ប្រទេសកូរ៉េខាងត្បូង ៖ អាជីវកម្មនៅកូរ៉េខាងត្បូងត្រូវបានរង្គោះរង្គើកាលពីថ្ងៃសុក្រ បន្ទាប់ពីមានមុខសញ្ញាថា ការដាក់ប្រព័ន្ធការពារមីស៊ីលរបស់សហរដ្ឋអាមេរិកក្នុងប្រទេសនេះ អាចនឹងបង្កឲ្យមានការហាម
ប្រទេសកូរ៉េខាងត្បូង ៖ អាជីវកម្មនៅកូរ៉េខាងត្បូងត្រូវបានរង្គោះរង្គើកាលពីថ្ងៃសុក្រ បន្ទាប់ពីមានមុខសញ្ញាថា ការដាក់ប្រព័ន្ធការពារមីស៊ីលរបស់សហរដ្ឋអាមេរិកក្នុងប្រទេសនេះ អាចនឹងបង្កឲ្យមានការហាមឃាត់ការធ្វើដំណើរពីប្រទេសចិនមកកាន់កូរ៉េខាងត្បូង ។
រដ្ឋាភិបាលកូរ៉េខាងត្បូងនិយាយថា ពួកគេគិតថា អាជ្ញាធរចិនបានប្រាប់ភ្នាក់ងារទេសចរណ៍ក្នុងប្រទេសខ្លួនថា ឲ្យឈប់លក់សំបុត្រទេសចរណ៍មកកាន់កូរ៉េខាងត្បូង ដែលធ្វើឲ្យមានការបារម្ភថា នឹងមានសង្គ្រាមពាណិជ្ជកម្មរវាងប្រទេសទាំងពីរកាន់តែខ្លាំងឡើង ។
ប៉ុន្តែរដ្ឋាភិបាលចិនដែលមិនសប្បាយចិត្តនឹងការសម្រេចចិត្តរបស់កូរ៉េខាងត្បូង ក្នុងការទទួលយកប្រព័ន្ធការពារមីស៊ីល THAAD បដិសេធថា ខ្លួនមិនបានចេញបញ្ជាដូច្នេះទេ ។
អ្នកនាំពាក្យម្នាក់របស់ក្រសួងការបរទេសចិន លោក Geng Shuang និយាយថា ៖ «ពួកយើងសង្ឃឹមថា ភាគីកូរ៉េខាងត្បូងនឹងស្តាប់ឮមតិរបស់ប្រជាជន និងចេញសកម្មភាពចៀសវាងការប៉ះពាល់បន្ថែមលើទំនាក់ទំនងទ្វេភាគី » ។
គួរបញ្ជាក់ថា យ៉ាងតិចក៏មានក្រុមហ៊ុនទេសចរណ៍ចិនមួយគឺ Tuniu បានបញ្ឈប់ការលក់សំបុត្រដំណើរកម្សាន្តមកកាន់កូរ៉េខាងត្បូង។ ក្រុមហ៊ុននេះបាននិយាយក្នុងសេចក្តីប្រកាសកាលពីថ្ងៃសុក្រថា ពួកគេធ្វើបែបនេះ ព្រោះតែការដាក់ប្រព័ន្ធ THAAD និងការសម្រេចចិត្តរបស់ក្រុមហ៊ុន Lotte ក្នុងការប្រគល់ដីដែលមានសម្រាប់ប្រព័ន្ធនេះ ។
ក្រសួងវប្បធម៌ កីឡា និងទេសចរណ៍របស់កូរ៉េខាងត្បូងនិយាយថា ពួកគេដឹងថា អាជ្ញាធរចិនបានកោះហៅអ្នកតំណាងក្រុមហ៊ុនទេសចរណ៍នៅប៉េកាំងកាលពីថ្ងៃព្រហស្បតិ៍ និងប្រាប់ពួកគេឲ្យបញ្ឈប់ការលក់ ចាប់ពីថ្ងៃទី១៥ មីនា តទៅ ។
យោងតាមទិន្នន័យពីអង្គការទេសចរណ៍កូរ៉េឲ្យដឹងថា ក្នុងចំណោមភ្ញៀវទេសចរចំនួន១៧លាននាក់ដែលបានមកកាន់កូរ៉េខាងត្បូង គឺ៨លាននាក់ជាជនជាតិចិន ។ ប្រទេសចិន ក៏ជាដៃគូពាណិជ្ជកម្មធំជាងគេរបស់កូរ៉េខាងត្បូងផងដែរ ។
លោកស្រី Krystal Tan មកពី Capital Economics និយាយថា ៖ « ប្រទេសកូរ៉េពឹងផ្អែកលើប្រទេសចិន ច្រើនជាងប្រទេសចិនពឹងផ្អែកលើខ្លួន » ។
ក្នុងរយៈពេលប៉ុន្មានខែមកនេះ ចិនក៏បានហាមឃាត់ដល់ផលិតផលគ្រឿងសម្អាងរបស់កូរ៉េ និងថែមទាំងបដិសេធលើវីសារបស់ជនជាតិកូរ៉េ២នាក់ ដែលត្រូវទៅសម្តែងក្នុងប្រទេសចិនផងដែរ ៕
ចែករំលែកព័តមាននេះ