កម្ពុជា-ចិនប្រកាសជំហរគាំទ្រគោលនយោបាយផ្លូវ1ខ្សែក្រវាត់1
រាជធានីភ្នំពេញ ៖ មេដឹកនាំចិន និងកម្ពុជានៅថ្ងៃទី៩ ខែមីនា បានប្រកាសជាថ្មីម្តងទៀតពីកិច្ចសហប្រតិបត្តិការរវាងប្រទេសទាំង២ដែលជាមិត្តភក្តិនឹងគ្នាដ៏យូរលង់
រាជធានីភ្នំពេញ ៖ មេដឹកនាំចិន និងកម្ពុជានៅថ្ងៃទី៩ ខែមីនា បានប្រកាសជាថ្មីម្តងទៀតពីកិច្ចសហប្រតិបត្តិការរវាងប្រទេសទាំង២ដែលជាមិត្តភក្តិនឹងគ្នាដ៏យូរលង់
រាជធានីភ្នំពេញ ៖ មេដឹកនាំចិន និងកម្ពុជានៅថ្ងៃទី៩ ខែមីនា បានប្រកាសជាថ្មីម្តងទៀតពីកិច្ចសហប្រតិបត្តិការរវាងប្រទេសទាំង២ដែលជាមិត្តភក្តិនឹងគ្នាដ៏យូរលង់ ក្នុងនាមជាដៃគូយូរអង្វែងតាំងពីដើមរហូតបច្ចុប្បន្ន និងទៅអនាគត ។ នេះបើតាមការអះអាងរបស់លោក ស្យុងប៉(Xiong Bo) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជាក្នុងពេលលោកចូលរួមប្រគល់សម្ភារការិយាល័យនិងរថយន្ត១គ្រឿង ដល់ក្រសួងការបរទេសនិងសហប្រតិបត្តិការអន្តរជាតិដែលមានទឹកប្រាក់សរុបប្រមាណ១៤ម៉ឺនដុល្លារអាមេរិក នៅទីស្តីការក្រសួង ។
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ថ្លែងថា ប្រទេសកម្ពុជានិងចិន បានពង្រឹងបន្ថែមទៀតនូវភាពដៃគូក្នុងការការពារសន្តិភាព សន្តិសុខ ស្ថិរភាព និងជួយពង្រឹងវិបុលភាពពិភពលោក ។ ថ្នាក់ដឹកនាំប្រទេសទាំងពីរ បានផ្លាស់ប្តូរទស្សនកិច្ចនិងចូលរួមប្រជុំសំខាន់ៗផងដែរ ក្នុងនោះសម្តេច ហ៊ុន សែន សម្តេច ហេង សំរិន និងសម្តេច សាយ ឈុំ បានអញ្ជើញទៅចូលរួមប្រជុំនៅចិន ។
លោកទេសរដ្ឋមន្ត្រី មានប្រសាសន៍ទៀតថា ក្នុងឆ្នាំ២០១៦ ក្រសួងការបរទេសកម្ពុជាបានទទួលសម្ភារការិយាល័យពីរដ្ឋាភិបាលចិន ហើយសម្ភារទាំងនោះក៏បានឆ្លើយតបនឹងតម្រូវរបស់ក្រសួងក្នុងការពង្រឹងការងារប្រចាំថ្ងៃ ។ ឆ្នាំ២០១៦ ក៏ជាឆ្នាំនៃការពង្រឹងទំនាក់ទំនងរវាងប្រទេសយើងទាំងពីរគួរឲ្យកត់សម្គាល់ផងដែរ ។ ពេលនោះ ព្រះមហាក្សត្របានបំពេញព្រះរាជទស្សនកិច្ចនៅចិន និងប្រធានាធិបតីចិនមកបំពេញទស្សនកិច្ចនៅកម្ពុជា នាខែតុលា និងមានឯកសារចំនួន៣១ត្រូវបានចុះហត្ថលេខា ។
លោកទេសរដ្ឋមន្ត្រីបានលើកឡើងថា សម្ភារការិយាល័យដែលរដ្ឋាភិបាលចិនបានប្រគល់ដល់ក្រសួងការបរទេសកម្ពុជារួមមាន រថយន្តចំណុះ៤១កៅ១គ្រឿង កុំព្យូទ័រលើតុ កុំព្យូទ័រយួដៃ ម៉ាស៊ីនព្រីនធ័រ ទឹកថ្នាំ ម៉ាស៊ីនថតចម្លង សរុបគិតជាទឹកប្រាក់ប្រមាណ១លានយាន់ គឺប្រហែល១៤ម៉ឺនដុល្លារអាមេរិក ។ ក្នុងឆ្នាំ២០១៦ រដ្ឋាភិបាលចិន បានផ្តល់ជំនួយឥតសំណង១.២០០លានយាន់ និងឥណទានសរុបចំនួន២៩០លានដុល្លារអាមេរិកដល់កម្ពុជា ។
លោក ស្យុង ប៉ ឯកអគ្គរដ្ឋទូតចិនប្រចាំនៅកម្ពុជា ថ្លែងថា «យើងធ្វើសហប្រតិបត្តិការគ្នាយ៉ាងជិតស្និទ្ធ និងសហការគ្នាល្អប្រសើរក្នុងក្របខណ្ឌទ្វេភាគី តំបន់និងអន្តរជាតិ ដែលបានជំរុញទំនាក់ទំនងរវាងប្រទេសយើងទាំង២ឲ្យអភិវឌ្ឍន៍ទៅមុខ រក្សាបានសន្តិភាព និងស្ថិរភាពក្នុងតំបន់»។
លោកឯកអគ្គរដ្ឋទូត ថ្លែងទៀតថា ប្រទេសកម្ពុជាជាសមាជិកអាស៊ានដ៏សំខាន់ ។ ជាពិសេសនៅឆ្នាំ២០១៧នេះ ប្រទេសកម្ពុជាបានក្លាយជាប្រទេសសម្របសម្រួលសម្រាប់ប្រទេសកំពុងអភិវឌ្ឍន៍នៃអង្គការពាណិជ្ជាពិភពលោក (WTO) ។ នេះបង្ហាញថា ប្រទេសកម្ពុជាដើរតួនាទីយ៉ាងសំខាន់នៅលើឆាកអន្តរជាតិ ហើយប្រទេសចិនសង្ឃឹមសហការជាមួយប្រទេសកម្ពុជាដើម្បីឲ្យប្រទេសកម្ពុជាដើរតួនាទីសំខាន់ក្នុងតំបន់និងលើឆាកអន្តរជាតិ ។
លោកឯកអគ្គរដ្ឋទូត ថ្លែងថា «ឆ្នាំ២០១៧ជាឆ្នាំដ៏មានសារៈសំខាន់សម្រាប់ប្រទេសយើងទាំង២» ។ ទំនាក់ទំនងចិននិងកម្ពុជា នឹងប្រឈមទៅនឹងកាលានុវឌ្ឍភាពថ្មីៗ ហើយប្រទេសយើងទាំង២នឹងជំរុញអញ្ជើញថ្នាក់ដឹកនាំឲ្យបំពេញទស្សនកិច្ចទៅវិញទៅមក ក្នុងគោលបំណងពង្រឹងនិងពង្រីកកិច្ចសហប្រតិបត្តិការជាក់ស្តែងលើគ្រប់វិស័យដោយឥតឈប់ឈរ ដើម្បីនាំមកនូវអត្ថប្រយោជន៍ដ៏ច្រើនជូនដល់ប្រជាជនប្រទេសទាំង២ ។
លោកឯកអគ្គរដ្ឋទូតបន្តថា «យើងខ្ញុំកំពុងរង់ចាំសម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញចូលរួមកិច្ចប្រជុំវេទិកាកំពូលអន្តរជាតិស្តីពី «ផ្លូវ១ខ្សែក្រវាត់១» ដែលនឹងប្រព្រឹត្តទៅនៅប្រទេសចិនក្នុងខែឧសភា ឆ្នាំ២០១៧ខាងមុខ ។ ស្ថានទូតចិននៅកម្ពុជា បន្តសហប្រតិបត្តិការជាមួយក្រសួងការបរទេសកម្ពុជា រួមគ្នាអភិវឌ្ឍន៍នូវគំនិតឯកភាពគ្នារបស់ថ្នាក់ដឹកនាំប្រទេសទាំង២ ។ កិច្ចព្រមព្រៀងរវាងក្រសួងការបរទសនៃប្រទេសទាំង២ ស្តីពីការបង្កើនកិច្ចសហប្រតិបត្តិការក្នុងសភាពការណ៍ថ្មី ដើម្បីរួមចំណែកក្នុងការជំរុញ្ចទំនាក់ទំនងរវាងចិន-កម្ពុជាឲ្យអភិវឌ្ឍន៍ទៅមុខបន្ថែមទៀត ៕
ចែករំលែកព័តមាននេះ