ខេត្តកណ្តាល ៖ ប្រជាពលរដ្ឋដែលរកស៊ីដឹកផ្លែស្វាយតាមម៉ូតូយកទៅលក់នៅប្រទេសវៀតណាម ត្រូវភាគីខាងវៀតណាមឃាត់មិនឲ្យចូលក៏នាំគ្នាចតម៉ូតូរាប់រយគ្រឿងពាសពេញផ្លូវ បណ្តាលឲ្យកកស្ទះនៅតំបន់ច្រកទ្វារព្រំដែនអន្តរជាតិក្អមសំណ នៅរសៀលថ្ងៃទី១៤ ខែមីនា ឆ្នាំ២០១៧ ស្ថិតក្នុងភូមិក្អមសំណ ឃុំក្អមសំណ ស្រុកលើកដែក រយៈពេលជាង២ម៉ោងទើបនាំគ្នាដកថយ។ ប្រជាពលរដ្ឋបានលើកឡើងថា ពួកគាត់ទាំងអស់គ្នាសុទ្ធតែជាអ្នករស់នៅក្នុងឃុំក្អមសំណនេះ ហើយមានមុខរបរដឹកផ្លែស្វាយតាមម៉ូតូយកទៅលក់នៅប្រទេសជិតខាងគ្រាន់បានសល់ប្រាក់ចំណេញបន្តិចបន្តួចសម្រាប់ផ្គត់ផ្គង់គ្រួសារ តែបែរជាត្រូវភាគីខាងសមត្ថកិច្ចវៀតណាមឃាត់មិនឲ្យពួកគាត់នាំកសិផលរបស់ខ្មែរចូល ដោយអះអាងថា មានសារធាតុគីមី។
រីឯទំនិញគ្រប់ប្រភេទដូចជា ផ្លែឈើ ទឹកកក ថែមទាំងទូកបូមខ្សាច់របស់ជនជាតិវៀតណាមឡើងមកបូមរហូតចូលដល់ដីខ្មែរដោយសេរី មិនដែលមានឃើញមានសមត្ថកិច្ចអាជ្ញាធរពាក់ពន្ធ័នៃច្រកទ្វារមួយនេះសហការគ្នាទប់ស្កាត់នោះទេ។ ពលរដ្ឋលើកឡើងទៀតថា ភាគីសមត្ថកិច្ចខាងវៀតណាមបានឃាត់ពួកគាត់មិនឲ្យនាំផ្លែស្វាយទៅលក់នៅប្រទេសគេនេះរយៈពេលមួយសប្តាហ៍ហើយ រហូតធ្វើឲ្យផ្លែស្វាយរបស់ពួកគាត់ទុំរលួយខូចខាតស្ទើរទាំងស្រុងទៅហើយ ទើបពួកគាត់មួរម៉ៅក្តៅក្រហាយនាំគ្នាចតម៉ូតូទុកចោលពេញផ្លូវតែម្តង។
ពលរដ្ឋបញ្ជាក់ទៀតថា កន្លងមកពួកគាត់ខ្លះគ្រាន់តែដឹកស្វាយចូលទៅត្រូវសមត្ថកិច្ចវៀតណាមចាប់ឃាត់ចាក់ផ្លែស្វាយរបស់ពួកគាត់ចោល ហើយថែមទាំងយកកាំភ្លើងភ្ជង់គំរាមធ្វើឲ្យពួកគាត់ភ័យរត់ចោលម៉ូតូ រហូតដល់តែសមត្ថកិច្ចខាងខ្មែរយើងចូលទៅដោះស្រាយបង់លុយឲ្យភាគីវៀតណាមអស់ចំនួន៣លានដុង ទើបឲ្យម៉ូតូមកវិញ ហើយរហូតមកដល់ពេលនេះនៅម៉ូតូពួកគាត់៣គ្រឿងទៀតមិនទាន់ដោះស្រាយ ដោយសារអត់លុយបង់ឲ្យគេ។ ទោះយ៉ាងណាប្រជាពលរដ្ឋទាំងនោះសូមសំណូមពរដល់អាជ្ញាធរសមត្ថកិច្ចច្រកព្រំដែនមួយនេះ ពិសេសលោកបណ្ឌិត ម៉ៅ ភិរុណ អភិបាលខេត្តកណ្តាលមេត្តាជួយរកដំណេះស្រាយជូនពួកគាត់ផង។
បន្ទាប់ពីពលរដ្ឋខឹងខាងភាគីវៀតណាមបិទមិនឲ្យម៉ូតូដឹកផ្លែស្វាយរបស់ពួកគាត់ចូលចតម៉ូតូពេញផ្លូវបានរយៈពេលប្រហែល២ម៉ោង ទើបគេឃើញលោក សុទ្ធសាវឿន ប្រធានស្នាក់ការប្រចាំច្រកទ្វារក្អមសំណ និងសមត្ថកិច្ចពាក់ព័ន្ធច្រកមួយនេះចុះទៅសម្របសម្រួលជាមួយពលរដ្ឋដោយសន្យាថា នឹងចូលទៅជួបពិភាក្សាជាមួយភាគីវៀតណាមរកដំណោះស្រាយជូនពួកគាត់ភ្លាមៗ ទើបពួកគាត់ធូរកំហឹងព្រមរំសាយបែកផ្លូវគ្នា។ លោកប្រធានស្នាក់ការបន្តទៀតថា ពាក់ពន្ធ័រឿងនេះរូបលោកក៏បានសហការណ៍ជាមួយសមត្ថកិច្ចគ្រប់ស្ថាប័នចូលទៅដោះស្រាយជាមួយភាគីវៀតណាមច្រើនលើកច្រើនសារហើយ តែគេលើកឡើងថាផ្លែឈើរបស់យើងមានជាតិគីមី។
ចំពោះការនាំចូលទំនិញរបស់ជនជាតិវៀតណាម លោកប្រធានស្នាក់ការប្រាប់ថា ធ្វើមិនបានដោយសារមានការយោគយល់គ្នារវាងឃុំ និងឃុំ ស្រុក និងស្រុក ខេត្ត និងខេត្ត កាលណាយើងធ្វើនាំឲ្យប៉ះពាល់។ ប្រជាពលរដ្ឋ បានរិះគន់យ៉ាងខ្លាំងទៅលើលោក លក្ខ័ សុគុណ មេឃុំក្អមសំណថា អស្ថិរភាពក្នុងការបម្រើសេវាសាធារណៈជូនប្រជាពលរដ្ឋដោយគិតតែពីផលប្រយោជន៍រឿងប៉ុណ្ណឹង ហើយមិនឃើញចេញមុខជួយដោះស្រាយឲ្យពួកគាត់ទេ៕
ចែករំលែកព័តមាននេះ