមួយទទួលរងគ្រោះថ្នាក់ដល់អាយុជីវិតនោះឡើយគ្រាន់តែអំបែងដំបូលផ្ទះប៉ើងធ្លាក់ត្រូវស្ត្រីម្នាក់នៅភូមិថ្មីរងរបួសស្រាល ។ ចំណែកឯដើមស្វាយបានត្រូវបុកប៉ើងបាក់អស់ជាច្រើន និងដួលសង្កត់ទៅលើផ្ទះប្រជាពលរដ្ឋផងដែរ ។ លោកបញ្ជាក់ថា ដូច្នេះសូមឱ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ ខណៈភ្លៀងឬខ្យល់ខ្លាំងសូមឱ្យរកកន្លែងជ្រកឱ្យបានស្រួលបួល ហើយត្រូវដកឌុយទូរទស្សន៍ចេញផងដែរដើម្បីជៀសវាងទទួលរងការខូចខាតដោយសាររន្ទះបាញ់ ។
សូមបញ្ជាក់ផងដែរថា នៅឆ្នាំ២០១៧នេះករណីភ្លៀងលាយខ្យល់កន្ត្រាក់ ទើបតែវាយប្រហារមកលើខេត្តប៉ៃលិនជាលើកទី១ ហើយចំពោះករណីរន្ទះបាញ់ស្លាប់មនុស្សសត្វមិនទាន់មាននៅឡើយទេក៏មិនចង់ឱ្យកើតមានទៅលើមនុស្សសត្វណាមួយដែរ ៕
ចែករំលែកព័តមាននេះ