គោលនយោបាយអន្តោប្រវេសន៍របស់លោក Trump ខុសហើយ
សហរដ្ឋអាមេរិក ៖ សេដ្ឋវិទូជាច្រើននាក់មកពីសាជីវកម្មធំៗរបស់អាមេរិកនិយាយថា គោលនយោបាយហាមឃាត់អន្តោប្រវេសន៍របស់លោកប្រធានាធិបតី Trump គឺជាកំហុសមួយ ។
សហរដ្ឋអាមេរិក ៖ សេដ្ឋវិទូជាច្រើននាក់មកពីសាជីវកម្មធំៗរបស់អាមេរិកនិយាយថា គោលនយោបាយហាមឃាត់អន្តោប្រវេសន៍របស់លោកប្រធានាធិបតី Trump គឺជាកំហុសមួយ ។
សមាគមសេដ្ឋកិច្ចអាជីវកម្មជាតិ (NABE) បានស្ទង់មតិសេដ្ឋវិទូចំនួន២៨៥នាក់មកពីក្រុមហ៊ុនធំៗ ដូចជា Wells Fargo, AT&T និង FedEx នារយៈពេលមិនយូរប៉ុន្មានបន្ទាប់ពីលោក Trump ឡើងកាន់តំណែង ។
សេដ្ឋវិទូទាំងនោះត្រូវបានសួរពីគំនិតរបស់ពួកគេលើគោលនយោបាយរបស់លោក Trump ហើយចម្លើយគឺច្បាស់ណាស់ ពួកគេមិនយល់ស្របជាមួយលោក Trump ឡើយលើបញ្ហាអន្តោប្រវេសន៍, NAFTA និងរបៀបដោះស្រាយបំណុល ។ សេដ្ឋវិទូទាំងនោះគាំទ្រគោលនយោបាយអន្តោប្រវេសន៍ធូរស្រាលដើម្បីជំរុញដល់សេដ្ឋកិច្ច ។
អ្នកចូលរួមប្រមាណ៤៩% គាំទ្រឲ្យមានការធ្វើអន្តោប្រវេសន៍ចូលមកកាន់សហរដ្ឋអាមេរិក ខណៈ២៧%ទៀតគិតថា លោក Trump មិនចាំបាច់ផ្លាស់ប្តូរគោលនយោបាយទេ ។
លោក Richard DeKaser សេដ្ឋវិទូក្នុង Wells Fargo និងជាប្រធានការស្ទង់មតិរបស់ NABE និយាយថា ៖ « អ្នកចូលរួមបានគាំទ្រចំពោះការពង្រីកកម្មវិធីវីសា H-1B ដើម្បីទទួលបានបុគ្គលិកមានជំនាញខ្ពស់ » ។ ចំណែកក្រុមអាជីវកម្មបន្តរអ៊ូថា ពួកគេមិនអាចស្វែងរកបុគ្គលិកដែលមានជំនាញគ្រប់គ្រាន់ទេ ។
កាលពីសប្តាហ៍មុន លោក Trump បានស្នើប្រព័ន្ធអន្តោប្រវេសន៍ ដោយយោងតាមគុណសម្បតិ្តដូចប្រទេសកាណាដា និងអូស្ត្រាលី។ ប្រព័ន្ធនេះនឹងអនុញ្ញាតឲ្យមនុស្សដែលមានសញ្ញាប័ត្រខ្ពស់ និងជំនាញច្បាស់លាស់ទទួលបានអាទិភាពខ្ពស់ ។
ជាមួយគ្នានេះ ៥%នៃសេដ្ឋវិទូចូលរួមនិយាយថា សហរដ្ឋអាមេរិកគួរតែចំណាយបន្ថែមដើម្បីដេញជនអន្តោប្រវេសន៍ខុសច្បាប់ចេញ ប៉ុន្តែមិនត្រឹមតែគោលនយោបាយអន្តោប្រវេសន៍របស់លោក Trump ទេ ដែលបង្កការបារម្ភដល់សេដ្ឋវិទូ ។ ជាក់ស្តែង អ្នកចូលរួម៧៨%គិតថា លោក Trump នឹងបន្ថែមបំណុលដល់សហរដ្ឋអាមេរិក តាមរយៈការចំណាយច្រើនជាងចំណូលរដ្ឋាភិបាល និងប្រាក់ចំណូលពីពន្ធ ។
សហគមន៍អាជីវកម្ម ក៏ព្រួយបារម្ភពីការជំរុញរបស់លោក Trump ក្នុងការបង្កើតឧបសគ្គពាណិជ្ជកម្ម និងសម្រេចកិច្ចព្រមព្រៀង NAFTA ឡើងវិញជាមួយម៉ិកស៊ិក និងកាណាដា។ អ្នកឆ្លើយតបភាគច្រើនបានគាំទ្រទៅលើ NAFTA ៕
ចែករំលែកព័តមាននេះ