ប្រទេសអាល្លឺម៉ង់ ៖ ក្រុមហ៊ុនវិភាគទេសចរណ៍ ForwardKeys បាននិយាយកាលពីថ្ងៃចន្ទថា តម្រូវការដំណើរកម្សាន្តមកកាន់សហរដ្ឋអាមេរិកក្នុងរយៈពេលប៉ុន្មានខែខាងមុខកំពុងអន់ថយ បន្ទាប់ពីកើនឡើងនៅដើមឆ្នាំ ប៉ុន្តែភាពមិនប្រាកដប្រជាទាក់ទិននឹងបទបញ្ជាទេសចរណ៍ថ្មី អាចនឹងប៉ះពាល់ការសម្រេចចិត្តរបស់ភ្ញៀវទេសចរ ។
ក្រុមហ៊ុននេះបានវិភាគការកក់សំបុត្រយន្តហោះចំនួន១៦លានក្នុងមួយថ្ងៃ ហើយនិយាយថា ការធ្វើដំណើរទៅមកពីសហរដ្ឋអាមេរិក-មជ្ឈិមបូព៌ាបានប៉ះពាល់ខ្លាំងជាងគេ បន្ទាប់ពីលោកប្រធានាធិបតី Donald Trump សម្រេចថា នឹងហាមឃាត់ប្រជាជនពីប្រទេសកាន់សាសនាអ៊ិស្លាមចូលសហរដ្ឋអាមេរិក ។
លោក Olivier Jager ស្ថាបនិក ForwardKeys បានថ្លែងក្នុងសេចក្តីថ្លែងការណ៍ថា ៖ « ភាពមិនប្រាកដប្រជានៅមានបន្ត ហើយប្រសាសន៍របស់លោកប្រធានាធិបតីកំពុងតែបញ្ឈប់ការធ្វើដំណើរមកកាន់សហរដ្ឋអាមេរិករបស់ភ្ញៀវទេសចរ » ។
ទិន្នន័យរបស់ ForwardKeys បានបង្ហាញកាលពីខែមុនថា បន្ទាប់ពីហាមឃាត់ការធ្វើដំណើរខាងលើបានអនុម័តនាខែមករា ការធ្វើដំណើរអន្តរជាតិទៅកាន់សហរដ្ឋអាមេរិកបានធ្លាក់ចុះ៦,៥% ក្នុងរយៈពេល៨ថ្ងៃបន្ទាប់ ។
កាលពីថ្ងៃចន្ទ ForwardKeys និយាយថា ការកក់សំបុត្រយន្តហោះមកកាន់សហរដ្ឋអាមេរិកបានកើនឡើងវិញ បន្ទាប់ពីតុលាការផ្អាកការហាមឃាត់ ប៉ុន្តែបានធ្លាក់ចុះម្តងទៀតនា៩ថ្ងៃក្រោយគម្រោងហាមឃាត់ថ្មីនេះបានប្រកាសនាថ្ងៃទី១៧ កុម្ភៈ ។
សរុបមក ការកក់សំបុត្រយន្តហោះមកកាន់សហរដ្ឋអាមេរិក ក្នុងរយៈពេល៣ខែខាងមុខបានធ្លាក់ចុះ០,៤% បើធៀបនឹងឆ្នាំមុន ។
ការសិក្សានេះបង្ហាញថា ការកក់សំបុត្រយន្តហោះពីសហរដ្ឋអាមេរិកទៅកាន់មជ្ឈិមបូព៌៌ាកើនឡើង១២%បើធៀបនឹងឆ្នាំមុន ក្នុងរយៈពេល៣សប្តាហ៍មុនការហាមឃាត់ ប៉ុន្តែ៤សប្តាហ៍បន្ទាប់ពីការហាមឃាត់នេះ ចំនួនបានធ្លាក់ចុះ២៧%ឯណោះ ។
យោងតាមគេហទំព័រទេសចរណ៍ Kayak ការស្វែងរកជើងយន្តហោះពីអឺរ៉ុបមកកាន់សហរដ្ឋអាមេរិក បានធ្លាក់ចុះ១២%បន្ទាប់ពីការបោះឆ្នោត ។ សម្រាប់អាល្លឺម៉ង់ ជាប្រទេសចំណាយច្រើនជាងគេលើការធ្វើដំណើរក្នុងពិភពលោកវិញគ្មានការផ្លាស់ប្តូរទេ គឺកើនឡើង១០%ក្នុងអំឡុងពេលដូចគ្នា ៕
ចែករំលែកព័តមាននេះ