រាជធានីភ្នំពេញ ៖ បន្ទាប់ពីលេងចាញ់ក្រុមខ្លាកំណាចភាគខាងត្បូង(Johor Darul Ta’zim FC)មកពីលីគកំពូលម៉ាឡេស៊ីដោយលទ្ធផល០-៣ក្នុងជំនួបបើកឆាកវគ្គចែកពូលFនៃពានរង្វាន់AFC Cup 2017 ដែលជាពានលំដាប់ទី២សម្រាប់ក្លិបបាល់ទាត់ប្រចាំទ្វីបអាសុីកាលពីយប់ថ្ងៃទី២១ កុម្ភៈ នៅកីឡដ្ឋានTan Sri Dato’Haji Yunos Stadium ប្រទេសម៉ាឡេស៊ីរួចមក ក្រុមនាគខៀវបឹងកេត(បឹងកេតអង្គរ)នឹងបើកទ្វារទទួលក្រុមGlobal FCមកពីលីគកំពូលហ្វ៊ីលីពីន នាវេលាម៉ោង៦ល្ងាចថ្ងៃទី៧ មីនា នៅពហុកីឡដ្ឋានជាតិអូឡាំពិក ។
ថ្លែងនៅក្នុងសន្និសីទសារព័ត៌មានកាលពីព្រឹកថ្ងៃទី៦ មីនា នេះ លោក ឃួន ឡាបូរ៉ាវី ប្រធានក្រុមបឹងកេតអង្គរ បានឱ្យដឹងថា បើទោះជាក្រុមរបស់លោក បានចាញ់នៅក្នុងការប្រកួតជុំទី១ក៏ពិតមែន ប៉ុន្តែលោកនៅតែមានជំនឿចិត្តលើកូនក្រុមរបស់លោកយ៉ាងមុតមាំក្នុងជំនួបប្រកួតជាមួយក្រុមGlobal FCល្ងាចនេះ តែលោកដឹងថានឹងជួបការលំបាកច្រើនដោយសារតែក្រុមមកពីប្រទេសហ្វ៊ីលីពីនមួយនេះ គឺជាក្រុមខ្លាំងបានឡើងមកដល់វគ្គ៤ក្រុមចុងក្រោយកាលពីឆ្នាំ២០១៥ទៀតផង ។ លោកនិងកូនក្រុមលោកប្ដេជ្ញាថា នឹងប្រកួតឱ្យអស់ពីសមត្ថភាពដើម្បីមុខមាត់ប្រទេសយើង ។
លោក John Mc Glynn គ្រូបង្វឹកក្រុមបឹងកេតអង្គរបានសម្ដែងការព្រួយបារម្ភខ្លះៗ ដោយសារតែក្រុមភ្ញៀវមួយនេះក៏ត្រូវការ៣ពិន្ទុដើម្បីបានឡើងទៅប្រកួតនៅវគ្គបន្តទៀតដែរ ។
ទោះបីយ៉ាងណាលោកថា សម្រាប់ការប្រកួតលើកនេះក្រុមលោកមានប្រៀបជាងបន្តិចដោយសារតែយើងមានកីឡាករទី១២ក្នុងនាមជាម្ចាស់ផ្ទះ ។
លោក Toshiaki Imai គ្រូបង្វឹកក្រុមGlobal FCបានថ្លែងថា ការប្រកួតលើកនេះពិតជាលំបាកបន្តិចហើយសម្រាប់ក្រុមGlobal FCដោយសារតែកីឡាកររបស់លោកមានរបួសច្រើនគឺមានតែ១៦នាក់ប៉ុណ្ណោះដែលមកប្រកួត ដូច្នេះមានតែផ្លាស់ប្ដូរយុទ្ធសាស្ត្រលេងទេ ទើបអាចទៅរួច ។ លោកគិតថា ក្រុមបឹងកេតអង្គរមានកីឡាករបរទេសល្អៗច្រើន ហើយនៅមានខ្សែប្រយុទ្ធដ៏ឆ្នើមប្រចាំក្រុមមួយរូបទៀត គឺ ឃួន ឡាបូរ៉ាវី ជាកីឡាករដ៏គ្រោះថ្នាក់បំផុតសម្រាប់ក្រុមរបស់លោក ។
គួររំលឹកផងដែរថា ក្លិបGlobal FC បង្កើតឡើងនៅឆ្នាំ២០០០ មានកីឡដ្ឋានឈ្មោះCebu City Sports Centeស្ថិតនៅទីក្រុង Cebu City ប្រទេសហ្វ៊ីលីពីន ។ បច្ចុប្បន្នក្លិបកំពុងលេងក្នុងលីគកំពូលហ្វ៊ីលីពីន(Philippines Football League) ដែលគ្រោងចាប់ផ្ដើមរដូវកាលថ្មីនៅអំឡុងខែមេសា ។
តាំងពីបង្កើតឡើងរហូតមកដល់ពេលនេះ សម្រាប់ពានរង្វាន់ក្នុងស្រុក ក្លិបGlobal FC ធ្លាប់ឈ្នះពានជើងឯកលីគកំពូលហ្វ៊ីលីពីនចំនួន៣លើកនៅឆ្នាំ២០១២, ២០១៤ និង២០១៦ និងឈ្នះពានលីគលំដាប់ទី២ហ្វ៊ីលីពីនចំនួន១លើក។ ជាមួយពានCup ក្លិបដែលមានរហស្សនាមThe People’s Club មួយនេះធ្លាប់ឈ្នះUFL Cup ចំនួន២លើកនៅឆ្នាំ២០១០ និង២០១៦ និងធ្លាប់ឈ្នះពានUFL FA Cup ១លើកនៅឆ្នាំ២០១៤។
ជាមួយពានរង្វាន់ក្រៅស្រុក ក្លិបGlobal FC ធ្លាប់បានចូលលេងវគ្គចែកពូលពានរង្វាន់ AFC Cup ម្ដងកាលពីឆ្នាំ២០១៥កន្លងទៅ និងធ្លាប់ចូលលេងវគ្គចែកពូលពានរង្វាន់
AFC President’s Cup ម្ដង និងចុងក្រោយបានចូលរួមប្រកួតពានរង្វាន់AFC Champion Leagueតែធ្លាក់ត្រឹមវគ្គជម្រុះជុំទី២។ បច្ចុប្បន្ន ក្លិបGlobal FCមានកីឡាករសរុបចំនួន២៦នាក់ក្នុងនោះកីឡាករបរទេស៦នាក់(ជនជាតិកាម៉េរូនម្នាក់, ហូឡង់ម្នាក់, ប្រេសុីលម្នាក់, អូស្ត្រាលីម្នាក់ និងជប៉ុន២នាក់)។ ក្រៅពីនេះមានកីឡាករមកពីក្រុមជម្រើសជាតិរហូតដល់ទៅ៧នាក់ ។
សូមបញ្ជាក់ថា ជាបណ្ដោះអាសន្នក្រុមបឹងកេតអង្គរ គ្មានពិន្ទុក្នុងដៃនៅឡើយទេ ដោយសារប្រកួតទី១ ក្នុងពូលF ចាញ់ក្រុមម៉ាឡេស៊ី Johor Darul Ta’zim ដោយលទ្ធផល ៣-០ ។ ចំណែកក្រុម Global FC កំពុងតែស្ថិតក្នុងលេខរៀងទី២ និងមាន៣ពិន្ទុដូចក្រុមកំពូលតារាងJohor Darul Ta’zim ដែរ ក្រោយយកឈ្នះក្រុមខ្លាំងមីយ៉ាន់ម៉ាMagwe FC ដោយលទ្ធផល១-០ កាលពីប្រកួតបើកឆាក ។
ដូច្នេះសូមរង់ចាំមើលថា តើល្ងាចស្អែកនេះ ក្រុមបឹងកេតអង្គររបស់កម្ពុជា ឬក្រុម Global FC ហ្វ៊ីលីពីននឹងទទួលបាន៣ពិន្ទុបន្ថែមដើម្បីបង្កើនក្ដីសង្ឃឹមឡើងទៅវគ្គបន្ដ ៕
ចែករំលែកព័តមាននេះ