ភ្លៀងកក់ខែលាយឡំនឹងខ្យល់កន្ត្រាក់ បំផ្លាញផ្ទះ២០ខ្នងដំណាំតាង៉ែនជាង៤៥០ដើម
ខេត្តបាត់ដំបង ៖ លំនៅឋានប្រជាពលរដ្ឋយ៉ាងតិច២០ខ្នង និងដំណាំតាង៉ែនជាង៤៥០ដើម បានរងការខូចខាតដោយសារប៉ះទង្គិចខ្យល់កន្ត្រាក់
ខេត្តបាត់ដំបង ៖ លំនៅឋានប្រជាពលរដ្ឋយ៉ាងតិច២០ខ្នង និងដំណាំតាង៉ែនជាង៤៥០ដើម បានរងការខូចខាតដោយសារប៉ះទង្គិចខ្យល់កន្ត្រាក់ ដែលលាយឡំនឹងភ្លៀងកក់ខែ កាលពីល្ងាចថ្ងៃទី១៣ មីនា ដែលប៉ះទៅលើឃុំចំនួន២ ក្នុងស្រុកកំរៀង តែមិនបង្កឲ្យមានគ្រោះថ្នាក់មនុស្សទេ។ អធិការស្រុកកំរៀង លោក គឹម ពន្លក បានឲ្យដឹងថា ខ្យល់កន្ត្រាក់ដែលមានលាយឡំរលឹមតិចតួច បានបោកបក់ទៅលើភូមិផ្លូវ៦ ឃុំតាក្រី ខូចខាតផ្ទះ២ខ្នង ដំណាំតាង៉ែនចំនួន៤៥០ដើម និងដំណាំស្វាយចំនួន១៥ដើម និងប៉ះទៅលើភូមិចម្ការបុស ឃុំកំរៀង ខូចខាតផ្ទះអស់ចំនួន១៨ខ្នង និង សាលារៀន១ខ្នង។
លោកបានប្រាប់បន្តថា គ្រោះធម្មជាតិនេះបានកើតឡើងព្រមៗគ្នា តែសំណាងល្អមិនបង្កគ្រោះថ្នាក់ដល់មនុស្សទេ។ បើតាមប្រជាពលរដ្ឋបាននិយាយថា ភ្លៀងបានធ្លាក់ខ្លាំងដោយកន្លែង លាយឡំនឹងខ្យល់កន្ត្រាក់ដែលស្ទើរមិនអាចធ្វើដំណើរតាមដងផ្លូវនានាបាន តែក្នុងរយៈពេលខ្លី។ ពលរដ្ឋបន្តថា ខ្យល់ដែលមានកម្លាំងគួរឲ្យខ្លាចបានគួចរំលើង និងផ្ដូលដើមតាង៉ែនរាប់រយដើម រួមទាំងដំណាំស្វាយរបស់កសិករផង រីឯលំនៅឋានភាគច្រើនរបើកដំបូល តែមានផ្ទះខ្លះក៏លោតចុះពីលើជើងតាងធ្លាក់ដីដែរ។
ជុំវិញករណីនេះ លោក គឹម ពន្លក អធិការស្រុកកំរៀង បាននិយាយថា ភ្លៀងបានបង្អុរខ្លាំងគួរសមគ្របដណ្ដប់ផ្នែកខ្លះៗ នៃស្រុកកំរៀង។ លំនៅឋានភាគច្រើន និងសាលារៀនបានរបើកដំបូល ប៉ុន្តែដំណាំអាចខូចខាតទាំងស្រុង។ លោកអធិការបញ្ជាក់ថា នេះជាភ្លៀងកក់ខែដែលលាយឡំដោយខ្យល់កន្ត្រាក់ដ៏ខ្លាំងបំផុត តែសំណាងល្អមិនមានគ្រោះថ្នាក់មនុស្ស។ លោកបានបន្ថែមថា នៅរសៀលថ្ងៃទី១៤ មីនានេះ លោកនឹងអភិបាលស្រុកកំរៀង បានចុះពិនិត្យ ដើម្បីធ្វើរបាយការណ៍ជូនថ្នាក់ដឹកនាំហើយ៕
ចែករំលែកព័តមាននេះ