ខេត្ដសៀមរាប ៖ ប្រភពបែកធ្លាយចេញពីក្រុមអាជីវករនៅផ្សាររាត្រីអង្គរឃ្យុងយូ បានឱ្យដឹងថា អ្នកដើរយកលុយនៅតំបន់អង្គរឃ្យុងយូរាប់លានរៀលក្នុង១ខែៗ ពីអ្នកលក់ដូរគឺឈ្មោះ ប៊ុន សុវណ្ណ ជាមនុស្សជំនិតរបស់លោកវរសេនីយ៍ឯក កែវ រក្សា នាយការិយាល័យនគរបាលសណ្ដាប់ធ្នាប់ខេត្ត ។
ការប្រមូលប្រាក់នេះត្រូវបានប្រាប់ថា យកទៅឱ្យមេរបស់គេ ព្រោះខ្លួនជាអ្នកបោះមេក្នុងការបែងចែកលុយទាំងនេះ ទៅខាងសាលាក្រុងសៀមរាប អធិការដ្ឋានក្រុងសៀមរាប និងអភិបាលរងខេត្តទៅតាមលំដាប់លំដោយនីមួយៗ មានន័យថាជាការយកលុយទៅចែកគ្នាចាយ មិនបានបង់ប្រាក់ សូម្បីមួយរៀលមិនចូលហោប៉ៅរដ្ឋឡើយ ។
ប្រភពបានឱ្យដឹងថា តូបអ្នកលក់ដូរទាំងអស់ចំនួន៥៥១តូប តែអ្នកលក់ពិតប្រាកដ រាល់យប់មានតែជាង៤០០តូបប៉ុណ្ណោះ ហើយក្នុង១តូប ត្រូវបង់លុយឱ្យទៅសន្តិសុខ ថ្លៃអនាម័យ៥០០រៀល ថ្លៃសណ្តាប់ធ្នាប់១.០០០រៀល ។ ចំពោះថ្លៃអំពូលភ្លើង បង់ឱ្យសន្តិសុខក្នុង១យប់ចំនួន១.០០០រៀលផងដែរក្នុងមួយតូប ។
តាមប្រភពពីអាជីវករម្នាក់ សុំមិនបញ្ចេញឈ្មោះបានប្រាប់ឱ្យដឹងថា ចំណែកក្រុមអ្នកដើរយកលុយក្នុង១យប់ៗ មិនតិចជាង៣៥ម៉ឺនរៀល ហើយបើគិតក្នុង១ខែវិញ ពួកគេប្រមូលបានជាង១០លាន៥សែនរៀល ។ ប្រភពបានបន្តទៀតថា ចំពោះលុយទាំងអស់នោះ ពួកគេយកទៅចែកគ្នាប្រហែលជាមិនបង់ចូលរដ្ននោះទេមើលទៅ ហើយការឃុបឃិតគ្នានេះបានកើតមានជាយូរឆ្នាំមកហើយ បើគិតមកដល់ឆ្នាំ២០១៧នេះ ។
ពាក់ព័ន្ធនឹងការមានចម្ងល់ខាងលើនេះ លោក ស៊ូ ប្លាតុង អភិបាលក្រុងសៀមរាប បានឱ្យដឹងតាមទូរស័ព្ទនៅល្ងាចថ្ងៃទី៥ មីនា ថា អាជ្ញាធរខេត្តសៀមរាប មិនបានឱ្យយកលុយពីអាជីវករដែលលក់ដូរ នៅផ្សាររាត្រីអង្គរឃ្យុងយូនោះទេ តែបើគេគិតពីថ្លៃអនាម័យ សណ្ដាប់ធ្នាប់ ឬការយាមកាមនោះ ជារឿងក្រុមពួកគេទេ ហើយលោកក៏មិនបានបញ្ជាឱ្យពួកគេទៅយកលុយពីអាជីវករទាំងអស់នោះដែរ ទើបពុំមានលុយបង់ចូលរដ្ឋ ។ បើគេថា ខ្ញុំមានចំណែកដែរនោះ គឺខ្ញុំសូមបដិសេធទាំងស្រុងនៅក្នុងរឿងនោះ ។
ជុំវិញករណីខាងលើនេះដែរ លោក កែវ រក្សា នាយការិយាល័យនគរបាលសណ្ដាប់ធ្នាប់ខេត្ត បានបំភ្លឺតាមទូរស័ព្ទនៅថ្ងៃ៦ មីនា ថា រឿងនេះលោកមិនមានការពាក់ព័ន្ធនោះទេ បើចង់ដឹងច្បាស់ទៅសួរលោក វណ្ណ ខ្លួនឯងទៅ គាត់ជាអ្នកដើរប្រមូលលុយទាំងនេះ និងអ្នកដែលគេឱ្យសិទ្ធិគ្រប់គ្រងការងារទាំងនេះ ។
ចំណែកលោក ប៊ុន សុវណ្ណ ជាអ្នកឱ្យកូនចៅដើរប្រមូលលុយអនាម័យ នៅផ្សាររាត្រីអង្គរឃ្យុងយូ បានប្រាប់តាមទូរស័ព្ទឱ្យដឹងនៅវេលាម៉ោង១០និង២៦នាទីព្រឹកថ្ងៃទី៦ មីនា ថា សន្តិសុខរបស់លោកមាន២៤នាក់ ហើយការងារទាំងអស់នេះ គឺគោលការណ៍របស់សាលាខេត្ត មានគណៈកម្មការចំរុះចំនួន៣អង្គភាព គឺទី១ សាលាខេត្តក្រោមការដឹកនាំរបស់លោក ពៅ ពិសិទ្ធិ អភិបាលរងខេត្តសៀមរាប ។ ទី២ សាលាក្រុង គឺលោក សោម សម្បត្តិ អភិបាលរងក្រុងសៀមរាប និងខាងមន្ត្រីអាជ្ញាធរជាតិអប្សរាខេត្ត ។ លោកបានបន្តថា ការដើរប្រមូលលុយទាំងអស់នោះ គឺបានគ្រាន់តែបើកឱ្យសន្តិសុខ និងថ្លៃសម្អាតប៉ុណ្ណោះ ។ លោកបានបញ្ជាក់បន្ថែមថា ការដើរប្រមូលលុយមានថ្លៃអនាម័យ១គត់ គឺក្នុង១តូបចំនួន៥០០រៀលក្នុង១យប់ បើរឿងអីផ្សេងនោះខ្ញុំមិនបានដឹងទេ ។ ចំណែករឿងយាមរទេះរបស់អាជីវករដែលខ្ញុំបានជួលដីដើម្បីដាក់រទេះនោះ គឺខ្ញុំយកក្នុង១រទេះ តម្លៃ២ម៉ឺនរៀលក្នុង១ខែ ព្រោះខ្ញុំក៏ជួលដីគេថ្លៃដែរ ។
ចំពោះរឿងលុយរាប់លានរៀល ដែលពួកគេនិយាយ និងបង្ហោះក្នុងសង្គមហ្វេសបុកចោទថា យកទៅឱ្យលោកវរសេនីយ៍ឯក កែវ រក្សា នាយការិយាល័យសណ្តាប់ធ្នាប់ខេត្តនោះ គឺវាមិនពិតទេ ព្រោះខ្ញុំយកលុយតែអនាម័យ គ្រាន់តែចិញ្ចឹមសន្តិសុខ ដើម្បីឱ្យសម្អាតអនាម័យនៅក្នុងតំបន់ផ្សាររាត្រីអង្គរឃ្យុងយូ តែប៉ុណ្ណោះព្រោះនេះជាគោលការរបស់សាលាខេត្ត ដើម្បីឱ្យសម្អាតឱ្យអស់ ចាប់តាំងពីម៉ោង៤ទៀបភ្លឺ ដល់ម៉ោង៧ព្រឹក ធ្វើយ៉ាងណាឱ្យអស់ពីទីតាំងនោះ ។
លោក សោម សម្បត្តិ អភិបាលរងក្រុងសៀមរាប ដែលបានបំភ្លឺតាមទូរស័ព្ទនៅថ្ងៃទី៦ មីនា ថា ចំពោះរឿងលុយរាប់លានរៀលដែលយកមកចែកគ្នាស្ងាត់ៗ ដោយមិនមានបង់ចូលរដ្ឋនោះ គឺវាជារឿងខុសពីច្បាប់របស់គណៈកម្មការចម្រុះ ដែលបានប្រជុំគ្នាកាលពីកន្លងទៅ ។ លោកថា បើអញ្ចឹងមែនគឺអ្នកណាធ្វើ អ្នកនោះទទួលខុសត្រូវខ្លួនឯងទៅ ព្រោះលោកមិនបានដឹងរឿងទាំងអស់នេះទេ ។
លោកបានបន្តថា ចំពោះពួកលោកបានរៀបចំ បង្កើតគណៈកម្មការចម្រុះនោះមាន៣អង្គភាព ទី១ អង្គភាពអាជ្ញាធរជាតិអប្សរា លោក អ៊ុក សាម៉េត អគ្គនាយករង នៃអាជ្ញាធរជាតិអប្សរា ជាប្រធាន, ទី២ សាលាខេត្តសៀមរាប លោក ពៅ ពិសិទ្ធ អភិបាលរងខេត្ត ជាអនុប្រធាន និងទី៣ សាលាក្រុងសៀមរាប រូបលោកជាសមាជិក ។ បើរឿងនេះពិតដូចក្នុងបណ្ដាញសង្គមហ្វេសបុក និងអ្នកសារព័ត៌មានមួយចំនួនបានចុះផ្សាយ កាលពីពេលកន្លងទៅថ្មីៗនេះមែន លោកនឹងយកទៅរាយការណ៍ ជូនលោកប្រធានគណៈកម្មការចម្រុះ ដើម្បីលើកយកមកប្រជុំជាបន្ទាន់ជុំវិញបញ្ហានេះ ។
ចំពោះដំណើរការផ្សាររាត្រីបច្ចុប្បន្ននេះ មានរឿងរ៉ាវគួរកត់សម្គាល់១ចំនួនដូចជា កាលពីយប់ថ្ងៃទី២៣ ខែកុម្ភៈ ឆ្នាំ២០១៧ កន្លងទៅថ្មីៗនេះ សន្តិសុខនៅផ្សាររាត្រីអង្គរឃ្យុងយូ បាននាំគ្នាមកឆក់យកស្បែកជើងពីអាជីករ ប្រៀបដូចនាំគ្នាមកឆក់ប្លន់យ៉ាងដូច្នេះដែរ ខណៈពេលនោះត្រូវបានពលរដ្ឋនាំគ្នាឈរមើល ហើយពួកគេបានឆ្លើយយកលេសថា ដោយសារអ្នកមកលក់ដូរថ្មី មិនបានប្រាប់ម្ចាស់កន្លែង ។
ចំណែកម្ចាស់កន្លែងបានប្រាប់ថា គាត់ឱ្យអ្នកលក់ដូរនោះលក់បណ្តោះអាសន្នឱ្យគាត់ទេ ក្នុងរយៈពេល២ថ្ងៃ ដោយគាត់ជាប់រវល់ ។ ចំពោះសន្តិសុខវិញ បានគម្រាមប្រាប់អ្នកលក់ដូរថ្មីថា បើឱ្យពួកគេចំនួន១ម៉ឺនរៀល ទើបអាចឱ្យលក់បាន បើមិនដូច្នេះទេ មិនអនុញ្ញាតិឱ្យម្ចាស់កន្លែងមានផ្ទេរសិទ្ធិ ឬជួលឱ្យទៅអ្នកដ៏ទៃទេ គឺមានសិទ្ធិតែសន្តិសុខ១ប៉ុណ្តោះ ដែលអាចយកលុយ ឬឱ្យអ្នកណាមកលក់ទីនេះក៏បានដែរ ។ ការនិយាយបែបនេះប្រៀបដូចជាតំបន់នោះជាដីកេររបស់ខ្លួនដូច្នេះដែរ ។
មជ្ឈដា្ឋននានា ក្នុងខេត្តសៀមរាប បានសូមឱ្យអាជ្ញាធរខេត្ត ដែលមានលោក ឃឹម ប៊ុន សុង អភិបាលនៃគណៈអភិបាលខេត្តសៀមរាប មេត្តាជួយចុះមើល និងពិនិត្យជុំវីញករណីខាងលើនោះផង បើមិនដូច្នេះទេ អាជីវករដែលលក់ដូរនៅទីនោះ ប្រាកដជាត្រូវក្រុមសន្តិសុខធ្វើបាបតាមតែទំនើងចិត្ដមិនខាន ។ ចំពោះសន្តិសុខ វិញ ដែលប្រមូលយកលុយពីអាជីវកររាល់យប់ ហើយប្រាប់អ្នកព័ត៌មានថា មិនបានចំណេញផងនោះ តើបានលុយឯណាយកទៅជូនមេ ដើម្បីបានឈរជើងនៅទីនោះ ?
ចែករំលែកព័តមាននេះ