រាជធានីភ្នំពេញ ៖ នៅយប់ថ្ងៃអាទិត្យ ទី១២ មីនា ខានស្អែកនេះ កម្មវិធីប្រកួតប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យ
រាជធានីភ្នំពេញ ៖ នៅយប់ថ្ងៃអាទិត្យ ទី១២ មីនា ខានស្អែកនេះ កម្មវិធីប្រកួតប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ ការប្រកួតនៅចុងសប្ដាហ៍នេះ កីឡាករជើងខ្លាំងប្រភេទទម្ងន់ធ្ងន់ អ៊ុង វិរៈ និងកីឡាករ ហ៊ឹម សេរី គឺជាសមាសភាពខាងកម្ពុជាដែលសង្វៀនមួយនេះបើកផ្លូវឱ្យស្វាគមន៍កីឡាករថៃមកពីទីក្រុងបាងកក ដោយរំពឹងថា ការប្រកួតនៅវេលាម៉ោង៨យប់ថ្ងៃអាទិត្យនេះនឹងកក្រើកសង្វៀនទូរទស្សន៍អាស៊ីអាគ្នេយ៍ខ្លាំងមិនខាន ។
អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិរបស់ស្រាបៀរប្លេកខេតឲ្យពួកគេប្រកួតគ្នានេះ ។ លោក ញាណ សុធី អ្នករៀបចំកម្មវិធីប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់
អ៊ុង វិរៈ មកពីក្លិបកងទ័ពឆត្រយោង៩១១ ឱ្យឡើងប្រកួតជាមួយកីឡាកថៃឈ្មោះ Deun Chhunlek ក្នុងនាមជាគូឯកអន្តរជាតិនៅយប់ថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកថាភាគីទាំងពីរសុទ្ធតែបានដឹងពីគ្នា និងទទួលយកការផ្គូផ្គងសម្រាប់ការជួបគ្នានោះផង ។ កីឡាករ អ៊ុង វិរៈ ជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបលោកសម្រេចឱ្យឡើងប្រកួតនៅលើសង្វៀន Black Cat ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់។ លោកជឿជាក់ថា សមត្ថភាពកីឡាកររូបនេះវាយសន្ធាប់បានល្អ បើទោះជាមុននេះបន្តិចមិនសូវបានឡើងរេញ ព្រោះតែពិបាករកគូប្រកួត ដែលអាចបណ្ដាលឱ្យដៃជើងស្ពឹកស្រពន់ជាងមុន ក្ដី ។
លោកថា កីឡាករកម្ពុជារូបនេះ នៅតែខ្លាំង ហើយទុកចិត្តបាន ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ ។ គូនេះជាជំនួបអ្នកខ្លាំងប៉ះអ្នកខ្លាំង ទើបលោករំពឹងថា ការប្រកួតរបស់គូនេះពិតជាល្អត្រូវចិត្ត ។ ក្នុងជំនួបគូនេះ កីឡាករថៃ Deun Chhunlek ធ្លាប់ប្រកួត៧៥លើក ឈ្នះ៦៤លើក ចាញ់១០លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួត៩១លើក ឈ្នះ៨០លើក ចាញ់៩លើក និងស្មើ២លើក ដែលមានន័យថាកីឡាករកម្ពុជា មានប្រៀបល្អជាង ។ ទោះបីយ៉ាងណា កីឡាករកម្ពុជាមិនទាន់ប្រាកដថាអាចឈ្នះ១០០ភាគរយនោះទេ ក្នុងពេលកីឡាករថៃក៏មានសមត្ថភាពខ្ពស់ ហើយកម្លាំងស៊ុហ្វក៏ល្អបែបហ្នឹងនោះ ។
សម្រាប់កីឡាករ ហ៊ឹម សេរី លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះ Phat Ek នៅក្នុងព្រឹត្តិការណ៍ប្រដាល់អន្តរជាតិរបស់ស្រាបៀរBlack Cat នៅយប់ថ្ងៃអាទិត្យនោះដែរ ។
ការប្រកួតរបស់គូនេះនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែល ហ៊ឹម សេរី ឡើងកូដ តែពេលខ្លះល្អ ពេលខ្លះធ្លាក់ដៃ ពិបាកប៉ាន់ស្មានពីកម្រិតប្រកួត១០០ភាគរយ ហើយកីឡាករថៃក៏មិនណយ ។ លោកថា កីឡាករថៃធ្លាប់ប្រកួត៥៩លើក ឈ្នះ៤៩លើក ចាញ់១១លើក និងមិនដែលស្មើ រីឯកីឡាករកម្ពុជាធ្លាប់ប្រកួត៧២លើក ឈ្នះ៦២លើក ចាញ់៩លើក និងមិនដែលស្មើដូចគ្នា ៕
ចែករំលែកព័តមាននេះ