រាជធានីភ្នំពេញ ៖ ស្រីស្រស់វ័យក្មេងម្នាក់ ខណៈបើកបររួមដំណើរជាមួយយុវជនវ័យក្មេងម្នាក់ រវល់តែចុចទូរស័ព្ទច្រឡំហ្គែរ ស្មានតែហ្វ្រាំងក៏ជ្រុលទៅបុករះម៉ូតូ២គ្រឿងដួលរណូករណែលតាមផ្លូវ សំណាងល្អអ្នកជិះម៉ូតូរងរបួសស្រាលទាំងអស់គ្នា ហេតុការណ៍នេះ បង្កឱ្យមានការភ្ញាក់ផ្អើល កាលពីវេលាម៉ោង០៨យប់ថ្ងៃទី៧ មីនា ជិតរង្វង់មូលសំពៅមាស នៅចំណុចមុខកងរាជអាវុធហត្ថខណ្ឌ៧មករា តាមបណ្តោយផ្លូវ១៦១ ក្នុងសង្កាត់បឹងព្រលឹត ខណ្ឌ៧មករា ។
បើតាមសាក្សីដែលឃើញថា មុនពេលកើតហេតុ គេបានឃើញស្រីស្អាតរូបនេះ ជាអ្នកបើករថយន្តបង្ក ម៉ាកកាមរីបាឡែន ពណ៌.ស ពាក់ស្លាកលេខភ្នំពេញ2AI-8303 ធ្វើដំណើរមកតាមបណ្តោយផ្លូវ១៦១ ក្នុងទិសដៅពីត្បូងទៅជើង ។ ខណៈបើកមកដល់ចំណុចកើតហេតុ រវល់តែចុចទូរស័ព្ទច្រឡំជាន់ហ្គែរស្មានថាជាហ្វ្រាំង ក៏ជ្រុលទៅបុករះម៉ូតូ៣គ្រឿងដួលនៅមុខរថយន្ត បណ្តាលឲ្យអ្នកជិះម៉ូតូរងរបួសស្រាលទាំងអស់គ្នា ។
ក្នុងចំណោមម៉ូតូទាំង៣គ្រឿង មានម៉ាក Addcess ពណ៌ខៀវលាយខ្មៅ ពាក់ស្លាកលេខភ្នំពេញ1FM6288 បើកបរដោយស្ត្រីជាជនជាតិវៀតណាម (ខូចខាតច្រើនជាងគេ) ដួលអូសជាប់ពីមុខរថយន្ត និងម៉ូតូ២គ្រឿងទៀតម៉ាកស្មាស ពណ៌ខ្មៅ និងម៉ូតូស្មាសវី ខូចខាតបន្តិចបន្តួច ។
ទោះបីជាយ៉ាងណា ក្រោយកើតហេតុ ម្ចាស់រថយន្តគាត់មិនចង់មានរឿងរ៉ាវច្រើន ក៏យល់ព្រមសងទៅខាងម៉ូតូស្មាសវីចំនួន50$ ម៉ូតូស្មាសចំនួន១០ម៉ឺនរៀល រីឯម្ចាស់ម៉ូតូAddcessវិញ ត្រូវម្ចាស់រថយន្តគាត់ព្រមចេញថ្លៃព្យាបាលជំងឺ និងជួសជុលម៉ូតូ ដើម្បីបញ្ចប់រឿង ។
ចែករំលែកព័តមាននេះ