រាជធានីភ្នំពេញ ៖ ក្រុមហ៊ុនលក់រាយធំជាងគេនៅប្រទេសថៃ នឹងវិនិយោគផ្សារទំនើបដ៏ធំមួយនៅរាជធានីភ្នំពេញ ខណៈទំហំពាណិជ្ជកម្មរវាងប្រទេសទាំងពីរបានថយចុះ៦% កាលពីឆ្នាំមុន ។
រាជធានីភ្នំពេញ ៖ ក្រុមហ៊ុនលក់រាយធំជាងគេនៅប្រទេសថៃ នឹងវិនិយោគផ្សារទំនើបដ៏ធំមួយនៅរាជធានីភ្នំពេញ ខណៈទំហំពាណិជ្ជកម្មរវាងប្រទេសទាំងពីរបានថយចុះ៦% កាលពីឆ្នាំមុន ។
លោក ណាត់តាវុធ ប៉ូទីសារ៉ូ ឯកអគ្គ រាជទូតថៃប្រចាំកម្ពុជា បានឲ្យដឹងកាលពីថ្ងៃទី៩ មីនា ថា ក្រុមហ៊ុនលក់រាយធំជាងគេនៅប្រទេសថៃ ឈ្មោះ Central Group នឹងចូលមកបោះទុនវិនិយោគសាងសង់ផ្សារទំនើបដ៏ធំនៅកម្ពុជាក្នុងឆ្នាំនេះ ព្រោះតំណាងក្រុមហ៊ុនបានសិក្សាពីទីតាំងសម្រាប់សាងសង់រួចហើយ ។ ទីតាំងផ្សារទំនើបនេះ ស្ថិតនៅតាមបណ្តោយមហាវិថីមួយ ដែលលោកមិនទាន់បញ្ចេញឈ្មោះ និងចាប់ផ្តើមសាងសង់ពេលណានៅឡើយទេ ។
ឯកអគ្គរាជទូតថៃរូបនេះបន្តថា លោកមានមោទនភាពក្នុងអាណត្តិការទូតនៅកម្ពុជា ខណៈលោកបានជួយកៀងគរវិនិយោគិនថៃជាច្រើនឲ្យមកវិនិយោគនៅកម្ពុជា ។ លោកបន្តថា តាមរយៈការវិនិយោគផ្សារទំនើបដ៏ធំនេះ លោកសង្ឃឹមថា ទំហំពាណិជ្ជកម្មរវាងប្រទេសទាំងពីរនឹងកើនឡើង ។
ក្រុមហ៊ុន Central Group មានមុខជំនួញធំៗជាច្រើនដូចជា ផ្សារទំនើបថៃ ផ្សារទំនើប BigC មជ្ឈមណ្ឌលប៉ាតាយ៉ា រ៉ូប៊ីនសុន និងមជ្ឈមណ្ឌលសណ្ឋាគារផ្លាហ្សាជាដើម ។ ក្រុមហ៊ុននេះទទួលបានប្រាក់ចំណេញ១០ពាន់លានដុល្លារកាលពីឆ្នាំមុន កើនឡើង១៣% ធៀបនឹងឆ្នាំ២០១៥ ។
ទំហំពាណិជ្ជកម្មរវាងប្រទេសទាំងពីរកាលពីឆ្នាំមុន ស្មើទឹកប្រាក់៥.៦០០លានដុល្លារអាមេរិក ថយចុះ៦%ធៀបនឹងឆ្នាំ២០១៥ ដោយការនាំចេញរបស់កម្ពុជាទៅកាន់ប្រទេសថៃ មានទឹកប្រាក់៩៣៦លានដុល្លារអាមេរិក ហើយការនាំចូលរបស់ថៃមកកម្ពុជា ស្មើ៤.៧០០លានដុល្លារអាមេរិក ។
អ្នកនាង អាន សុធីតា នាយិកាក្រុមហ៊ុនអចលនទ្រព្យ CBRE CAMBODIA ថ្លែងថា ផ្សារទំនើបនៅកម្ពុជានៅតែមានឱកាសរីកចម្រើន ដោយសារទីផ្សារនេះមានកម្លាំងទិញកើនឡើង ហើយចំនួនផ្សារទំនើបក្នុងប្រទេសកម្ពុជា ដែលមានស្តង់ដាអន្តរជាតិ គឺមានកម្រិតនៅឡើយ ។ អ្នកនាងបន្តថា ជាមួយនឹងការកើនឡើងនូវទំហំផ្សារទំនើបលំដាប់អន្តរជាតិ វិនិយោគិនផ្សារទំនើបក្នុងស្រុកត្រូវយកចិត្តទុកដាក់លើការឌីសាញ និងរៀបចំប្រព័ន្ធលក់ឲ្យមានភាពទាក់ទាញជាងមុន ដើម្បីបញ្ចៀសការបិទទ្វារ ។
អ្នកនាងបន្ថែមថា ទំហំផ្សារទំនើបនៅកម្ពុជា ធៀបនឹងមនុស្សម្នាក់នៅមានចំនួនទាបនៅឡើយបើធៀបជាមួយប្រទេសថៃ និងវៀតណាម ៕
ចែករំលែកព័តមាននេះ