ខេត្តស្វាយរៀង ៖ បុរសស្រវឹងធ្លាក់ភ្នែកម្នាក់ បានបើករថយន្តកាមរីឆ្លាមលឿនដូចហោះលើផ្លូវជាតិលេខ១៣ ក៏បានជ្រុលធ្លាក់ផ្លូវទៅបុកចូលផ្ទះប្រជាពលរដ្ឋចំកណ្តាលផ្ទះបាក់រាបដល់ដី ហើយមិនទាន់អស់ល្បឿនក៏ជ្រុលទៅបុកដើមប្រេងខ្យល់រួចធ្លាក់ចូលក្នុងប្រឡាយកប់នៅទីនេះ តែសំណាងល្អផ្ទះដែលត្រូវរថយន្តបុកដួលរាបនោះមិនមានម្ចាស់នៅក្នុងផ្ទះទេ រីឯអ្នកបើកបររថយន្តក៏មិនរងរបួសដែរ ដោយសារបានពោងសុវត្ថិភាពការពារ ។
ករណីនេះបានកើតឡើងកាលពីវេលាម៉ោង៤និង៣០នាទីរសៀល ថ្ងៃទី១២ មីនា នៅចំណុចភូមិព្រះទន្លេ សង្កាត់សង្ឃ័រ ក្រុងស្វាយរៀង ។ បើតាមមន្ត្រីនគបាលប៉ុស្តិ៍រដ្ឋបាលសង្កាត់សង្ឃ័របានឲ្យដឹងថា ម្ចាស់ផ្ទះរងគ្រោះឈ្មោះហាស់ ហន ភេទប្រុស អាយុ៦៩ឆ្នាំ មានប្រពន្ធឈ្មោះ សំណុន អាយុ៥២ឆ្នាំ រស់នៅភូមិកើតហេតុខាលើ ។ រីឯអ្នកបើកបររថយន្ត ឈ្មោះ សំ ម៉ៅ ភេទប្រុស អាយុ២៩ឆ្នាំ មានទីលំនៅភូមិបែកចាន ឃុំរមាំងថ្កោល ស្រុកស្វាយទាប ។
បន្ទាប់ពីកើតហេតុសមត្ថកិច្ចបានចាប់ខ្លួនអ្នកបើកបររថយន្តយកទៅអធិការដ្ឋាននគរបាលក្រុងស្វាយរៀង ដើម្បីពិនិត្យជាតិអាល់កុល និងរកឃើញថា អ្នកបើកបររថយន្តទើបតែចេញពីពិធីឡើងផ្ទះបងប្អូនស្រវឹងធ្លាក់ភ្នែក ។ រីឯរថយន្តត្រូវអ្នកស្រុកយកត្រាក់ទ័រមកអូសឡើងពីប្រឡាយ តែខកចិត្តដោយគ្មានអ្នកទទួលខុសត្រូវចេញលុយ ដោយសារម្ចាស់រថយន្តត្រូវសមត្ថកិច្ចចាប់ខ្លួននាំទៅអធិការដ្ឋាននគរបាលក្រុងស្វាយរៀងបាត់ទៅហើយ ៕
ចែករំលែកព័តមាននេះ