លោក គឹម សុខ មិននិយាយជាមួយចៅក្រមស៊ើបសួរ
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី១០ មីនា បានបង្គាប់ឱ្យសមត្ថកិច្ចពន្ធនាគាព្រៃស
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី១០ មីនា បានបង្គាប់ឱ្យសមត្ថកិច្ចពន្ធនាគាព្រៃស
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី១០ មីនា បានបង្គាប់ឱ្យសមត្ថកិច្ចពន្ធនាគាព្រៃស នាំខ្លួនលោក គឹម សុខ អ្នកវិភាគនយោបាយ និងជាអ្នកតាមដានកិច្ចការសង្គម ដែលកំពុងជាប់ឃុំក្នុងពន្ធនាគារ ពាក់ពន្ធការចោទប្រកាន់ចំនួនពីរបទល្មើស ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និងមាត្រា៣០៥ នៃក្រមព្រហ្មទណ្ឌ យកមកសាកសួរឡើងវិញ ។
សំណុំរឿងនេះកំពុងស្ថិតនៅក្នុងដៃលោក រស់ ពិសិដ្ឋ ចៅក្រមស៊ើបអង្កេតនៅឡើយទេ ។ ប្រភពព័ត៌មានបានឲ្យដឹងថា លោក គឹម សុខ នៅតែប្រកាន់ជំហរមិននិយាយ មិនឆ្លើយនូវអី្វរាល់សំណួររបស់លោកចៅក្រមស៊ើបសួរ ។ ឥរិយាបថរបស់លោកនេះ មិនមែនតែលើកនេះទេ តាំងពីពេលចាប់ខ្លួនទាំងនៅដំណាក់កាលតំណាងអយ្យការ ក៏ដូចជាខាងចៅក្រមដែរ ពោលគឺមកដល់ពេលនេះមិនទាន់មានចម្លើយណាមួយពីលោក គឹម សុខ ជាផ្លូវការនៅឡើយទេ ។ នេះបើតាមការបង្ហើបពីមន្ត្រីសាលាដំបូងរាជធានីភ្នំពេញ ។
ទោះជាយ៉ាងណាលោក ជួង ជូងី មេធាវីការពារក្តីដោយអាណត្តិឲ្យលោក គឹម សុខ បានប្រាប់អ្នកសារព័ត៌មាននៅព្រឹកថ្ងៃទី១០ មីនាថា ក្នុងនាមលោកជាមេធាវីការពារក្តី លោកបានដាក់ពាក្យស្នើសុំទៅលោកចៅក្រមស៊ើបសួរសាលាដំបូង ដើម្បីសុំពន្យារពេលក្នុងការឲ្យនាំកូនក្តីរបស់លោកមកសាកសួរនៅព្រឹកនេះ ដោយសាររូបលោកជាប់រវល់នៅសាលាឧទ្ធរណ៍ មិនបានទៅស្តាប់ចម្លើយ ឬក៏អាចថា មិនបាននាំកូនក្តីជូនលោកចៅក្រមសាកសួរតាមនីតិវិធីនោះទេ ។
លោកមេធាវី ជួង ជូងី បានប្រាប់តាមទូរស័ព្ទទៀតថា ការស្នើសុំលោកចៅក្រមពន្យារពេលនោះ មិនបានជោគជ័យទេ ដូច្នោះហើយបានជាអនុរក្សពន្ធនាគារ នាំកូនក្តីលោកមកកាន់សាលាដំបូងរាជធានីភ្នំពេញ តាមការបង្គាប់របស់លោកចៅក្រមស៊ើបសួរ ។
គួរបញ្ជាក់ថា លោកមេធាវី ជួង ជូងី មេធាវីការពារផ្លូវច្បាប់ឲ្យលោកគឹម សុខ អ្នកវិភាគនយោបាយ និងតាមដានកិច្ចការសង្គម កាលពីព្រឹកថ្ងៃទី៦ មីនា បានថ្លែងឲ្យដឹងថា សាលាដំបូងរាជធានីភ្នំពេញ បានបដិសេធលើបណ្តឹងសុំឲ្យកូនក្តីលោកបាននៅក្រៅឃុំ ពោលគឺមិនសម្រេចឲ្យមានការដោះលែងលោក គឹម សុខ កូនក្តីរបស់លោកឡើយ ។
លោកមេធាវី បន្តថា បើទោះបីសាលាដំបូងសម្រេចបែបនេះក៏ដោយ លោកបានឯកភាពជាមួយកូនក្តីហើយ និងដាក់ពាក្យបណ្តឹងថ្មីមួយទៀតទៅតុលាការជាន់កណ្តាល (សាលាឧទ្ធរណ៍) ដើម្បីឲ្យមានការដោះលែងកូនក្តីនៅក្រៅឃុំបណ្តោះអាសន្ន ។ ពាក្យបណ្តឹងនោះលោកបានដាក់ចូលសាលាឧទ្ធរណ៍រួចហើយ នៅរង់ចាំតែសភាស៊ើបសួរសម្រេច ដែលមានជំនឿថា សាលាឧទ្ធរណ៍ពិតជាត្រូវបានដោះលែងកូនក្តីរបស់លោក តាមអង្គហេតុក្នុងពាក្យបណ្តឹងនោះ ។
កាលពីថ្ងៃទី២ មីនា លោកចៅក្រមស៊ើបសួរ រស់ ពិសិដ្ផ បានចេញដីកាសម្រេចមិនដោះលែងលោក គឹម សុខ ឲ្យនៅក្រៅឃុំទេ ដោយរួមមានលោក សៀង សុខ ព្រះរាជអាជ្ញារង បានចុះហត្ថលេខាលើដីកាសម្រេចនោះផងដែរ ។
យោងទៅលើការសម្រេចរបស់សាលាដំបូងរាជធានីភ្នំពេញ មិនអនុញ្ញាតឲ្យលោក គឹម សុខ បាននៅក្រៅឃុំបណ្តោះអាសន្ន ទើបបានជានៅថ្ងៃទី៦ មីនា លោកបានដាក់ពាក្យប្ដឹងទៅសាលាឧទ្ធរណ៍ប្រឆាំងនឹងដីកាសម្រេចនេះ ។
លោក គឹម សុខ ដែលជាអ្នកវិភាគនយោបាយ និងតាមដានកិច្ចការសង្គម ដែលតែងតែធ្វើបទសម្ភាសន៍តាមវិទ្យុអាស៊ីសេរី និងវិទ្យុ VOA បានរងនូវបណ្ដឹងពីមេធាវីតំណាងដោយអាណត្ដិសម្ដេចតេជោហ៊ុន សែន ចំពោះការចោទថា រាជរដ្ឋាភិបាលជាអ្នកសម្លាប់លោកបណ្ឌិត កែម ឡី ។ លោកត្រូវបានចៅក្រមសាលាដំបូងរាជធានីភ្នំពេញ កាលពីថ្ងៃទី១៧ ខែកុម្ភៈ ឆ្នាំ២០១៧ សម្រេចចេញដីកាឃុំខ្លួនដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ជាសាធារណៈ តាមមាត្រា ៤៩៤ មាត្រា ៤៩៥ និងមាត្រា ៣០៥ នៃក្រមព្រហ្មទណ្ឌ ។ លោក គឹម សុខ ត្រូវបានឃុំខ្លួនចាប់ពីពេលនោះមក ដូច្នោះហើយបានជាមេធាវីការពារក្តី ស្វះស្វែងតាមផ្លូវច្បាប់ដាក់ពាក្យសុំនៅក្រៅឃុំជាបណ្តោះអាសន្ន ៕
ចែករំលែកព័តមាននេះ