រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍រំពឹងថា មនុស្សចន្លោះពី៦ទៅ៧ម៉ឺននាក់នឹងចូលរួមកម្សាន្ដក្នុងពិធីបុណ្យទន្លេនៅខេត្តស្ទឹងត្រែង ដែលនឹងប្រារព្ធធ្វើចាប់ពីថ្ងៃទី២៤ ដល់២៦ មីនា ខាងមុខនេះ ។
រដ្ឋមន្ត្រីក្រសួងទេសចរណ៍ លោក ថោងខុន បានថ្លែងឲ្យដឹងតាមទូរស័ព្ទកាលពីព្រឹកថ្ងៃទី៩ មីនា ម្សិលមិញថា ខេត្តស្ទឹងត្រែងមានមនុស្សរស់នៅតិច ដូច្នេះលោកមិនរំពឹងថា មានមនុស្សច្រើនទៅចូលរួមពិធីបុណ្យនេះទេ ប៉ុន្តែប្រជាពលរដ្ឋមកពីបណ្តាខេត្តនៅជុំវិញនេះ អាចនឹងមកចូលរួម ដោយសារហេដ្ឋារចនាសម្ព័ន្ធតភ្ជាប់នៅតំបន់ភូមិភាគឦសានកាន់តែងាយស្រួល ។ លោកបន្តថា ប្រតិភូសិល្បៈមកពីប្រទេសវៀតណាម និងឡាវនឹងមកចូលរួមសម្តែងសិល្បៈ វប្បធម៌របស់ពួកគេក្នុងរយៈពេលបីថ្ងៃនេះ បន្ថែមលើព្រឹត្តិការណ៍កីឡា និងសិល្បៈ ដែលកម្ពុជាបានរៀបចំជាច្រើនទម្រង់ ។
លោកថ្លែងថា ៖ « គោលដៅនៃការរៀបចំពិធីបុណ្យទន្លេ ធ្វើឡើងដើម្បីផ្សព្វផ្សាយពីសក្តានុពលភូមិភាគឦសាន ដែលជាតំបន់អេកូទេសចរណ៍ដ៏ធំមួយរបស់កម្ពុជា ដោយសារខេត្តនេះមានអន្លង់ផ្សោត ទឹកធ្លាក់សុភមិត្រ និងតំបន់សត្វស្លាបកម្រជាដើម » ។ លោកបន្តទៀតថា ៖ «ជាមួយគ្នានេះ កម្ពុជាក៏ផ្សព្វផ្សាយ និងសហការជាមួយប្រទេសឡាវ ក្នុងក្របខ័ណ្ឌតំបន់ត្រីកោណអភិវឌ្ឍន៍ ព្រោះខេត្តស្ទឹងត្រែងជាចំណុចប្រសព្វដ៏សំខាន់សម្រាប់ខ្សែទស្សនកិច្ចចេញពីវត្តភូ មកកាន់ខេត្តស្ទឹងត្រែង ភ្ជាប់ទៅខេត្តព្រះវិហារ និងខេត្តសៀមរាប » ។
បច្ចុប្បន្ន មានភ្ញៀវទេសចរអឺរ៉ុបជាច្រើន បានឆ្លងកាត់តាមបណ្តាញខ្សែទស្សនកិច្ចនេះ តាមរយៈការភ្ជាប់ខេត្តស្ទឹងត្រែងឆ្ពោះមកកាន់ខេត្តក្រចេះ ទៅទស្សនកិច្ចនៅតំបន់អន្លង់ផ្សោត និងងាកមកកាន់ខេត្តស្ទឹងត្រែងភ្ជាប់ជាមួយខេត្តកំពង់ធំ ព្រះវិហារ និងខេត្តសៀមរាប ពោលគឺនៅតាមបណ្តាញផ្លូវនេះមានខ្សែទស្សនកិច្ចជាច្រើនកំពុងត្រូវបានធ្វើឡើងរវាងប្រទេសឡាវ និងកម្ពុជា ដោយសារហេដ្ឋារចនាសម្ព័ន្ធតភ្ជាប់ និងនៅតាមបណ្តាញផ្លូវជាតិតភ្ជាប់តំបន់នេះមានទេសភាពល្អធ្វើឲ្យភ្ញៀវគ្មានការធុញទ្រាន់ក្នុងការធ្វើដំណើរទេ ។ នេះបើតាមរដ្ឋមន្ត្រីទេសចរណ៍បានបញ្ជាក់ ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា ថ្លែងថា ពិធី បុណ្យទន្លេជាផលិតផលទេសចរណ៍ល្អមួយ ព្រោះវានឹងជួយដល់សហគមន៍ទេសចរណ៍ និងទាក់ទាញទេសចរណ៍ខេត្តចំនួន៥ ទៅ៦នៅជុំវិញខេត្តឲ្យមានការចាប់អារម្មណ៍ព្រឹត្តិការណ៍នេះ ។
លោកបន្តថា រមណីយដ្ឋានទេសចរណ៍នៅតំបន់នេះមានភាពទាក់ទាញ ប៉ុន្តែតំបន់មួយចំនួនមិនទាន់កែច្នៃ និងរៀបចំឲ្យបានល្អប្រសើរនៅឡើយទេ ដោយសារស្ថាប័នថ្នាក់ក្រោមជាតិ គ្មានថវិកាសម្រាប់វិនិយោគឬកែច្នៃអ្វីបាន គួបផ្សំនឹងអាជ្ញាធរមូលដ្ឋានថ្នាក់ខេត្ត-ស្រុកដេកលក់ទៀត គឺធ្វើឲ្យតំបន់ទេសចរណ៍មួយចំនួនរៀបចំមិនបានល្អតាមស្តង់ដាសុវត្ថិភាពម្ហូបអាហារ អនាម័យ ហើយបញ្ហាសំរាមកំពុងក្លាយជាកង្វល់ដ៏ធ្ងន់ធ្ងរមួយ ។
លោកបន្ថែមថា តំបន់ភូមិភាគឦសានពិតជាបានភ្ជាប់ហេដ្ឋារចនាសម្ព័ន្ធល្អប្រសើរ ដែលភ្ញៀវទេសចរអាចចេញពីទីរួមខេត្តមណ្ឌលគិរី កាត់តាមស្រុកកោះញែក មកកាន់ខេត្តរតនគិរី និងខេត្តស្ទឹងត្រែង ប៉ុន្តែអ្វីដែលកម្ពុជាទទួលបានផលប្រយោជន៍ពីវិស័យទេសចរណ៍មានកម្រិតនៅឡើយ ដោយសារភាពគ្មានសណ្តាប់ធ្នាប់នៃការធ្វើដំណើរបានធ្វើឲ្យប៉ះពាល់ដល់សុវត្ថិភាពភ្ញៀវក្នុងស្រុក និងភ្ញៀវទេសចរបរទេស ៕
ចែករំលែកព័តមាននេះ