អ្នកចាកចេញពីគណបក្សសង្គ្រោះជាតិទាមទារឱ្យលោក កឹម សុខា ប្រធានបក្សលាលែង
រាជធានីភ្នំពេញ ៖ លោក សួង សុភ័ណ្ឌ មន្ត្រីជាន់ខ្ពស់គណបក្សសង្គ្រោះជាតិម្នាក់ទៀតនៅថ្ងៃទី៦ ខែមីនា បានថ្លែងប្រាប់កោះសន្តិភាពតាមទូរស័ព្ទថា
រាជធានីភ្នំពេញ ៖ លោក សួង សុភ័ណ្ឌ មន្ត្រីជាន់ខ្ពស់គណបក្សសង្គ្រោះជាតិម្នាក់ទៀតនៅថ្ងៃទី៦ ខែមីនា បានថ្លែងប្រាប់កោះសន្តិភាពតាមទូរស័ព្ទថា
រាជធានីភ្នំពេញ ៖ លោក សួង សុភ័ណ្ឌ មន្ត្រីជាន់ខ្ពស់គណបក្សសង្គ្រោះជាតិម្នាក់ទៀតនៅថ្ងៃទី៦ ខែមីនា បានថ្លែងប្រាប់កោះសន្តិភាពតាមទូរស័ព្ទថា លោកបានសម្រេចចិត្តលាលែងពីគណបក្សសង្គ្រោះជាតិជាផ្លូវការ និងទាមទារឱ្យលោក កឹម សុខា ប្រធានគណបក្សសង្គ្រោះជាតិចុះចេញតួនាទីប្រធានគណបក្សសង្គ្រោះជាតិ ។
លោកអះអាងថា ទង្វើរបស់លោកប្រធាន កឹម សុខា ពេលនេះដូចជាឈ្នាន់របស់គណបក្សកាន់អំណាច បន្ទាប់ពីមានភាពស្និទ្ធស្នាលរបស់ លោក កឹម សុខា នឹងសម្តេចតេជោនាយករដ្ឋមន្ត្រី ហ៊ុន សែន ។
លោក សួង សុភ័ណ្ឌ ជាអតីតបេក្ខជនតំណាងរាស្ត្រមណ្ឌលប៉ៃលិនក្នុងអាណត្តិទី៥នៃរដ្ឋសភា តែមិនបានទទួលអាសនៈទេ ។ លោកក៏ជាមន្ត្រីជាន់ខ្ពស់របស់គណបក្សសង្គ្រោះជាតិ និងជាសកម្មជននៃគណបក្ស សម រង្ស៊ីមុនពេលចូលមកគណបក្សសង្គ្រោះជាតិ ។ លោក សួង សុភ័ណ្ឌ ជាមន្ត្រីជាន់ខ្ពស់ទី៤ដែលបានសម្រេចចិត្តដើរចេញពីបក្សប្រឆាំងនេះ ។
ក្នុងបទសម្ភាសន៍ដាច់ដោយឡែកជាមួយកោះសន្តិភាព លោក សួង សុភ័ណ្ឌ ថ្លែងថា លោកជាប្រធានក្រុមការងារនិងជាអតីតបេក្ខជនតំណាងរាស្ត្រឈរឈ្មោះបោះឆ្នោតនៅមណ្ឌលប៉ៃលិន របស់គណបក្សសង្គ្រោះជាតិ ។
លោក សួង សុភ័ណ្ឌ បានលើកឡើងថា លោកបានតាមដាននិងសង្កេតឃើញភ័ស្តុតាងជាច្រើនបញ្ជាក់យ៉ាងច្បាស់ថា លោក កឹម សុខានិងសម្តេចតេជោ ហ៊ុន សែន ជាមនុស្សតែមួយឬលោក កឹម សុខា ធ្វើអ្វីតាមបញ្ជារបស់សម្តេចហ៊ុន សែន ដោយរៀបចំបំបែកលោក សម រង្ស៊ីចេញពីឆាកនយោបាយកម្ពុជា ដែលលោកជាអ្នកនយោបាយស្នេហាជាតិពិតប្រាកដ ។
នៅពេលសួរទៀតថា លោកនឹងបន្តនយោបាយទៀតជាមួយគណបក្សមួយណាទេនៅពេលចេញពីគណបក្សសង្គ្រោះជាតិ ? លោក សួង សុភ័ណ្ឌ បានលើកឡើងថា លោកមិនបញ្ចប់ជីវិតនយោបាយរបស់លោកនៅឡើយទេ ។
លោកនិយាយថា «ជីវិតនយោបាយគឺជាជីវិតរបស់ខ្ញុំ» តែលោកមិនបានបញ្ជាក់ថាលោកនឹងទៅចូលរួមជាមួយគណបក្សណានៅឡើយទេ ។ នៅពេលសួរបន្តថា ឮថាលោកត្រូវបានគណបក្សសង្គ្រោះជាតិបណ្តេញរូបលោកចេញមែនទេ ? លោកថ្លែងថា គណបក្សមិនបានបណ្តេញលោកចេញទេ គ្មានភ័ស្តុតាងណាដែលបក្សសម្រេចបណ្តេញលោកទេ ។
លោក សួង សុភ័ណ្ឌ បានអះអាងថា ការចាកចេញរបស់លោកនៅពេលនេះ ក៏សូមទាមទារឱ្យលោក កឹម សុខា លាលែងពីប្រធានគណបក្សសង្គ្រោះជាតិផងដែរ ។ លោកបញ្ជាក់ថាលោក កឹម សុខា គួរចាកចេញពីតួនាទីប្រធានបក្ស ព្រោះមានអ្នកមិនសប្បាយចិត្តជាមួយលោក កឹម សុខា នឹងបន្តចាកចេញទៀត ។
ចំណែកលោក អេង ឆៃអ៊ាង អនុប្រធានគណបក្សសង្គ្រោះជាតិ ថ្លែងថា លោកមិនសូវចាប់អារម្មណ៍ចំពោះការលាលែងនិងការលើកឡើងរបស់លោក សួង សុភ័ណ្ឌ ទេ ។ លោកបានថ្លែងយ៉ាងខ្លីប្រាប់កោះសន្តិភាពតាមទូរស័ព្ទនៅរសៀលថ្ងៃទី៦ ខែមីនា ថា «ខ្ញុំឆ្ងល់ថា ការលាលែងរបស់លោក សួង សុភ័ណ្ឌ នេះមានអីសំខាន់ ព្រោះគ្មានតួនាទីអ្វីនៅក្នុងគណបក្សសង្គ្រោះជាតិទេ បន្ទាប់ពីការបោះឆ្នោតឆ្នាំ២០១៣ហ្នឹង ។ បើគាត់មានតួនាទីនៅក្នុងគណបក្សសង្គ្រោះជាតិទៅ ថាមានការសំខាន់ នេះអត់មានតួនាទីអ្វីផង» ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ថ្លែងថា នេះគ្រាន់តែជាការបញ្ចេញមតិរបស់បុគ្គលលោក សួង សុភ័ណ្ឌ ដែលទាមទារឱ្យមេបក្សគាត់ចុះ តែសមាជគណបក្សសង្គ្រោះជាតិបានជ្រើសរើសលោក កឹម សុខា ជាប្រធានហើយ ។ លោកអះអាងថា អ្នកបញ្ចេញមតិត្រូវគោរពសិទ្ធិអ្នកដទៃ និងគោរពច្បាប់ ។ លោកលើកឡើងថា នេះជាបញ្ហាផ្ទៃក្នុងរបស់គណបក្សសង្គ្រោះជាតិទេ ៕
ចែករំលែកព័តមាននេះ