រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១១ មីនា ស្អែកនេះ អ្នកប្រដាល់ជើងខ្លាំងកម្ពុជា៣រូប ត្រូវបានគេផ្គូផ្គងឱ្យជួបប្រកួតជាមួយកីឡាករថៃ ដោយរំពឹងថា
រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១១ មីនា ស្អែកនេះ អ្នកប្រដាល់ជើងខ្លាំងកម្ពុជា៣រូប ត្រូវបានគេផ្គូផ្គងឱ្យជួបប្រកួតជាមួយកីឡាករថៃ ដោយរំពឹងថា ពួកគេពិតជាមិនធ្វើឱ្យអ្នកគាំទ្រខកចិត្តឡើយ ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើលថាតើកីឡាករកម្ពុជាទាំង៣រូបនេះនរណាខ្លះសម្រេចគោលដៅតាមការអះអាងរបស់ខ្លួន ខណៈកីឡាករថៃដែលពួកគេត្រូវជួបនៅពេលនេះគឺសុទ្ធតែមានសមត្ថភាពខ្លាំងមិនអាចមើលស្រាលបានបែបហ្នឹងនោះ ។
គូអន្តរជាតិទី១ កីឡាករ អ៊ុំ ចំរើន មកពីក្លិបតាឡីដំរីមានឫទ្ធិ ជួបប្រកួតជាមួយអ្នកប្រដាល់ថៃឈ្មោះ Denlakngo Louklakngo ក្នុងប្រភេទទម្ងន់៦៩គីឡូក្រាម ។ អ៊ុំ ចំរើន ធ្លាប់ប្រកួត៩០ដង ឈ្នះ៧៩ដង ចាញ់៩ដង ស្មើ២ដង និងធ្លាប់ផ្តួលគូប្រកួតឱ្យសន្លប់២៣ដង ក្នុងពេលកីឡាករថៃធ្លាប់ប្រកួត៩០ដងដូចគ្នា ឈ្នះ៧០ដង ចាញ់១៦ដង ស្មើ៤ដង និងផ្តួលគូប្រកួតឱ្យសន្លប់១០ដង ។
គូអន្តរជាតិទី២ កីឡាករ ផាន់ គ្រាន់ មកពីក្លិបពុទ្ធសិរីវង្សព្រែកតាទែន ជួបប្រកួតជាមួយកីឡាករថៃឈ្មោះ Say Thonglek ក្នុងប្រភេទទម្ងន់៦៧គីឡូក្រាម ។ ផាន់ គ្រាន់ ធ្លាប់ប្រកួត៥៥ដង ឈ្នះ៤០ដង ចាញ់១១ដង ស្មើ៤ដង និងធ្លាប់ផ្តួលគូប្រកួតឱ្យសន្លប់១៥ដង ក្នុងពេលកីឡាករថៃរូបនេះធ្លាប់ប្រកួត៨២ដង ឈ្នះ៦០ដង ចាញ់២០ដង ស្មើ២ដង និងធ្លាប់ផ្តួលគូប្រកួតឱ្យសន្លប់៥ដង ។
គូអន្តរជាតិទី៣ កីឡាករ ឃុន សំខាន់ មកពីក្លិបកងពលតូចលេខ៧០ ប្រកួតជាមួយកីឡាករថៃឈ្មោះ Chanchai Sit Nayukthai ក្នុងប្រភេទទម្ងន់៦៧គីឡូក្រាម ។ ឃុន សំខាន់ ធ្លាប់ប្រកួត៨៨ដង ឈ្នះ៦២ដង ចាញ់២៣ដង ស្មើ៣ដង និងធ្លាប់ផ្តួលគូប្រកួតឱ្យសន្លប់១៣ដង ក្នុងពេលកីឡាករថៃធ្លាប់ប្រកួត៩១ដង ឈ្នះ៦១ដង ចាញ់២៧ដង ស្មើ៣ដង ។
ចំណែកគូប្រកួតមិត្តភាពធម្មតាវិញតម្រូវទៅលើកីឡាករ ជឹម ចិត្រា មកពីក្លិបខ្លារខិនមានឫទ្ធិ ប្រកួតជាមួយកីឡាករ រិទ្ធ មុន្នី មកពីក្លិបមកុដរាជសីហ៍ ។
នៅលើសង្វៀនដដែលតែថ្ងៃអាទិត្យទី១២ មីនា ក៏មានកម្មវិធីប្រកួតប្រដាល់ជាលក្ខណៈមិត្តភាពប្រជុំដោយកីឡាករខ្លាំងៗក្នុងស្រុកជាច្រើនគូ ។ កីឡាករ ទីន ណាថៃ មកពីក្លិបទីបញ្ជាការកងទ័ពជើងទឹក ប្រកួតជាមួយកីឡាករ ហូ សុភា មកពីក្លិបឃ្លាំងមឿងកីឡា ។ កីឡាករ អេ សារ័ត្ន មកពីក្លិបអេភូថងកីឡា ប្រកួតជាមួយកីឡាករ ឡុង សុភ័ស្ស មកពីក្លិបសាលវ័ន្តកីឡា ។ កីឡាករ តាំង សីហា មកពីក្លិបកងពលតូចលេខ៧០ ប្រកួតជាមួយកីឡាករ កូយ ឡាយ មកពីក្លិបទ័ពពិសេសឆត្រយោង៩១១ ។
កីឡាករ ឃន គឹមហេង មកពីក្លិបតាព្រហ្មមានជ័យ ប្រកួតជាមួយកីឡាករ ងួន គា មកពីក្លិបតាឡីដំរីមានឫទ្ធិ និងគូចុងក្រោយកីឡាករ ព្រំ វី មកពីក្លិបទីបញ្ជាការកងទ័ពជើងទឹក ប្រកួតជាមួយកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ