ហៅជាងមកផ្សារ កម្ទេចភ្លើងធ្លាក់ចំធុងប្រេង ឆេះទូកនេសាទមួយគ្រឿង
ខេត្ដកោះកុង ៖ នៅម៉ោង១១ព្រឹកថ្ងៃទី១០ មីនា ទូកនេសាទមួយគ្រឿង បានឆាបឆេះខណៈពេលម្ចាស់ទូកបានហៅជាងមកផ្សារបំពង់សឺម៉ាំងម៉ាស៊ីនទូកដែលពុកនិងធ្លាយ
ខេត្ដកោះកុង ៖ នៅម៉ោង១១ព្រឹកថ្ងៃទី១០ មីនា ទូកនេសាទមួយគ្រឿង បានឆាបឆេះខណៈពេលម្ចាស់ទូកបានហៅជាងមកផ្សារបំពង់សឺម៉ាំងម៉ាស៊ីនទូកដែលពុកនិងធ្លាយ ហើយកម្ទេចភ្លើងធូបផ្សារបានធ្លាក់ទៅចំធុងប្រេងបង្កឱ្យមានអណ្តាតភ្លើងឆាបឆេះឡើងយ៉ាងសន្ធោសន្ធៅតែម្តង ។
តាមមន្ដ្រីសមត្ថកិច្ចបានឱ្យដឹងថា ករណីឆេះទូកនេសាទនេះបានកើតឡើងនៅភូមិ១ ឃុំប៉ាក់ខ្លង ស្រុកមណ្ឌលសីមា ខេត្តកោះកុង និងមានម្ចាស់ទូកឈ្មោះ សៀង លេក ជាមន្ត្រីប៉ូលិសជើងទឹកនៃនាយកដ្ឋាននគរបាលព្រំដែនទឹក និងមានមុខរបរជាថៅកែទូកនេសាទ មានទីលំនៅកន្លែងកើតហេតុ ។ ប្រភពដដែលបានបញ្ជាក់ថា ដំបូងឡើយទូកខាងលើបានឆាបឆេះនៅខាងក្រោយផ្ទះ តែដោយខ្លាចអណ្តាតភ្លើងរាលដាលឆេះដល់ផ្ទះ កម្មករដែលជាជាងផ្សារ បាននាំគ្នារុញទូកនោះឱ្យចេញផុតឆ្ងាយពីមាត់ច្រាំង ហេតុនេះទូកក៏ចេះតែអណ្តែតរសាត់តាមចរន្តទឹកហូរឆ្ងាយទៅៗរហូតទាល់តែទូកឆេះអស់ គ្មានសមត្ថកិច្ចណាអាចជួយពន្លត់បានឡើយ ។
ប្រភពដដែលបានបន្តឱ្យដឹងថា ទូកដែលឆេះខាងលើនេះ ជាទូកនេសាទប្រភេទទូកភ្លើង ។ ទូកនេះសម្រាប់តែបើកភ្លើងរាប់រយអំពូលចោលទៅក្នុងសមុទ្រ សម្រាប់ហៅត្រីសមុទ្រមកលេងភ្លើង បន្ទាប់មកគេយកទូកអួនមកព័ទ្ធចាប់ត្រីដែលមករោមលេងភ្លើងនោះតែម្តង ។ ក្នុងទូកអួនមួយគ្រឿង ត្រូវមានទូកភ្លើងពី៥ទៅ៨គ្រឿងសម្រាប់បំភ្លឺពេលរាត្រីហៅត្រី ហើយទូកអួនបន្តព័ទ្ធចាប់យកត្រីតាមទូកភ្លើងពីមួយទៅមួយ ដែលនេះជាប្រភេទរបរនេសាទជំនាន់ថ្មី ។
ប្រភពបានបន្តថា ទូកប្រភេទនេះមានតម្លៃប្រមាណពី៦ទៅ៨ម៉ឺនដុល្លារប៉ុណ្ណោះក្នុងមួយគ្រឿង តែបើទូកអួនវិញមានតម្លៃពី៥០ទៅ៦០ម៉ឺនដុល្លារឯណោះ ដែលការធ្វើនេសាទបែបនេះអាចនឹងហិនហោចធនធានមច្ឆជាតិក្នុងសមុទ្រយ៉ាងឆាប់រហ័សបំផុត ៕
ចែករំលែកព័តមាននេះ