ប្រទេសម៉ិកស៊ិក ៖ ផែនការនេះអាចជួយឱ្យការនាំចេញអង្ករពីវៀតណាម ស្ទុះងើបឡើងវិញ បន្ទាប់ពីធ្លាក់ចុះរយៈពេល៨ឆ្នាំមកនេះ ។
រដ្ឋាភិបាលម៉ិកស៊ិកបានបើកភ្លើងខៀវដល់ការនាំចូលអង្ករចំនួន១៥ម៉ឺនតោនដោយគ្មានពន្ធនាំចូលដើម្បីបំពេញតម្រូវការក្នុងស្រុក និងការធ្វើពិពិធកម្មប្រភពផ្គត់ផ្គង់របស់ខ្លួន។ វាជាការកាត់បន្ថយចំណែកទីផ្សារបច្ចុប្បន្នរបស់សហរដ្ឋអាមេរិកនិងបើកទ្វារសម្រាប់អង្ករវៀតណាម។ នេះបើយោងតាមការលើកឡើងរបស់រដ្ឋាភិបាលម៉ិកស៊ិក និងពាណិជ្ជករ ។
រដ្ឋាភិបាលម៉ិកស៊ិកបាននិយាយក្នុងសេចក្តីថ្លែងការណ៍ចេញផ្សាយលើកាសែត Official Gazette កាលពីថ្ងៃទី១ មីនា ថា ការនាំចូលទាំងស្រូវ និងអង្ករអាចនឹងធ្វើឡើងនៅមុនចុងឆ្នាំ២០១៧ ។
សេចក្តីថ្លែងការណ៍នេះឱ្យដឹងថា ទោះបីជាទិន្នផលស្រូវម៉ិកស៊ិកកើនឡើងជាង៨%ក្នុងមួយឆ្នាំ ពីឆ្នាំ២០១២-២០១៦ក្តី ប៉ុន្តែវាមិនអាចបំពេញតម្រូវការក្នុងស្រុកបានទេ ហើយប្រទេសនេះនៅតែត្រូវការនាំចូលអង្ករជាង៨២,៦% ។
ម៉ិកស៊ិកនាំចូលស្រូវតែពីសហរដ្ឋអាមេរិក និងអង្ករពីប្រទេសអ៊ុយរូហ្គាយ តាមរយៈការចុះហត្ថលេខាលើកិច្ចព្រមព្រៀងពាណិជ្ជកម្មសេរី។ នេះបើតាមក្រសួងឧស្សាហកម្ម និងពាណិជ្ជកម្មវៀតណាម ។
ថៃ ជាប្រទេសនាំចេញអង្ករធំជាងគេទី២លើពិភពលោក បន្ទាប់ពីប្រទេសឥណ្ឌា ក៏បានលក់អង្ករគ្រាប់វែងរបស់ខ្លួនទៅឲ្យម៉ិកស៊ិកផងដែរ ។
ផែនការនាំចូលដោយគ្មានការបង់ពន្ធនេះ អាចជួយបង្កើនការនាំចេញអង្ករពីវៀតណាម ដែលជាប្រទេសនាំចេញអង្ករធំជាងគេទី៣លើពិភពលោក បន្ទាប់ពីបាត់បង់ចំណាត់ថ្នាក់ក្នុងឆ្នាំ២០១៥ ជាអ្នកផ្គត់ផ្គង់ធំបំផុតទី២របស់ម៉ិកស៊ិក ខណៈពន្ធនាំចូលអង្ករស្មើ២០% ។
ប្រទេសវៀតណាមបានលក់អង្ករចំនួន៦ម៉ឺន៧ពាន់តោនទៅឲ្យម៉ិកស៊ិកក្នុងឆ្នាំ២០១៤ កើនឡើងពី១ម៉ឺន២ពាន់តោនកាលពីឆ្នាំមុនមួយទៀត ។ នេះបើតាមសហព័ន្ធអង្ករ និងតំណាងឱ្យឧស្សាហកម្មស្រូវអង្ករសហរដ្ឋអាមេរិក ។
ស្ថាប័នឧស្សាហកម្មអាមេរិកបានលើកឡើងក្នុងរបាយការណ៍ខែកុម្ភៈ លើគេហទំព័រថា ខណៈផែនការរបស់រដ្ឋាភិបាលម៉ិកស៊ិកមិនអាចបង្កើនការនាំចេញអង្ករពីវៀតណាមភ្លាមៗ ប៉ុន្តែក៏ធ្វើឱ្យអាមេរិកភ័យខ្លាចដែរ ព្រោះនឹងកាត់បន្ថយការនាំចូលអង្ករពីអាមេរិក ដែលជាធម្មតាមានចំនួនប្រហែល៨០ម៉ឺនតោនក្នុងមួយឆ្នាំ ។
លោក Brian King ប្រធានសហព័ន្ធអង្ករអាមេរិក និងជាអនុគណៈកម្មការលើកកម្ពស់ប្រទេសលោកខាងលិចនៃសហព័ន្ធអង្ករអាមេរិក ត្រូវបានគេដកស្រង់សម្តី ខណៈលោកថ្លែងក្នុងរបាយការណ៍ចេញផ្សាយនាថ្ងៃទី២ មីនាថា ៖ « អស់រយៈពេលជាយូរមកហើយ ដែលម៉ិកស៊ិកបានក្លាយជាទីផ្សារស្រូវស្ទើរតែទាំងស្រុងសម្រាប់ក្រុមហ៊ុននាំចេញរបស់អាមេរិក » ។
លោកបន្តថា ៖ « ខណៈសហរដ្ឋអាមេរិកនៅតែត្រួតត្រាលើទីផ្សារស្រូវ អ៊ុយរូហ្គាយបានដណ្ដើមកន្លែងអាមេរិក ខណៈអង្កររបស់ប្រទេសនេះមានគុណភាពល្អជាងមុន ។ កាលពីឆ្នាំមុន អង្ករអាមេរិកដែលនាំចេញទៅម៉ិកស៊ិកបានធ្លាក់ចុះដល់កម្រិតទាបបំផុត គឺស្មើត្រឹម៤ម៉ឺន៩ពាន់តោនប៉ុណ្ណោះ » ។
របាយការណ៍របស់សហព័ន្ធឲ្យដឹងថា ទោះជាយ៉ាងណា ការកើនឡើងនៃការនាំចូលអង្ករពីអាស៊ី គឺពិតជាការគំរាមកំហែងមួយ ។
ពាណិជ្ជករវៀតណាមនៅក្រុមហ៊ុនបរទេសក្នុងទីក្រុងហូជីមិញនិយាយថា ៖ « ទោះបីជាផែនការរបស់ម៉ិកស៊ិកមានបរិមាណតូច តែវាបានជំរុញដល់ទីផ្សារអង្ករវៀតណាម ខណៈមានការលូតលាស់យឺតនៅឆ្នាំនេះ » ។
ប្រទេសម៉ិកស៊ិកនិយាយថា ខ្លួននឹងអនុញ្ញាតឱ្យនាំចូលអង្ករ៣លើក ដោយ១លើកស្មើ១ម៉ឺនតោន នៅមុនថ្ងៃទី៣១ ធ្នូ ២០១៧ ៕
ចែករំលែកព័តមាននេះ