ប្រទេសវៀតណាម ៖ ប្រាក់កម្ចីសម្បទានពីធនាគារពិភពលោក នឹងជួយគាំទ្រដល់ផលិតផលនាំចេញ ។ វៀតណាមកំពុងរៀបចំគម្រោងបង្កើតមូលនិធិ៣០០លានដុល្លារអាមេរិកដើម្បីរក្សាបាននូវការផលិតស្រូវ និងកាហ្វេប្រកបដោយនិរន្តរភាព ដែលជាផលិតផលនាំចេញចម្បងក្នុងរយៈពេល៤ឆ្នាំខាងមុខ ។ នេះបើតាម Vietnam Plus ។
គ្រោះរាំងស្ងួត ការកើនឡើងនៃជាតិប្រៃក្នុងដី និងការផ្តល់ហិរញ្ញប្បទានទន់ខ្សោយបានរំខានដល់ការផលិតទំនិញ និងប៉ះពាល់ដល់ជីវិតរស់នៅរបស់កសិកររាប់លាននាក់ក្នុងតំបន់ខ្ពង់រាប និងដីសណ្ដទន្លេមេគង្គ សម្រាប់ការធ្វើដំណាំស្រូវជាង១ឆ្នាំកន្លងមក ។ វៀតណាម គឺជាអ្នកផលិតកាហ្វេប្រភេទរ៉ូបឺស្តាធំបំផុតរបស់ពិភពលោក និងជាប្រទេសនាំចេញអង្ករធំជាងគេទី៣ បន្ទាប់ពីឥណ្ឌា និងថៃ ។
សមាគមអភិវឌ្ឍន៍អន្តរជាតិរបស់ធនាគារពិភពលោក នឹងផ្តល់ប្រាក់កម្ចីប្រមាណ២៣៧,៣លានដុល្លារអាមេរិក ខណៈរដ្ឋាភិបាលវៀតណាមនឹងបន្ថែមប្រាក់២៨,៨លានដុល្លារ និងស្វែងរកប្រាក់ប្រមាណ៣៥លានដុល្លារពីវិស័យឯកជន ។ នេះបើតាម Vietnam Plus ។
ប្រាក់កម្ចីរយៈពេលវែង និងមធ្យមនេះ នឹងជួយពង្រឹងគុណភាពអង្ករដោយប្រើប្រាស់បច្ចេកវិទ្យាកែច្នៃក្នុងខេត្តតំបន់ដីសណ្ដទន្លេមេគង្គទាំង៨ និងគាំទ្រការដាំកាហ្វេឡើងវិញនៅខេត្ត៥ ក្នុងតំបន់ខ្ពង់រាបភាគកណ្តាល ។
របាយការណ៍នេះឱ្យដឹងថា ធនាគារវិនិយោគ និងអភិវឌ្ឍន៍វៀតណាម ដែលគ្រប់គ្រងមួយផ្នែកធំដោយឯកជនជាមួយទ្រព្យសកម្ម នឹងចែកចាយមូលនិធិតាមរយៈធនាគារក្នុងស្រុកជាច្រើន ។
ទិន្នផលកាហ្វេក្នុងប្រទេសវៀតណាមនៅឆ្នាំ២០១៦-២០១៧ ត្រូវបានគេព្យាករថា នឹងធ្លាក់ចុះ១១%ពីរដូវមុន ស្មើនឹង១,៥៣លានតោន ដោយផ្អែកលើរបាយការណ៍ចងក្រងដោយអង្គការកាហ្វេអន្តរជាតិ ។ កាហ្វេវៀតណាមស្មើប្រហែល២០% នៃទិន្នផលកាហ្វេនៅលើពិភពលោក ។
សមាគមកាហ្វេ និងកាកាវវៀតណាមលើកឡើងថា ការខ្វះខាតទឹកកាលពីឆ្នាំមុន បានប៉ះពាល់ដល់ចម្ការកាហ្វេវៀតណាម១ភាគ៥ និងទិន្នផលអាចធ្លាក់ចុះពី១០%-២០%ក្នុងឆ្នាំ២០១៥-២០១៦ ។ ការដាំដុះរបស់ប្រទេសនេះ គឺចាប់ពីខែតុលា ដល់ខែកញ្ញា ។
ទឹកនៅតំបន់ដីសណ្តទន្លេមេគង្គបានធ្លាក់ចុះដល់កម្រិតទាបបំផុតកាលពីឆ្នាំមុន ដោយសារតែបាតុភូតអាកាសធាតុ ដែលធ្វើឲ្យទឹកសមុទ្រជ្រាបចូលជាង៩០គីឡូម៉ែត្រពីមាត់សមុទ្រ។ តំបន់ដីសណ្តអាចបង្កើតទិន្នផលស្រូវជាងពាក់កណ្តាល ហើយ៩០%នៃទិន្នផលនេះ គឺសម្រាប់ការនាំចេញ ។
ក្រសួងកសិកម្មនិយាយថា ជាតិប្រៃនៅក្នុងដីច្រើនបានបន្ថយទិន្នផលស្រូវចំនួន៤៣,៦លានតោនកាលពីឆ្នាំ២០១៦ ៕
ចែករំលែកព័តមាននេះ