ខេត្តបាត់ដំបង ៖ នារីវ័យក្មេងម្នាក់បានព្យាយាមដើរចុះទៅមុជទឹកសម្លាប់ខ្លួនក្នុងស្ទឹងសង្កែ ដោយសារតូចចិត្តនឹងប្ដីហេងស៊យបណ្ដេញចេញពីផ្ទះ កាលពីវេលាថ្ងៃត្រង់ ថ្ងៃទី០៧ មីនា នៅក្បែរក្បាលស្ពានសម្ដេចក្រឡាហោមស ខេង ត្រើយខាងកើតស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង តែត្រូវសមត្ថកិច្ចនិងពលរដ្ឋឃើញចុះទាញដៃឡើងលើគោកវិញភ្លាមដែរ ។
លោក ប៉ាង ហៀង អធិការក្រុងបាត់ដំបងបានឲ្យដឹងថា នារីដែលចង់សម្លាប់ខ្លួននោះឈ្មោះ ថង ពៅ អាយុ២០ឆ្នាំ មានប្ដី(មិនទាន់ស្គាល់ឈ្មោះ)ស្នាក់នៅបណ្ដោះអាសន្ននៅភូមិកម្មករ សង្កាត់ស្វាយប៉ោ ក្រុងបាត់ដំបង តែស្រុកកំណើតនាងនៅឃុំមោង ស្រុកមោងឬស្សី។ លោកអធិការបានប្រាប់ថា ស្ត្រីរូបនេះបានចុះទៅក្នុងស្ទឹងសង្កែទាំងទឹកភ្នែកទឹកសំបោរ ធ្វើឲ្យមានការភ្ញាក់ផ្អើលថា នាងប៉ងមុជទឹកសម្លាប់ខ្លួន ទើបសមត្ថកិច្ចនិងពលរដ្ឋចុះជួយអន្តរាគមន៍ទាញឡើងលើគោកវិញ យកទៅសួរនាំតែម្ដងទៅ ។
សាក្សីដែលឃើញសកម្មភាពនារីរូបនេះបាននិយាយថា ដំបូងគេឃើញនារីនោះដើរឡើងដើរចុះនៅលើស្ពាន និងអង្គុយក្បែរមាត់ស្ទឹងកន្លែងកើតហេតុ ដែលបង្ហាញពីសកម្មភាពសោកសៅយ៉ាងខ្លាំង តែគ្មាននរណាម្នាក់ដឹងថា នារីមានរឿងអ្វីនោះទេ ។ ប្រភពដដែលបានបន្តថា ពេលនាងអង្គុយមួយសន្ទុះ ស្រាប់តែគេឃើញនាងងើបដើរចុះទៅក្នុងស្ទឹងសង្កែទាំងទឹកភ្នែករលីងរលោង ដែលគេសង្ស័យថា នាងច្បាស់ជាមានវិបត្តិអ្វីមួយក្នុងខ្លួន ហើយដើរចុះទៅក្នុងស្ទឹងគឺអាចនឹងសម្លាប់ខ្លួនផង ទើបគេរាយការណ៍ប្រាប់សមត្ថកិច្ចឲ្យមកជួយអន្តរាគមន៍តែម្ដងទៅ ។ ប៉ុន្តែអ្នកឃើញហេតុការណ៍ខ្លះនិយាយថា បើនាងពិតជាចង់សម្លាប់ខ្លួនមែន ម្ដេចមិនលោតពីលើស្ពាន ឬនាងមិនទាន់សម្រេចចិត្ត ឬ ដោយសារទឹកស្ទឹងរាក់ពេក ? តែយ៉ាងណានាងត្រូវបានគេសង្គ្រោះបានហើយ ។
បើតាមចម្លើយរបស់នាង ថង ពៅ បានប្រាប់សមត្ថកិច្ចថា នាងធ្វើការនៅក្នុងហាងផឹកស៊ីមួយកន្លែងក្នុងក្រុងបាត់ដំបង រីឯប្ដីរបស់នាងជាកម្មកររោងចក្រទឹកកក នៅក្នុងក្រុងដែរ។ នាងនិងប្ដីររស់នៅជាមួយគ្នាប៉ុន្មានឆ្នាំហើយ តែមិនបានរៀបការតាមច្បាប់ទម្លាប់ទេ ។ នាងនិយាយថា មួយរយៈចុងក្រោយនេះប្ដីនាងតែងរករឿងបង្កជម្លោះជាមួយនាងស្ទើររាល់ថ្ងៃ រហូតបណ្ដេញនាងចេញពីផ្ទះទៀតផង ធ្វើឲ្យនាងឈឺចាប់និងតូចចិត្តបំផុត ទើបនាងសម្រេចដើរចុះក្នុងស្ទឹងសង្កែ ដើម្បីធ្វើអត្តឃាតខ្លួនឯង តែត្រូវសមត្ថកិច្ចចុះចាប់ទាញដៃឡើងមកវិញ ។ ទោះជាបែបណាក្តី គ្រាន់តែជាការអះអាងអំពីទុក្ខសោកតែម្ខាងប៉ុណ្ណោះ រីឯរឿងពិតយ៉ាងណានោះ ទាល់តែមានការបកស្រាយពីលោកប្ដីហេងស៊យម្ខាងទៀត ទើបអាចដឹងថា ករណីនេះផ្ដើមចេញពីរឿងអ្វីពិតប្រាកដ ?
លោក ប៉ាង ហៀង អធិការក្រុងបាត់ដំបង បាននិយាយថា បើតាមការសាកសួរ អាណាព្យាបាលរបស់នាង ថង ពៅ ដែលនៅឯស្រុកកំណើត បានធ្វើចំណាកស្រុកទៅធ្វើការងារនៅប្រទេសថៃអស់ហើយ ។ លោកបញ្ជាក់ថា ក្រោយកើតហេតុ មន្ត្រីរបស់លោកបានស្វែងរកលោកប្ដីហេងស៊យរបស់នារីនោះឃើញហើយ និងបានហៅកម្មករទឹកកកប៉ុន្មាននាក់ មកសួរនាំអំពីដំណើររឿង ។ ក្រោយពីបញ្ចប់ការសួរនាំ យើងបានធ្វើការអប់រំណែនាំប្ដីប្រពន្ធទាំង២នាក់នេះ និងធ្វើកំណត់ហេតុត្រឹមត្រូវប្រគល់នាងទៅឲ្យបុរសជាប្ដីវិញផងដែរ គឺបានអប់រំណែនាំឱ្យ២នាក់ប្តីប្រពន្ធនេះរស់នៅសុខសាន្តនឹងគ្នាឡើងវិញ ឈប់បង្កើតឱ្យមានបញ្ហាទៀត ៕
ចែករំលែកព័តមាននេះ