ខេត្តបាត់ដំបង ៖ សេចក្ដីរាយការណ៍បានឱ្យដឹងថា លំនៅឋានមួយខ្នង រួមទាំងរោងគោដ៏ធំមួយខ្នងទៀត ត្រូវបានអគ្គិភ័យឆេះអស់គ្មានសល់ កើតឡើងកាលពីវេលាម៉ោង៣រសៀលថ្ងៃទី០៧ មីនា ស្ថិតនៅភូមិចារ ឃុំអន្លង់រុន ស្រុកថ្មគោល ដោយសារតែផ្ទុះចង្ក្រានហ្គាស ។
ប្រភពពីមន្ត្រីមូលដ្ឋានឱ្យដឹងថា ជនរងគ្រោះជាម្ចាស់ឈ្មោះសាញ់ ផាត ប្រុស អាយុ៥១ឆ្នាំ រស់នៅភូមិ-ឃុំកើតហេតុខាងលើ។ ហើយលំនៅឋានដែលរងការខូចខាតមានទំហំ៤ម×៥ម ធ្វើពីឈើប្រក់ស័ង្កសី រោងបាយនិងរោងគោមួយខ្នងទំហំ៦×៧ម ធ្វើពីឈើប្រក់ស្បូវ បានរងការខូចខាតទាំងស្រុងតែម្ដង។
បើតាមម្ចាស់ផ្ទះបាននិយាយថា ទ្រព្យសប្បត្តិតិចតួចណាស់ ដែលអាចរំដោះបានពីចំណីភ្លើង ដោយសារតែអគ្គិភ័យនោះមានឥទ្ធិពលខ្លាំង ហើយឆេះលឿនបំផុត សូម្បីតែរថយន្តពន្លត់អគ្គិភ័យ ក៏មិនអាចជួយអន្តរាគមន៍ទាន់ពេលដែរ សំណាងល្អហើយ ដែលមិនមានគ្រោះថ្នាក់មនុស្ស ។
សូមបញ្ជាក់ថា អគ្គីភ័យនេះបានកើតឡើយ ក្រោយពីបញ្ចប់ពិធីប្រារព្វ ទិវាជាតិស្ដីពីបង្ការនិងពន្លត់អគ្គីភ័យ២២កុម្ភ: ដែលរដ្ឋបាលសាលាខេត្តបាត់ដំបង រៀបចំធ្វើកាលពីព្រឹកថ្ងៃទី០៧មិនា២០១៧៕
ចែករំលែកព័តមាននេះ