គ្រោះអកុសលមើលមិនឃើញ រថយន្តធុនធ្ងន់ដឹកដំឡូងមី ថយកិនថៅកែស្រីស្លា.ប់
ខេត្តបាត់ដំបង ៖ ស្ត្រីជាឈ្មួញកណ្ដាលម្នាក់ បានស្លា.ប់ដោយសាររថយន្តដឹកដំឡូងមីរបស់ខ្លួនបែកកំណល់រអិលថយក្រោយកិនលើដងខ្លួន ខណ:កំពុងជួសជុល
ខេត្តបាត់ដំបង ៖ ស្ត្រីជាឈ្មួញកណ្ដាលម្នាក់ បានស្លាប់ដោយសាររថយន្តដឹកដំឡូងមីរបស់ខ្លួនបែកកំណល់រអិលថយក្រោយកិនលើដងខ្លួន ខណ:កំពុងជួសជុល កាលពីវេលាម៉ោង៦និង១៥នាទីព្រឹកថ្ងៃទី៥ មីនា នៅភូមិស្រែជីពៅ ឃុំមានជ័យ ស្រុកសំឡូត ។
មន្ត្រីកងរាជអាវុធហត្ថបានរាយការណ៍ថា ស្ត្រីរងគ្រោះឈ្មោះនៅ ស្រីមុំ អាយុ៣៥ឆ្នាំ ជាឈ្មូញដើរទិញដំឡូងមី រស់នៅភូមិអូរសំរិលក្រោម ឃុំអូរសំរិល ស្រុកសំឡូត។ មន្ត្រីដដែលបន្តថា ស្ត្រីរងគ្រោះត្រូវរថយន្តដឹកដំឡូងរបស់ខ្លួនរអិលថយក្រោយកិនបែកដងខ្លួនបណ្ដាលឲ្យស្លាប់ ខណ:ប្ដីរបស់គាត់កំពុងជួសជុលរថយន្តនៅលើចិញ្ចើមផ្លូវ។ ប្រភពដដែលបញ្ជាក់ថា រថយន្តដឹកដំឡូងរបស់គាត់ដាច់កាឡេ ហើយប្ដីរបស់គាត់ឈ្មោះសំ សុផល អាយុ៣៩ឆ្នាំ បានឈប់ក្បែរចិញ្ចើមថ្នល់ដើម្បីជួសជុល ។ លុះពេលប្រពន្ធជិះម៉ូតូទៅឈប់ពីក្រោយ ស្រាប់តែរថយន្តរអិលថយក្រោយកិនប្រពន្ធស្លាប់ភ្លាមតែម្ដង ។
សាក្សីបាននិយាយថា ដំបូងគេឃើញប្ដីស្ត្រីរងគ្រោះកំពុងជួសជុលរថយន្ត ហើយភ្លាមនោះគេឃើញប្រពន្ធជិះម៉ូតូទៅឈប់ខាងក្រោយរថយន្ត។ ពេលនោះស្ត្រីរងគ្រោះបានចុះពីម៉ូតូដើរយកកូនសោឲ្យទៅប្ដី តែចៃដន្យពេលនោះកំណល់កង់រថយន្តខាងក្រោយបានបែកធ្វើឲ្យរថយន្តរអិលថយក្រោយ ។ សាក្សីបញ្ជាក់ថា ពេលឃើញដូច្នេះស្ត្រីរងគ្រោះបានរត់ទៅអូសម៉ូតូចេញក៏ត្រូវរថយន្តរបស់ខ្លួនកិនពេញទំហឹងបណ្ដាលឲ្យស្លាប់ភ្លាមៗនៅក្រោមកង់យ៉ាងអាណោចអាធ័ម ។
មន្ត្រីកងរាជអាវុធហត្ថបានបញ្ជាក់ថា ករណីគ្រោះថ្នាក់ខាងលើនេះគឺកើតឡើងដោយចៃដន្យបំផុត ។ ប៉ុន្តែក្រោយកើតហេតុ មន្ត្រីនគរបាលចរាចរណ៍បានចុះទៅពិនិត្យកន្លែងកើតហេតុភ្លាមៗដែរ ។ បន្ទាប់មកមន្ត្រីជំនាញបាននាំយករថយន្តទៅរក្សាទុកបណ្ដោះអាសន្ន មុនពេលប្រគល់ឲ្យទៅម្ចាស់ដើមវិញ ៕
ចែករំលែកព័តមាននេះ