ប្រទេសនេប៉ាល់ ៖ នេប៉ាល់បានស្នើដល់វិនិយោគិនបរទេសកាលពីថ្ងៃព្រហស្បតិ៍សប្ដាហ៍មុន ឲ្យជួយអភិវឌ្ឍន៍សេដ្ឋកិច្ចរបស់ខ្លួន ដែលកំពុងជួបទុក្ខលំបាកក្នុងការងើបឡើងវិញពីការរញ្ជួយដីនាឆ្នាំ២០១៥ ។
រដ្ឋាភិបាលរបស់ប្រទេសនេះសង្ឃឹមថា នឹងអាចទាក់ទាញបានការវិនិយោគ១ប៊ីលានដុល្លារក្នុងអំឡុងពេលសន្និសីទមួយនៅរដ្ឋធានី Kathmandu ។ លោកនាយករដ្ឋមន្ត្រី Pushpa Kamal Dahal ក៏បានសន្យាថា នឹងជំរុញដល់បរិស្ថានអាជីវកម្មដ៏ល្អមួយផងដែរ ។
លោកបានប្រាប់វិនិយោគិនថា ៖ «ពួកយើងចង់ប្រើប្រាស់គ្រប់ឱកាសដែលមានសម្រាប់ការអភិវឌ្ឍសេដ្ឋកិច្ច ។ ខ្ញុំចង់ធានាដល់អ្នកថា រដ្ឋាភិបាលប្តេជ្ញាក្នុងការបង្កើតបរិស្ថានដ៏ល្អមួយ » ។
លោក Jin Liqun មកពីធនាគារវិនិយោគហេដ្ឋារចនាសម្ព័ន្ធអាស៊ី និយាយថា ពួកគេនឹងធ្វើការជាមួយរដ្ឋាភិបាលដើម្បីលើកតម្កើងការអភិវឌ្ឍសង្គម និងសេដ្ឋកិច្ចរបស់ប្រទេសនេះ ដែលស្ថិតក្នុងចំណោមប្រទេសក្រីក្រជាងគេក្នុងតំបន់ ។
លោក Jin និយាយថា ៖ « ធនាគារខាងលើបានបញ្ជូនក្រុមមួយទៅកាន់ប្រទេសនេះ ដើម្បីពិចារណាក្នុងការវិនិយោគលើវារីអគ្គិសនីនៅនេប៉ាល់ » ។
គួរបញ្ជាក់ថា ការធ្វើកុបកម្មកុម្មុយនីស្តអស់រយៈពេល១ទសវត្សរ៍បានបញ្ចប់នាឆ្នាំ២០០៦ និងបង្អាក់ការអភិវឌ្ឍ បន្ទាប់មកប្រទេសនេះនៅជួបប្រទះបញ្ហាអស្ថិរភាពនយោបាយថែមទៀត។
ការរញ្ជួយដីកាលពីខែមេសា ឆ្នាំ២០១៥ បានសម្លាប់មនុស្សចំនួន៩ពាន់នាក់ និងធ្វើឲ្យផ្ទះប្រមាណ១លានខ្នងត្រូវខូចខាតទៀតផង ៕
ចែករំលែកព័តមាននេះ