រាជធានីភ្នំពេញ ៖ រថយន្តកូរ៉ូឡាបាក់កញ្ចក់ ឆ្កូតថ្នាំ ទទួលសំណងពីម្ចាស់ម៉ូតូគ្រុបដែលជិះវ៉ារថយន្ត Lexus RX-450 ខាងឆ្វេង ដៃជ្រុលទៅបុកកៀរកៀបជាប់នៅកណ្តាលរថយន្តទាំង២គ្រឿង ប៉ុន្តែមិនបណ្តាលឱ្យគ្រោះថ្នាក់ដល់មនុស្សឡើយ ។
ហេតុការណ៍នេះ បានកើតឡើងនៅចំណុចផ្លូវ៤៦៦ កែងនឹងមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន កាលពីម៉ោង៩និង៣០នាទីយប់ ថ្ងៃទី១១ ខែមីនា ឆ្នាំ២០១៧ ។
តាមប្រភពបានប្រាប់ថា រថយន្ត Lexus RX-450 ពណ៌ស ពាក់ស្លាកលេខ ភ្នំពេញ 2AM-8257 បើកបរពីលិចទៅកើត តាមបណ្តោយផ្លូវ៤៦៦ មកដល់ចំណុចស្តុបកែងមហាវិថីព្រះនរោត្តម ស្រាប់តែមានម៉ូតូគុបជ្រុង ពណ៌ទឹកសមុទ្រ ស្លាកលេខ កំពង់ធំ 1C-3488 បើកបរស្របទិសជាមួយរថយន្ត Lexus RX-450 មកពីខាងក្រោយ ហើយក៏វ៉ានៅខាងឆ្វេងដៃ ចៃដន្យពេលនោះរថយន្តកូរ៉ូឡា ពណ៌ស្ករ ស្លាកលេខ ភ្នំពេញ 2S-6809 បើកបរពីត្បូងទៅជើង តាមបណ្តោយមហាវិថីព្រះនរោត្តម ស្របពេលភ្លើងស្តុបបត់ឆ្វេងដៃ ក៏ត្រូវម៉ូតូគុបជ្រុងបុកកៀរបាក់កញ្ចក់មើលក្រោយផ្នែកខាងឆ្វេងរថយន្តកូរ៉ឡា ហើយដួលប៉ះរថយន្ត Lexus RX-450 បណ្តាលឱ្យឆ្កូតថ្នាំបន្តិច និងម៉ូតូត្រូវរថយន្តទាំង២គ្រឿងកៀបជាប់នៅកណ្ដាលតែម្ដង។
ប្រភពបន្តថា ម្ចាស់រថយន្តកូរ៉ឡាទទួលការខូចខាតមិនចង់វែងឆ្ងាយ មិនទាមទារសំណងអ្វីឡើយពីម្ចាស់ម៉ូតូ ដោយសុំទៅមុន ពីព្រោះមានកូនក្តៅខ្លួននៅក្នុងរថយន្ត ។ រីឯម្ចាស់រថយន្ត Lexus RX-450 មិនព្រមឱ្យម្ចាស់ម៉ូតូរួចខ្លួន ក៏ទាមទារសំណង២០ដុល្លារ តែម្ចាស់ម៉ូតូមិនមានលុយក៏ប្រគល់ទូរស័ព្ទដៃអិនចុចពិលជំនួសថវិកា ព្រមទាំងសុំអង្វរម្ចាស់រថយន្ត Lexus RX-450 ដោយគ្មានលុយជាប់ក្នុងខ្លួនទេ។
ហើយម្ចាស់រថយន្ត Lexus RX-450 ក៏ទទួលយកទូរស័ព្ទជំនួសលុយ ក៏ប្រគល់ទៅឱ្យម្ចាស់រថយន្តកូរ៉ូឡាវិញដោយឃើញការខូចខាតច្រើនជាងគាត់ និងមានក្មេងក្តៅខ្លួនទៀត ។
បើតាមសម្ដីរបស់ម្ចាស់រថយន្ត Lexus RX-450 គឺគាត់ចង់ឱ្យម្ចាស់ម៉ូតូមានភាពទទួលខុសត្រូវចំពោះការបើកបរត្រូវចេះគោរពច្បាប់ចរាចរណ៍ផង កុំពេលបើកប៉ះគេអាងអី សូមទោសនោះ អ្នកណាក៏ចេះនិយាយ សូមទោសដែរ បើសូមទោសហើយរួចខ្លួនអញ្ចឹង ពេលគាត់បើកប៉ះវិញ សូមទោសគេទៅរួចបាត់ មិនបាច់មានភាពទទួលខុសត្រូវពេលដែលធ្វើខុសទេអី។
ក្រោយពេលកើតហេតុរឿងគ្រោះថ្នាក់ចរាចរណ៍ម៉ូតូបុកកៀរថយន្តដួលប៉ះរថយន្តមួយផ្សេងទៀតបញ្ចប់ដោយសងទូរស័ព្ទដៃអិនចុចពិលមួយគ្រឿងតែប៉ុណ្ណោះ ៕
ចែករំលែកព័តមាននេះ