ខេត្ដកំពង់ចាម ៖ ម៉ូតូម៉ាកវ៉េវ២គ្រឿង ដូចគ្នាបានពន្លះគ្នាយ៉ាងពេញទំហឹងលាន់ ដូចរន្ទះនៅត្រង់ផ្លូវកោងមួយកន្លែង ស្ថិតនៅ ភូមិ២៥ ឃុំព្រះធាតុ ស្រុកអូររាំងឪ កាលពី វេលាម៉ោង១១និង២០នាទីយប់ ថ្ងៃទី២ មិថុនា ២០១០ បណ្ដាលឱ្យស្លាប់២នាក់ភ្លាមៗ នៅនឹងកន្លែង និងរងរបួសធ្ងន់៣នាក់ ត្រូវបាន គេនាំទៅសង្គ្រោះនៅមន្ទីរពេទ្យជាបន្ទាន់ ។ តាមការចុះត្រួតពិនិត្យរបស់សមត្ថកិច្ចឃើញថា អ្នកបើកម៉ូតូទាំងសងខាងមិនបានពាក់ មួកសុវត្ថិភាពទេ ទើបមានគ្រោះថ្នាក់ធ្ងន់ធ្ងរ បែបនេះ ។ តាមសេចក្ដីរាយការណ៍ពីលោកឡេង លាង ប្រធានប៉ូលិសសណ្ដាប់ធ្នាប់ស្រុកអូរ រាំងឪ បានឱ្យដឹងថា ជនរងគ្រោះដែលស្លាប់ ២នាក់នោះម្នាក់ឈ្មោះឡុន ភេទប្រុស អាយុ ២៩ឆ្នាំ រស់នៅក្នុងភូមិថ្មី ឃុំគងជ័យ ស្រុកអូរ រាំងឪ និងម្នាក់ទៀតឈ្មោះជា ចំរើន ភេទ ប្រុស អាយុ៤៥ឆ្នាំ ឯអ្នករងរបួសធ្ងន់៣នាក់ ១-ឈ្មោះចេក ភេទប្រុស ២-ឈ្មោះមាន ភេទប្រុស និងម្នាក់ទៀតពុំស្គាល់ឈ្មោះ ។
ប្រភពដដែលបានបន្ដថា មុនពេលកើតហេតុ ម៉ូតូម៉ាកវ៉េវ ពណ៌ខៀវខ្ចី ជិះគ្នា៣នាក់ ក្នុង នោះមាន១-ឈ្មោះជា ចំរើន ជាអ្នកឌុប ឯ ឈ្មោះចេក និងឈ្មោះមាន ជិះពីក្រោយបើក ចេញមកពីខាងកំពង់ចាម ខណៈពេលបើក មកដល់ត្រង់ផ្លូវកោងខាងលើក៏បានបុកគ្នាជា មួយនឹងម៉ូតូវ៉េវ ពណ៌ខៀវចាស់ ជិះគ្នា៣នាក់ ដែរ គឺ១-ឈ្មោះឡុន ជាអ្នកឌុប និង២នាក់ ទៀតមិនស្គាល់ឈ្មោះជិះពីក្រោយ បណ្ដាល ឱ្យសន្លប់ម្នាក់ ឯម្នាក់ទៀតបានរត់គេចខ្លួន បាត់ស្រមោល ។ លោកឡេង លាង បញ្ជាក់ ថា បន្ទាប់ពីមានឧប្បត្ដិហេតុគ្រោះថ្នាក់ចរា ចរណ៍នេះភ្លាម រូបលោកបានដឹកនាំកំលាំង ក្រោមឱវាទចុះទៅជាបន្ទាន់ក៏បានឃើញ មនុស្ស២នាក់ស្លាប់ និងអ្នករងរបួសដេកដួល រដូករណែលឈាមហូរស្រោចពេញខ្លួនប្រាណ ទើបប្រញាប់ហៅរថយន្ដមកដឹកយកទៅ សង្គ្រោះជាបន្ទាន់នៅមន្ទីរពេទ្យភ្លាមៗដែរ ។
ប្រភពដដែលបានបន្ដទៀតថា គ្រោះ ថ្នាក់ចរាចរណ៍ដ៏រន្ធត់នេះកើតឡើងដោយសារអ្នកបើកម៉ូតូទាំង២គ្រឿងប្រើល្បឿនលើស កំរិត ព្រមទាំងបានបើកចូលទៅក្នុងចំណែក ផ្លូវខាងស្ដាំដៃរបស់ម៉ូតូម្ខាងទៀត ទើបបង្កឱ្យ មានគ្រោះថ្នាក់ធ្ងន់ធ្ងរបែបនេះ ។ ចំពោះវត្ថុ តាងម៉ូតូ២គ្រឿងដែលក្រពឹតឡើងរួញក្រញង់នោះ ត្រូវបាននាំមករក្សាទុកនៅអធិការដ្ឋាន ប៉ូលិសស្រុកអូររាំងឪ ដើម្បីដោះស្រាយទៅ តាមច្បាប់ ។
ចែករំលែកព័តមាននេះ