ពិតជាកម្មក្រាស់មែនបានប្តីប្រចណ្ឌកា.ប់នាងរយះក្បាល
រាជធានីភ្នំពេញ ៖ ស្ត្រីម្នាក់ស្ថិតក្នុងស្ថានភាពរបួសក្បាលយ៉ាងដំណំបានធ្វើដំណើរមកកាន់ប៉ុស្ដិ៍ចោមចៅ ខណ្ឌពោធិ៍សែនជ័យ
រាជធានីភ្នំពេញ ៖ ស្ត្រីម្នាក់ស្ថិតក្នុងស្ថានភាពរបួសក្បាលយ៉ាងដំណំបានធ្វើដំណើរមកកាន់ប៉ុស្ដិ៍ចោមចៅ ខណ្ឌពោធិ៍សែនជ័យ កាលពីវេលាម៉ោង៥និង១៥នាទីល្ងាចថ្ងៃទី៦ មីនា ដើម្បីដាក់ពាក្យប្ដឹងសុំឲ្យនគរបាលជួយអន្តរាគមន៍ក្នុងអំពើហិង្សាដោយត្រូវប្ដីចិត្តឃោរឃៅចោទប្រពន្ធថា មានប្រុសសហាយ ក៏បានចាប់វាយ និងកាប់នាងបណ្ដាលឲ្យរយះក្បាលយ៉ាងដំណំ ព្រមទាំងបានចាក់សោបង្ខាំងទុកនៅក្នុងបន្ទប់អស់ពេញមួយយប់ទាំងការឈឺចាប់បំផុត ។ អំពើឃោរឃៅនេះបានកើតឡើងនៅកៀកនឹងថ្ងៃប្រារព្ធទិវាអន្តរជាតិសិទ្ធិនារី៨ មីនា ដែលគ្រប់ស្ថាប័នជាតិ អង្គការនានាបាននាំគ្នាប្រារព្ធទិវាដើម្បីលើកស្ទួយសិទ្ធិនារីដែលមានសិទ្ធិស្មើនឹងបុរស ។
ស្ត្រីរងគ្រោះដោយអំពើហិង្សាក្នុងគ្រួសារខាងលើនេះឈ្មោះ ស៊ុន មករា អាយុ១៨ ឆ្នាំ ជាកម្មការិនីរោងចក្រកាត់ដេរ ស្នាក់នៅបន្ទប់ផ្ទះជួលក្នុងភូមិត្រពាំងរំចេក សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅខេត្តកំពង់ស្ពឺ ។ ចំណែកលោកប្តីឈ្មោះ ពៅ យូរីម អាយុ២៦ឆ្នាំ ជាកម្មករសំណង់ មានស្រុកកំណើតនៅខេត្តព្រះសីហនុ ។
នារីរងគ្រោះបានរៀបរាប់ឲ្យដឹងថា នាងបានរៀបការតាមប្រពៃណីជាមួយនឹងបុរសឈ្មោះ ពៅ យូរីម អស់រយៈពេល២ឆ្នាំមកហើយ មានកូនស្រីម្នាក់ទើបតែមានអាយុ១ឆ្នាំប៉ុណ្ណោះ។ ដោយសារតែកត្តាជីវភាពក្រីក្រ នាងនិងប្ដីបាននាំគ្នាចាកចេញឆ្ងាយពីស្រុកកំណើត មកស្នាក់នៅផ្ទះជួលខាងលើ ដោយនាងធ្វើជាកម្មការិនីរោងចក្រកាត់ដេរ ។
ចំណែកឯប្ដីធ្វើជាកម្មករសំណង់ និងបានស្នាក់នៅជាមួយគ្នាដោយទុកកូនឲ្យម្ដាយមើលនៅឯស្រុកកំណើត ។ នាងបានខិតខំធ្វើការខ្លាំងណាស់ មិនដែលគិតអ្វីក្រៅពីការងារ និងការបម្រើប្ដីនោះទេ ហើយដំបូងឡើយប្ដីប្រពន្ធនាងស្រឡាញ់គ្នាជាធម្មតាដូចប្ដីប្រពន្ធគេដទៃទៀតដែរ ។ ប៉ុន្តែមួយរយៈពេលចុងក្រោយនេះ ប្ដីបានរករឿងរាល់ថ្ងៃមិនដែលខាន ដោយចោទប្រកាន់ទាំងអគតិថា នាងមានប្រុសសហាយក្បត់នឹងរូបគេដែលស្ថានភាពបែបនេះបានធ្វើឲ្យនាងខកចិត្តយ៉ាងខ្លាំង ព្រោះនាងស្រឡាញ់ប្ដីពេញបេះដូង កុំថាឡើយក្បត់ សូម្បីតែគិតក៏មិនធ្លាប់បានគិតផង ។ ដោយសារតែបញ្ហាប្រចណ្ឌខុសទំនងបែបនេះ បានធ្វើឲ្យនាងពិបាកចិត្តយ៉ាងខ្លាំង ។
ស្ត្រីខាងលើបានបន្តថា ពេលភ្លើងប្រចណ្ឌបានឆេះឡើងកាន់តែខ្លាំងឡើង នាងធ្វើអ្វីក៏ចេះតែខុសចិត្តប្ដីរហូតដែរ មិនចេះត្រូវទាល់តែសោះ នាងតែងតែទទួលរងការរករឿង ជេរប្រមាថគំរាមរកវាយដំ និងការចោទប្រកាន់គ្មានមូលហេតុពីសំណាក់ប្ដីជាបន្តបន្ទាប់រាល់ថ្ងៃ ប៉ុន្តែទោះជាបែបណា នាងបានខំអត់ធ្មត់គ្រប់បែប យ៉ាង ។
ដោយសារតែមានការធុញថប់ក្នុងចិត្តខ្លាំងពេក នៅល្ងាចថ្ងៃទី៥ មីនា ក្រោយពេលចេញពីធ្វើការ នាងមិនបានទៅផ្ទះនោះឡើយ គឺបានទៅលេងនៅបន្ទប់ស្ត្រីម្នាក់ជាមិត្តភក្តិរបស់នាង ដែលស្ថិតនៅជិតផ្សារទួលពង្រ ក្នុងភូមិទួលពង្រ សង្កាត់ចោមចៅ ជាប់ភូមិត្រពាំងរំចេកនោះដែរ ។ នាងបានស្ថិតនៅបន្ទប់មិត្តភក្តិជជែកគ្នាលេងរហូតដល់វេលាម៉ោង៨យប់ ទើបឲ្យស្ត្រីជាមិត្តភក្តិជូននាងទៅកាន់បន្ទប់ជួលវិញ ។ ពេលដើរមកដល់ពាក់កណ្តាលផ្លូវ ក៏ជួបប្តីរបស់នាងដែលកំពុងតាមរក ខណៈនោះបុរសជាប្ដីបានប្រាប់ឲ្យមិត្តភក្ដិស្រីនោះត្រឡប់ទៅផ្ទះវិញ និងបានឌុបនាងតាមម៉ូតូទៅបន្ទប់ជួលជាមួយគ្នាវិញ ។
នារីរងគ្រោះបានបន្តទៀតថា ខណៈពេលទៅដល់ក្នុងបន្ទប់ ស្រាប់តែប្តីបានចាក់សោទ្វារជាប់ រួចបានស្ទុះយកកាំបិតកាប់ក្បាលនាងទាំងកំរោលបណ្តាលឲ្យរយះហូរឈាមស្រោចខ្លួន និងបានគំរាមមិនឲ្យស្រែកខ្លាចភ្ញាក់ផ្អើលដល់អ្នកជិតខាង សូម្បីតែនាងសុំចេញទៅមន្ទីរពេទ្យដើម្បីព្យាបាលរបួសក៏ប្ដីមិនអនុញ្ញាតឲ្យចេញទៅដែរ ។ បន្ទាប់ពីកាប់រួច ប្ដីអគតិនោះបានចាក់សោបង្ខាំងនាងនៅក្នុងបន្ទប់អស់ពេញមួយយប់ទាំងការអត់ទ្រាំនឹងការឈឺចាប់យា៉ងវេទនាបំផុត ។ លុះព្រឹកឡើងក៏ប្ដីមិនឲ្យចេញទៅណាទាំងអស់ សូម្បីតែទៅធ្វើការ និងទៅមន្ទីរពេទ្យក្តីក៏ត្រូវហាមដាច់ខាត ។
បន្ទាប់មកនាងបានប្រើល្បិចដោយប្រាប់ថា សុំទៅបើកប្រាក់ខែយកមកចាយវាយ ទើបប្តីយល់ព្រមឲ្យចេញក្រៅ ។ ដោយមានឱកាសសមល្មមហើយ នាងបានទៅមន្ទីរពេទ្យដើម្បីព្យាបាលរបួស ក៏ត្រូវគ្រូពេទ្យដេរមុខរបួសជាង១០ថ្នេរ ហើយនាងបានទៅសម្រាកនៅបន្ទប់បងប្អូនរហូតដល់ម៉ោង៥និង១៥នាទីល្ងាចថ្ងៃ ដដែលទើបឲ្យសាច់ញាតិដឹកទៅកាន់ប៉ុស្តិ៍ចោមចៅសុំការអន្តរាគមន៍ពីនគរបាល ចាប់ប្តីអគតិនោះយកទៅផ្តន្ទាទោសតាមផ្លូវច្បាប់ តែនៅពេលសមត្ថកិច្ចទៅដល់ប្តីអន្ធពាលនោះបានគេចខ្លួនបាត់ស្រមោលទៅហើយ ៕
ចែករំលែកព័តមាននេះ