លោកកឹម សុខា ថា គោលនយោបាយរបស់បក្សអាចធ្វើឲ្យមានការផ្លាស់ប្តូរ
រាជធានីភ្នំពេញ ៖ ប្រធានគណបក្សសង្គ្រោះជាតិ លោកកឹម សុខា បានអះអាងថា គោលនយោបាយរបស់គណបក្សនយោបាយនីមួយៗ
រាជធានីភ្នំពេញ ៖ ប្រធានគណបក្សសង្គ្រោះជាតិ លោកកឹម សុខា បានអះអាងថា គោលនយោបាយរបស់គណបក្សនយោបាយនីមួយៗ មិនមែនជាកាសន្យាខ្យល់នោះទេ ផ្ទុយទៅវិញវាអាចធ្វើឲ្យប្រសើរឡើងដល់ប្រទេសជាតិនិងពលរដ្ឋ ទោះបីគណបក្សនយោបាយនោះ មិនទាន់ឈ្នះក៏ដោយ ក៏អាចនាំឲ្យមានការផ្លាស់ប្ដូរជាវិជ្ជមានដែរ ។
នៅក្នុងពិធីផ្សព្វផ្សាយផ្ទៃក្នុងនូវគោលនយោបាយអាទិភាពសម្រាប់ការបោះឆ្នោតឃុំ-សង្កាត់ នៅខេត្តកំពង់ចាម នាព្រឹកថ្ងៃទី១៣ មីនា ២០១៧ លោកកឹម សុខាបានបញ្ជាក់ថា ជាក់ស្ដែងកាលឆ្នាំ២០១៣ ជាគោលនយោបាយគណបក្សសង្គ្រោះជាតិ ថានឹងដំឡើងប្រាក់ខែជូនមន្ដ្រីរាជការឲ្យបានយ៉ាងតិច១លានរៀល កាលនោះគេថាធ្វើមិនបាន តែឥឡូវស្រាប់តែកំពុងធ្វើបាន និងការបញ្ចុះថ្លៃប្រើប្រាស់អគ្គីសនីជាដើម ។
មេបក្សប្រឆាំងរូបនេះបានបញ្ជាក់ទៀតថា “ការបោះឆ្នោត” ដោយការប្រកួតប្រជែង “គោលនយោបាយ” ប្រកបដោយសេចក្ដីថ្លៃថ្នូរ និងសុចរិត គឺជាមធ្យោបាយនាំឲ្យប្រទេសជាតិ មាន “ស្ថិរភាព សន្ដិភាព និងការរីកចម្រើនពិតប្រាកដ”។ លោក កឹម សុខា បន្តថា៖«ខ្ញុំមានជំនឿថា ប្រជាពលរដ្ឋខ្មែរ ឆ្អែតឆ្អន់នឹងអ្នកនយោបាយឈ្លោះគ្នា គំរាមកំហែង វាយប្រហារដោយហិង្សាលើខ្មែរគ្នាឯងហើយ។ ហេតុដូច្នេះហើយ បានជាខ្ញុំត្រូវចំណាយពេលធ្វើដំណើរ “ផ្សព្វផ្សាយគោលនយោបាយផ្ទៃក្នុងគណបក្សសង្គ្រោះជាតិ” ចំនួន២ខេត្តក្នុងមួយថ្ងៃ ។ លោកកឹម សុខា បានប្រកាសថា លោកនឹងចុះតាមមូលដ្ឋានរយៈពេល២ខែ ដើម្បីធ្វើការផ្សព្វផ្សាយគោលនយោបាយដែលអង្គសមាជវិសាមញ្ញបក្សទើបអនុម័តយល់ព្រមកាលពីពេលថ្មីៗនេះ។
យ៉ាងណាក៍ដោយ សម្តេចអគ្គមហាសេនាបតីតេជោ ហ៊ុន សែន ធ្លាប់បានលើកឡើងជាច្រើនដងអំពីការសន្យានានារបស់បក្សនយោបាយ ប៉ុន្តែជាក់ស្តែងធ្វើមិនបាន ឆ្កែនៅតែព្រូសមនុស្សនៅតែដើរ គឺសន្យាខ្យល់ ៕
ចែករំលែកព័តមាននេះ