រាជធានីភ្នំពេញ ៖ នៅលើសង្វៀនទូរទស្សន៍ភីអិនអិន ថ្ងៃអាទិត្យ ទី១២ មីនា កីឡាករជើងខ្លាំងកម្ពុជា២រូប គឺធន់ ចាន់តាក់ និងឡុង សុភី ត្រូវបានគណៈកម្មការរៀបចំការប្រកួតសម្រេចផ្គូផ្គងឱ្យជួបប្រកួតជាលក្ខណៈមិត្តភាពអន្តរជាតិជាមួយកីឡាករថៃ ។ អ្នកនិយមទស្សនាកីឡាប្រដាល់ភាគច្រើនកំពុងតែរង់ចាំមើល ថាតើកីឡាករកម្ពុជាទាំង២រូបនេះ អាចសម្រេចគោលដៅរបស់ខ្លួន ឬយ៉ាងណា ខណៈកីឡាករថៃដែលពួកគេត្រូវជួបនៅពេលនេះ ហាក់មានសមត្ថភាពពិបាកផ្ដួលអ៊ីចឹងនោះ ។
គូរអន្ដរជាតិទី១ កីឡាករធន់ ចាន់តាក់មកពីសមាគកីឡាប្រដាល់ក្រសួងការពារជាតិប្រកួតជាមួយកីឡាករថៃឈ្មោះផេត ណាំនឹង ក្នុងប្រភេទទម្ងន់៦៣,៥គីឡូក្រាម ។ កីឡាករថៃរូបនេះធ្លាប់មកប្រកួតនៅស្រុកខ្មែរ២-៣លើកដែរ ប៉ុន្តែមិនធ្លាប់ជួបធន់ ចាន់តាក់ នោះទេ ។ បើតាមអ្នករៀបចំការប្រកួតបានប្រាប់ឱ្យដឹងថាកីឡាករថៃរូបនេះគឺជាជើងខ្លាំងមួយរូបនៅក្នុងប្រទេសថៃដែលមានស្នៀតកែងនិងជង្គង់ល្អគួរសម កម្លាំងក៏ខ្លាំងថែមទៀត ។ ចំណែកធន់ ចាន់តាក់ ថ្វីដ្បិតតែគេទើបតែលេចមុខនៅលើសង្វៀនក្នុងរយៈពេលខ្លីក៏ពិតមែន តែល្បិចប្រយុទ្ធរបស់កីឡាកររូបនេះមិនចាញ់អ្នកប្រដាល់ជើងចាស់ប៉ុន្មានឡើយ ។ ផ្លែកែង និងជង្គង់ក៏ល្អគួរសម កម្លាំងខ្លាំង ចលនាវាយចេញក៏រហ័សរហួនថែមទៀត ។ ម្យ៉ាងវិញទៀតគេមានទម្លាប់ល្អមួយ គឺមិនចេះមើលស្រាលលើគូប្រកួតទេ ។ ចាំមើលធន់ ចាន់តាក់ អាចផ្ដួលកីឡាករថៃរូបនេះបានឬអត់ ។
គូអន្តរជាតិទី២ កីឡាករ ឡុង សុភី មកពីក្លិបសាលវ័ន្តកីឡា ជួបប្រកួតជាមួយកីឡាករថៃឈ្មោះផ្លាយ ផ្សាក់ ក្នុងប្រភេទទម្ងន់៦៩គីឡូក្រាម ។ ឡុង សុភី ជាអ្នកប្រដាល់ចាស់វស្សាមួយរូបដែលពិបាករកគូប្រកួតជាមួយ ក្នុងប្រភេទទម្ងន់ដូចគ្នាអត់មានអ្នកណាមានសមត្ថភាពផ្ដួលគេនោះទេ ។ ប៉ុន្តែមួយរយៈចុងក្រោយមកនេះ ថ្វីដៃប្រកួតនៅលើសង្វៀនរបស់គេរាងចុះខ្សោយជាងមុនបន្តិចហើយ ។ ទោះបីជាយ៉ាងណា អ្នកគាំទ្រនៅតែចាត់ទុករូបគេជាខ្លាចាស់កំពូលល្បិចមួយរូប ដែលមានស្នៀតប្រយុទ្ធនៅលើសង្វៀនល្អគ្មានគូប្រៀបដដែល ។ សម្រាប់ការជួបកីឡាករថៃលើកនេះ មិនដឹងថា គេអាចយកឈ្នះបានឬអត់នោះទេ ក្នុងពេលកីឡាករថៃអត់មានអ្នកណាស្គាល់ពីប្រវត្តិប្រកួតច្បាស់លាស់ ព្រោះតែមិនធ្លាប់មកប្រកួតនៅស្រុកខ្មែរពីមុនមក ។ ប៉ុន្តែបើតាមការអះអាងពីអ្នករៀបចំការប្រកួតថា កីឡាករថៃរូបនេះក៏ជាជើងខ្លាំងម្នាក់ដែរ បើមិនដូច្នោះទេគេក៏មិនហ៊ានដាក់ឱ្យប្រកួតជាមួយឡុង សុភី នោះដែរ ។
ចំណែកគូប្រកួតមិត្តភាពធម្មតាវិញ កីឡាករ ពេជ្រ ប៊ុនឆេន មកពីក្លិបកងពលធំអន្តរាគមន៍លេខ២ ប្រកួតជាមួយកីឡាករ ចាន់ រតនៈ មកពីក្លិបកងពលតូចអន្តរាគមន៍លេខ៨ភ្នំទ្រព្យ និងកីឡាករ គង់ វិរៈ មកពីក្លិបសុភានូមានជ័យ ប្រកួតជាមួយកីឡាករ ធន់ មករា មកពីក្លិបកងពលធំអន្តរាគមន៍លេខ២ ៕
ចែករំលែកព័តមាននេះ