ទីក្រុងហ៊ូស្តុន ៖ ប្រធានក្រុមហ៊ុនថាមពលធំៗព្យាករថា ការធ្លាក់ចុះនៃតម្លៃប្រេងអាចនឹងបន្តក្នុងឆ្នាំ២០១៧ ហើយឆាប់ៗនេះនឹងមានកំណើនប្រាក់ចំណេញប្រេង ខណៈឧស្ម័នធម្មជាតិ ធ្យូងថ្ម ថាមពលខ្យល់ និង
ទីក្រុងហ៊ូស្តុន ៖ ប្រធានក្រុមហ៊ុនថាមពលធំៗព្យាករថា ការធ្លាក់ចុះនៃតម្លៃប្រេងអាចនឹងបន្តក្នុងឆ្នាំ២០១៧ ហើយឆាប់ៗនេះនឹងមានកំណើនប្រាក់ចំណេញប្រេង ខណៈឧស្ម័នធម្មជាតិ ធ្យូងថ្ម ថាមពលខ្យល់ និងថាមពលកកើតឡើងវិញផ្សេងទៀត នឹងបង្កើនប្រាក់ចំណេញសុទ្ធដល់ក្រុមហ៊ុនយល់ដឹងពីបរិស្ថាន ។
ក្នុងអំឡុងសន្និសីទ CERAweek ប្រចាំឆ្នាំរបស់ក្រុមហ៊ុន IHS Markit នៅថ្ងៃទី៦-១០ មីនា ក្នុងទីក្រុងហ៊ូស្តុន រដ្ឋតិចសាស់ ប្រធានក្រុមហ៊ុន និងទីភ្នាក់ងារថាមពលធំៗជាច្រើនបានបញ្ចេញការយល់ឃើញនាពេលអនាគត ។
កាលពីដើមសប្តាហ៍នេះ អគ្គលេខាធិការអង្គការ OPEC លោក Mohammad Sanusi Barkindo និងលោក Fatih Birol នាយកប្រតិបត្តិទីភ្នាក់ងារថាមពលអន្តរជាតិ បានលើកឡើងពីសំណួរទាក់ទងនឹងតម្លៃថាមពលប្រេង ។
លោក Barkindo ថ្លែងថា ៖ « យើងមានគម្រោងប្រៀបធៀបទស្សនៈទីផ្សារ ។ ខ្ញុំយល់ស្របជាមួយលោក Birol ដើម្បីបំបែករបាំងរវាងអ្នកផលិត និងអ្នកប្រើប្រាស់ ។ យើងបានសម្រេចចិត្តមិនត្រឹមតែបង្កើតទំនាក់ទំនងថ្មីប៉ុណ្ណោះទេ ប៉ុន្តែនឹងបង្កើតផលប្រយោជន៍ល្អបំផុតសម្រាប់សហគមន៍ពិភពលោកផងដែរ » ។
លោក Birol បានលើកឡើងនៅថ្ងៃចន្ទថា ទីផ្សារប្រេងកំពុងកើនឡើង ប៉ុន្តែមានសភាពយឺត ដោយតម្រូវការប្រេងមិនកើនឡើងដល់កំពូលទេ ។
ក្រុមហ៊ុនប្រេងបានមកជុំគ្នានៅទីក្រុង Vienna កាលពីខែធ្នូ ដោយចាប់ផ្តើមអនុវត្តផែនការរយៈពេល៦ខែលើការប្តេជ្ញាកែតម្រូវការផ្គត់ផ្គង់ឲ្យបាន១,៨លានបារ៉ែល ។
លោក Barkindo ឱ្យដឹងថា ចំនួននេះមានដំណើរការល្អ មុនពេលការពិនិត្យឡើងវិញនៅខែកុម្ភៈ ។ លោកថ្លែងថា ៖ « វាប្រែប្រួលយឺតៗនឹងអាចមានកាន់តែច្រើននាអនាគត ។ នៅខែកក្កដាឆ្នាំនេះ យើងនឹងដឹងថា តើនឹងសម្រេចកិច្ចព្រមព្រៀងនៅក្រុង Vienna ឬយ៉ាងណា » ។
លោក Birol បន្តថា ទីផ្សារប្រេងថ្មសែល (Shale oil) របស់សហរដ្ឋអាមេរិកមានដំណើរការល្អដូចប្រទេសកាណាដា និងប្រេស៊ីលដែរ។ ចំណែកដំណើរការក្នុងឆ្នាំនេះហាក់មិនសូវជោគជ័យខ្លាំងទេ ។ សហរដ្ឋអាមេរិកកំពុងបង្កើនសមត្ថភាពផលិតដល់២%នៃតម្រូវការសកល ហើយការវិនិយោគត្រូវធ្វើឡើងដោយគ្មានការពន្យារពេល ។
លោក Barkindo បន្ថែមថា ក្នុងឆ្នាំ២០៤០ ឧស្សាហកម្មនេះនឹងត្រូវការថវិកា១០ទ្រីលានដុល្លារអាមេរិកដើម្បីបំពេញតម្រូវការ ។ ទោះបីជាឯកអគ្គរដ្ឋទូតរុស្ស៊ីមិនបានត្រៀមខ្លួនចូលរួមក្នុង OPEC ក៏បណ្តាប្រទេសផលិតប្រេងទាំង២៤បានជួបគ្នានៅទីក្រុង Vienna ដើម្បីពិភាក្សាពីតម្លៃប្រេងជាមួយដៃគូដឹកនាំដោយរុស្ស៊ី ។ លោកថា ៖ « យើងបានបើកទំព័រប្រវត្តិសាស្ត្រមួយក្នុងវិស័យប្រេងដែលមានសក្តានុពលសម្រាប់រក្សាស្ថិរភាព » ។
លោក Birol បន្តថា ការវិនិយោគក្នុងឧស្សាហកម្មប្រេងចាំបាច់ត្រូវបំពេញតម្រូវការឲ្យទាន់ពេល ខណៈរថយន្តអគ្គិសនីនឹងជ្រៀតចូលឧស្សាហកម្មរថយន្ត ក៏ដូចជារថយន្តដឹកទំនិញក្នុងតំបន់អាស៊ីមានតម្រូវការ១ភាគ៣នៃទីផ្សារប្រេង ។ លោកថា ៖ « យើងនៅតែឃើញកំណើនក្នុងទីផ្សារប្រេង ប៉ុន្តែសារមួយសម្រាប់ឧស្សាហកម្មប្រេងនៅទីក្រុងហ៊ូស្តុន គឺការវិនិយោគ » ។
លោក Birol បន្ថែមថា ពិភពលោកកំពុងឈានចូលយុគសម័យមាសនៃឧស្ម័ន និងប្រេងថ្មសែល ដែលមានកំណើនជាង៤៥០% ហើយវាកំពុងជំនួសការប្រើប្រាស់ធ្យូងថ្មនៅសហរដ្ឋអាមេរិក និងបណ្តាប្រទេសជាច្រើនដែលចង់កាត់បន្ថយការបំភាយឧស្ម័នកាបូនឌីអុកស៊ីត។ លោកថា ៖ « ថាមពលកកើតឡើងវិញផ្តោតសំខាន់លើអគ្គិសនី ។ ថាមពលកកើតឡើងវិញ គឺមិនមែនជាប្រេងឥន្ធនៈសម្រាប់ពួកអ្នកមានទៀតទេ។ ចិនជាប្រទេសលេខ១ ដែលប្រើប្រាស់ថាមពលកកើតឡើងវិញ ខណៈឥណ្ឌាកំពុងឈានទៅកាន់ចំណុចកណ្តាលនៃការប្រើប្រាស់ថាមពលប្រេង » ៕
ចែករំលែកព័តមាននេះ