ខេត្តសៀមរាប ៖ ភ្នាក់ងារសហប្រតិបត្តិការអន្តរជាតិកូរ៉េ ហៅកាត់ថា KOICA តាមរយៈមូលនិធិបេតិកភណ្ឌវប្បធម៌កូរ៉េ KCHF បានសហការជាមួយអាជ្ញាធរជាតិអប្សរា ក្នុងការជ្រើសរើសក្រុមប្រាសាទព្រះពិធូរ
ខេត្តសៀមរាប ៖ ភ្នាក់ងារសហប្រតិបត្តិការអន្តរជាតិកូរ៉េ ហៅកាត់ថា KOICA តាមរយៈមូលនិធិបេតិកភណ្ឌវប្បធម៌កូរ៉េ KCHF បានសហការជាមួយអាជ្ញាធរជាតិអប្សរា ក្នុងការជ្រើសរើសក្រុមប្រាសាទព្រះពិធូរមកអភិរក្សជួស ជុល ។ ក្នុងជំហានដំបូងគម្រោងនេះបានជ្រើសរើសយករានហាលនៃប្រាសាទកោរសក់ ដើម្បីជួសជុលដែលនឹងត្រូវចំណាយពេលប្រមាណ៣ឆ្នាំពីឆ្នាំ២០១៥ ដល់ឆ្នាំ២០១៨ ។
ទន្ទឹមគ្នានឹងការងារស្រាវជ្រាវចងក្រងឯកសារអភិរក្សជួសជុលគម្រោងនេះក៏បានផ្តោតការយកចិត្តទុកដាក់ខ្លាំងលើការងារបណ្តុះបណ្តាលមន្ត្រីបុគ្គលិកនៃអាជ្ញាធរជាតិអប្សរា។ ជាក់ស្តែងពីថ្ងៃទី៣ដល់ទី៩ ខែមីនា ឆ្នាំ២០១៧នេះ វគ្គបណ្តុះបណ្តាលស្តីពីការវាស់ស្ទង់ស្រទាប់ដីជំហានទី២ បានរៀបចំឡើងដល់បុគ្គលិកជំនាញចំនួន១០រូបបន្តទៀត ។
អ្នកគ្រប់គ្រងគម្រោងជួសជុលក្រុមប្រាសាទព្រះពិធូរ លោក Kim Jiseo បញ្ជាក់ថា វគ្គបណ្តុះបណ្តាលនេះរៀបចំឡើងដើម្បីបំប៉នសមត្ថភាពដល់មន្ត្រីជំនាញនៃអាជ្ញាធរជាតិអប្សរា ក្នុងន័យរួមចំណែកអភិវឌ្ឍធនធានមនុស្ស ក្នុងវិស័យអភិរក្ស ។ «យើងបានរៀបចំវគ្គបណ្តុះបណ្តាលជាច្រើនប្រភេទ ទាំងរយៈពេលខ្លី និងរយៈពេលវែង។ នៅទីនេះ យើងបានបណ្តុះបណ្តាលលើការងារវាស់ស្ទង់ស្រទាប់ដី និងសិក្សាពីកម្រិតទឹក ដែលមានជុំវិញរចនាសម្ព័ន្ធប្រាសាទ ។ ទៅខាងមុខទៀត យើងនឹងបណ្តុះបណ្តាលអំពីរបៀបមើលថ្ម និងបញ្ហាផ្សេងៗដែលកើតមានចំពោះថ្មប្រាសាទ។ យើងត្រូវការប្រុងប្រយ័ត្នខ្ពស់ក្នុងកិច្ចការអភិរក្សជួសជុលប្រាសាទ ដែលជាបេតិកភណ្ឌពិភពលោក» ។
លោក Jiseo បន្ថែមថា រយៈពេល៣ឆ្នាំនៃជំហានទី១នេះ អាចនឹងត្រូវចំណាយថវិកាប្រមាណជា៤លានដុល្លារសហរដ្ឋអាមេរិក ដោយ រួមបញ្ចូលទាំងការចំណាយលើការបណ្តុះ បណ្តាលការទិញសម្ភារ មន្ត្រីជំនាញ និងបុគ្គលិកជាដើម ។
សិក្ខាកាមមួយរូបដែលមកពីនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ កញ្ញាហាង សុច្ចរី និយាយថា «ការបណ្តុះបណ្តាលនេះគឺមានសារសំខាន់ណាស់សម្រាប់អ្នកជំនាញកម្ពុជាពីព្រោះកម្ពុជាជាប្រទេសមួយដែលមានប្រាសាទបុរាណច្រើនជាងគេ ជាពិសេសគឺនៅសៀមរាបនេះតែម្តង ហើយប្រាសាទបុរាណទាំងនោះមានមួយចំនួនធំមានភាពឌ្រុតទ្រោមដែលទាមទារឲ្យមានការជួសជុលឡើងវិញ ។
នៅវគ្គបណ្តុះបណ្តាលនេះនាងខ្ញុំទទួលបានចំណេះដឹងច្រើនពាក់ព័ន្ធនឹងប្រាសាទ ហើយខ្ញុំជឿជាក់ថា តាមរយៈបច្ចេកវិជ្ជា ថ្មីៗយើងនឹងធ្វើយ៉ាងណាឲ្យបានល្អប្រសើរតាមគំរូដើមរបស់បុព្វបុរសយើង និងខិតខំថែរក្សាបេតិកភណ្ឌទាំងនេះឲ្យបានល្អប្រសើរ» ៕
ចែករំលែកព័តមាននេះ