រាជធានីភ្នំពេញ៖ ដើម្បីចូលរួមចំណែក ជួយដល់សង្គមកម្ពុជា ដូចជាជួយកុមារកំព្រា ចាស់ជរា និងមន្ទីរពេទ្យគន្ធបុប្ផា សហភាពសហព័ន្ធ យុវជនកម្ពុជា (ស.ស.យ.ក) នឹងរៀបចំកម្មវិធីមួយ «ភ្នំពេញរាត្រីសប្បុរសធម៌» នៅរាត្រីថ្ងៃទី ១១ មីនា ឆ្នាំ ២០១៧ នៅពហុកីឡាដ្ឋានជាតិអូឡាំពិក ប្រមូលមូលនិធិពីការលក់សំបុត្រចូលទស្សនាការប្រគុំតន្ត្រី និងការចូលរួមបរិច្ឆាគរបស់មហាជនទូទៅ យកទៅជួយកុមារកំព្រា ចាស់ជរា ព្រមទាំងមន្ទីរពេទ្យគន្ធបុប្ផាផងដែរ ។
នៅក្នុងសន្និសីទសារព័ត៌មានមួយកាលពីថ្ងៃទី ០៧ មីនា ២០១៧ នៅស្នាក់ការសហភាពសហពន្ធ័យុវជនកម្ពុជារាជធានីភ្នំពេញ លោក ស្រ៊ី គឹមយូ តំណាងសហភាពសហព័ន្ធ យុវជនកម្ពុជា បានឱ្យដឹងថា នេះគឺជាលើកទី៤ ហើយ ដែលកម្មវិធីមនុស្សធម៌ ដែល សហភាពសហពន្ធ័យុវជនកម្ពុជា បានធ្វើ តាមរយៈការ រៃអង្គាស ជា សម្ភារៈ និង ថវិកាពីសប្បុរសជននានា ដើម្បីជួយដល់កុមារកំព្រា កុមារផ្ទុកមេរោកអេដស៍ កុមារខ្សោយសតិបញ្ញា និងចាស់ជរាគ្មានទីពឹង ១.៣០០ នាក់ មណ្ឌលកុមារកំព្រាចំនួន ៨ សមាគមអភិរក្សស៊ីក្លូ និងមន្ទីរពេទ្យគន្ធបុប្ផាផងដែរ ។
លោកបានបន្ដថា ព្រឹត្តិការណ៍លើកនេះ នឹងធ្វើជាថ្មីទៀតតាមរយៈការប្រគុំតន្ត្រី និងលក់សំបុត្រដែលមាន ចាប់ពី៥ពាន់រៀល ដល់ ២ម៉ឺន រៀល ហើយសម្រាប់លើកនេះមានលក្ខណៈខុសប្លែក ពីលើកមុនៗ ដោយមានការប្រគុំតន្រី្ត នឹងមានការបង្ហាញ ជាសិល្បៈបុរាណ ដូចជាចាប៉ី ល្ខោនខោល ស្គរធំ ដែលអាចឱ្យយុវជន និងមហាជន បានយល់ច្បាស់ អំពីសិល្បៈវប្បធម៌ អរិយធម៌ និងប្រពៃណីខ្មែរ ។
តាំងនាមឱ្យសហភាពសហពន្ធ័យុវជនកម្ពុជា លោក ស្រ៊ី គឹមយូ បានអំពាវនាវឱ្យ បងប្អូនប្រជាពលរដ្ឋទាំងអស់ ចូលរួមនៅក្នុងកម្មវិធីសប្បុរសធម៌នេះ ឱ្យច្រើន ព្រោះថាថវិកាដែលបានមកពីការលក់សំបុត្រជូនបងប្អូន គឺជាការចូលរួមជួយដល់ក្នុងសកម្មភាព សប្បុរសធម៌ នៅក្នុងសង្គមកម្ពុជា ស្របទៅតាមប្រពៃណីរបស់ខ្មែរ ដែលមានវប្បធម៌ចែករំលែក និងជួយគ្នាទៅវិញទៅមក ៕
ចែករំលែកព័តមាននេះ